1-2. (a) Ki nto mañi yelutusa kuzwelapili kuitiisa? Mutaluse. (b) Lukanyakisisañi mwa taba ye?

KANA muta omuñwi mukile mwaipumana mwa muliko mi muikutwa kuli nemusike mwakona kutula muliko wo munosi? Buñata bwaluna lukile lwaikutwa cwalo. Mwendi nemuikutwile cwalo hamuhupula mone mukonezi kuitiiseza hane mukula butuku bobutuna kamba hane mushwezwi ki mutu yomulata. Hamuhupula za muliko wo, mwendi muikutwa kuli nemukonile feela kuitiisa kabakala kuli moya wa Jehova okenile neu mifile “maata afita a butu.”—2 Makor. 4:7-9.

² Hape lutokwa moya okenile kuli ulutuse kuhanyeza moya wa lifasi le. (1 Joa. 5:19) Kuzwa fo, lutokwa moya okenile bakeñisa kuli lulwaniswa ki “mioya yemaswe.” (Maef. 6:12) Kacwalo, halunyakisiseñi linzila zepeli zebonisa mou lutuseza moya okenile kutiyela miinelo yetaata yeo. Hasamulaho, lukanyakisisa zeluswanela kueza kuli lutusiwe hahulu ki moya okenile.

3. Ki ifi nzila yaitusisa Jehova kuli alutuse kutula miliko?

³ Moya wa Jehova okenile ulutusa kuba ni maata alukonisa kupeta buikalabelo bwaluna kusina taba ni miliko yelukona kukopana ni yona. Muapositola Paulusi naaikutwile kuli naakonile kuzwelapili kusebeleza Jehova kusina taba ni miliko yanaakopana ni yona kakuli naaitingile fa “maata a Kreste.” (2 Makor. 12:9) Fa musipili wahae wa bulumiwa wabubeli, Paulusi naasika tanda feela nako yeñata inzaa kutaza kono hape naaezanga misebezi ya mazoho kuli afumane lika zanaatokwa. Hanaali mwa Korinte, naafitezi mwa ndu ya Akila ni Prisila. Bo Akila ni Prisila neli baezi ba litende. Bakeñisa kuli Paulusi ni yena naaezanga musebezi oswana, naasebezanga ni bona ka linako zeñwi. (Lik. 18:1-4)  Moya okenile neutusize Paulusi kuba ni maata a kusebeza kuli afumane lika zanaatokwa kwa mubili ni kupeta bukombwa bwahae.

4. Ka kuya ka liñolo la 2 Makorinte 12:7b-9, ki butata mañi bwanaakopani ni bona Paulusi?

⁴ Mubale 2 Makorinte 12:7b-9. Ki lika mañi zanaatalusa Paulusi mwa liñolo le hanaabulela kuli naanani “muutwa mwa mubili”? Luungeñi kuli mutabilwe ki muutwa, mi muutwa wo ukeni mwa mubili. Kusina kukakanya, nemuka utwa hahulu butuku. Kacwalo, Paulusi naatalusa kuli naakopana ni muliko omuñwi one umuutwisa hahulu butuku. Naabizize muliko wo kuli ki “lingeloi la Satani” lene lizwelapili ‘kumunata.’ Mwendi Satani ni madimona ahae nesi bona luli bane batahisize muliko wanaakopana ni ona Paulusi, one uswana sina muutwa mwa mubili. Kono kubonahala kuli mioya yemaswe yeo hane ilemuhile “muutwa” wo, neitabela kuekeza kwa butuku bwanaautwa Paulusi ka kukasha hahulu muutwa wo mwa mubili wahae. Ki lika mañi zanaaezize Paulusi?

5. Jehova naaalabile cwañi litapelo za Paulusi?

⁵ Kwa makalelo, Paulusi naabata kuli Jehova azwise “muutwa” wo ku yena. Naabulezi kuli: “Nenikupile Mulena [Jehova] halaalu . . . kuli muutwa wo uzwe ku na.” Nihaike kuli Paulusi naalapezi hañata ka za taba yeo, muutwa wo neuzwezipili kuba mwa mubili wahae. Kana fo kutalusa kuli Jehova naasika alaba litapelo za Paulusi? Batili. Naaalabile litapelo zahae. Jehova naasika felisa butata bo, kono naafile Paulusi maata anaa mutusize kuitiisa. Jehova naabulezi kuli: “Maata aka abonahala mwa bufokoli.” (2 Makor. 12:8, 9) Bakeñisa kuli Paulusi naatusizwe ki Mulimu, naazwezipili kuba ni tabo ni kozo ya mwa munahano!—Mafil. 4:4-7.

6. (a) Jehova ukona kualaba cwañi litapelo zaluna? (b) Ki lisepiso mañi zeomba-omba zefumaneha mwa mañolo abonisizwe mwa paragilafu?

⁶ Ka kuswana ni Paulusi, kana ni mina mukile mwakupa Jehova kuli amizwise mwa muliko omuñwi? Haiba butata bo, nebuzwezipili kamba mane kuekezeha kusina taba kuli nemukupile Jehova kuli abufelise, kana nemuikutwile kuli mwendi mufoselize Jehova? Haiba ki mona mone muikutwezi cwalo, muhupule mutala wa Paulusi. Sina feela Jehova hanaaalabile litapelo za Paulusi, ni mina ukaalaba litapelo zamina. Mwendi Jehova haana kufelisa butata bwamina. Kono ka kuitusisa moya wahae okenile, uka mifa maata a kutiyela muliko wo. (Samu 61:3, 4) Mukona ‘kunepelwa fafasi’ kono Jehova haana kumiyubeka.—2 Makor. 4:8, 9; Mafil. 4:13.

