KA LILIMO zeñata, matabelo abile a butokwa mwa bulapeli bwa niti. Maisilaele nebafanga matabelo a lifolofolo, mi kuzwa kwa makalelo, Bakreste bazwezipili kufa “sitabelo sa milumbeko.” Kono kunani matabelo amañwi aatabisa Mulimu. (Maheb. 13:15, 16) Kufa matabelo acwalo kutahisa tabo ni limbuyoti, sina moiboniseza mitala yeluka nyakisisa.

Anna, yomuñwi wa batanga ba Jehova babasepahala yanaapilile mwa linako za kwamulaho, naabata hahulu kuba ni mwana wamushimani, kono naasapepi. Naalapezi ku Jehova, mi aitama kuli hanaaka pepa mwana wamushimani, naaka “mufa ku Jehova mwa mazazi a bupilo bwahae kaufela.” (1 Sam. 1:10, 11) Hamulaho wa nako, Anna aitwala, apepa mwana wamushimani, mi amubeya libizo la Samuele. Samuele hasaakwile, Anna amuisa kwa tabernakele, kulikana ni mwanaaitamezi. Jehova naafuyauzi Anna kabakala moya wahae wa buitomboli. Anna naafilwe mbuyoti ya kuba ni bana babañwi baketalizoho, mi Samuele naabile mupolofita ni muñoli wa libuka za mwa Bibele.—1 Sam. 2:21.

Kacenu, Bakreste banani tohonolo ya kuitusisa bupilo bwabona kwa kusebeleza Mubupi wabona ka kutala, sina mone baezelize bo Anna ni Samuele. Jesu naasepisize kuli haiba lubonisa moya wa buitomboli halulapela Jehova, uka lufuyaula hahulu.—Mare. 10:28-30.

Mwa linako za baapositola, Mukreste yabizwa Dorkasi naazibahala hahulu ka ‘misebezi yeminde ni kufa limpo za sishemo,’ mi naaezanga cwalo kuli atuse babañwi. Kono ka bumai, “akula mi atimela,” mi ba mwa puteho nebaswabile hahulu. Balutiwa habautwa kuli Pitrosi naali mwa muleneñi oli bukaufi, bamukupa kuli aye kwateñi kapili-pili. Munahane feela tabo yetuna yene babile ni yona, Pitrosi hanaazusize Dorkasi kwa bafu—mi yeo ki yona taba ya zuho yapili yeñozwi mwa Mañolo, ili yeneezizwe ki muapositola! (Lik. 9:36-41) Mulimu naasika libala misebezi ya Dorkasi. (Maheb. 6:10) Taba yebonisa bufani bwahae yeo iñozwi mwa Linzwi la Mulimu sina mutala omunde oluswanela kulikanyisa.

Muapositola Paulusi ni yena naatomile mutala omunde hahulu ka kufana nako yahae ni kutusa babañwi. Hanaañolela mizwale bahae ba kwa Korinte, Paulusi naabulezi kuli: “Haili na, nikafana zaka nili yatabile ni kuifana ka kutala kabakala mina.” (2 Makor. 12:15) Paulusi naaiponezi kuli mutu haatusa babañwi, uba ni tabo, mi sa butokwa ni kufita kikuli, ufuyaulwa ki Jehova ni kutabisa pilu yahae.—Lik. 20:24, 35.

Litaba zelunyakisisize libonisa hande kuli haluitusisa nako yaluna ni maata aluna kutusa mwa misebezi ya Mubuso ni kutusa Bakreste babañwi, lutabisa Jehova. Kono kana kunani linzila zeñwi zelukona kutusa ka zona kuli musebezi wa kukutaza Mubuso uzwelepili? Eni! Kwandaa misebezi yemiñwi yelueza ka lilato, lwakona kukuteka Mulimu ka kufa linubu za kuitatela. Linubu zeo litusanga kuzwisezapili musebezi wa kukutaza oezwa mwa lifasi kaufela, mi litusanga balumiwa ni babañwi baba mwa sebelezo yeipitezi ya nako kaufela. Hape, misebezi yecwale ka kulukisa ni kutoloka lihatiso ni mavidio, kutusa babatahezwi ki likozi, ni misebezi ya kuyaha Mandu A Mubuso, ni yona ilifelwa ka linubu za kuitatela. Lunani buikolwiso bwa kuli “mutu yafana ukafuyaulwa.” Mi halufa Jehova lika za butokwa, lubonisa kuli lwamukuteka.—Liprov. 3:9; 22:9.