7-8. (a) Moya okenile uswana cwañi ni moya ofuka? (b) Pitrosi naatalusize cwañi mousebeleza moya okenile?

⁷ Moya okenile ulutusa ka nzila ifi yeñwi? Lukona kubapanya moya okenile kwa moya ofuka. Moya ofuka ukona kutusa sisepe kuyo fita hande kosiya, niha kunani liñungwa. Ka mukwa oswana, moya okenile ulutusa kuzwelapili kusebeleza Jehova kusina taba ni miliko yelukona kukopana ni yona kufitela lupila mwa lifasi lelinca lasepisize Mulimu.

⁸ Ka kuba ndui, muapositola Pitrosi naaziba hahulu za kufuluha. Ki lona libaka mwendi hanaabapanyize mousebeleza moya okenile kwa litaba zeama musebezi wa kufuluha. Naañozi kuli: “Bupolofita nebusika taha ka tato ya batu, kono batu nebabulezi litaba zezwa ku Mulimu inze basusumezwa ki moya okenile.” Linzwi la Sigerike lelitolokilwe kuli ‘kususumezwa’ halitolokiwa linzwi ka linzwi, litalusa “kukashiwa; kuzamaiswa.”—2 Pit. 1:21.

9. Pitrosi naabata kuli batu banahaneñi haanañozi kuli batu ‘nebasusumelizwe’ ki moya okenile?

⁹ Pitrosi naabata kuli batu banahaneñi haanañozi kuli batu ‘nebasusumelizwe’ ki moya okenile? Luka, muñoli wa buka ya Likezo, ni yena naaitusisize linzwi leliswana la Sigerike  hanaatalusa za sisepe ‘sesikukiswa’ ki moya. (Lik. 27:15) Caziba yomuñwi wa litaba za Bibele naatalusize kuli Pitrosi hanaabulezi kuli bañoli ba Bibele ‘nebasusumelizwe’ ki moya okenile, naaitusisize pulelo yeneka tahisa kuli batu banahane za kufuluha. Pitrosi naatalusa kuli sina feela sisepe hasikukiswanga ki moya kuli siyo fita kosiya, bañoli ba Bibele ni bona nebazamaiswa ki moya okenile kuli bapete musebezi one bafilwe. Caziba yaswana yo naabulezi kuli, “bañoli bao nebaswana feela sina lisepe zebapuzwi liseili zazona.” Jehova yena naapetile kalulo yahae. Naafukisize moya ka kubafa moya okenile. Bañoli ba Bibele ni bona nebaezize musebezi one bafilwe. Nebaezize cwalo ka kulatelela ketelelo ya moya okenile.

10-11. Ki lika mañi zepeli zeluswanela kueza zekatahisa kuli moya okenile ulutuse? Mufe mutala.

¹⁰ Mwa linako zaluna, Jehova haasaitusisa moya wahae kususumeza batu kuli bañole libuka za mwa Bibele. Nihakulicwalo, usaitusisa moya wahae okenile kuli aetelele batanga bahae. Jehova usapeta kalulo yahae. Moya wa Mulimu okenile ukona kulutusa cwañi? Luswanela kueza molukonela kaufela kupeta buikalabelo bwaluna. Lukona kueza cwañi cwalo?

¹¹ Halunyakisiseñi mutala wo. Kuli mufuluhi atusiwe ki moya, uswanela kueza lika zepeli. Sapili, uswanela kubeya sisepe sahae fokufuka moya. Kakuli sisepe sahae hasina kushenya haiba sibeiwa feela fa likamba kwahule ni fokufuka moya. Sabubeli, uswanela kuyemisa ni kubapula seili yahae ka kutala. Niteñi, moya niha ufuka, sisepe sahae sikashenya feela haiba liseili linatiwa ki moya. Ka mukwa oswana, lukazwelapili kuitiisa ni kusepahala ku Jehova haiba lutusiwa ki moya okenile. Kono kuli lutusiwe ki moya okenile, luswanela kueza lika zepeli. Sapili, luswanela kueza lika zekatahisa kuli moya wa Mulimu ulutuse. Sabubeli, luswanela kubapula liseili zaluna ka kutala, ili kueza misebezi yeo ka molukonela kaufela. (Samu 119:32) Haiba lueza lika zepeli zeo, moya okenile uka lutusa kutiyela twaniso ni miliko yeswana sina mandinda, mi uka lutusa kuzwelapili kusepahala ku Mulimu kufitela lupila mwa lifasi lelinca.

12. Ki lika mañi zeluka nyakisisa cwale?

 ¹² Selunyakisisize linzila zepeli zebonisa molutusezwa ki moya okenile. Moya okenile ulufa maata mi ulutusa kuzwelapili kusepahala halukopana ni miliko. Moya okenile hape waluetelela, mi ulutusa kueza lika zabata Jehova kuli lueze, ili nto yeka lutusa kufumana bupilo bobusa feli. Cwale halunyakisiseñi lika zeene zeluswanela kueza kuli lutusiwe hahulu ki moya okenile.

13. Ka kuya ka 2 Timotea 3:16, 17, Mañolo akona kulutusa cwañi, kono luswanela kuezañi?

¹³ Sapili, muitute Linzwi la Mulimu. (Mubale 2 Timotea 3:16, 17.) Lwaziba kuli Bibele izwa ku Mulimu. Mi Mulimu naaitusisize moya wahae okenile kuli atuse bañoli ba Bibele kuñola mihupulo yahae. Haiba lubala Bibele ni kunahanisisa zelubala, litaelo za Mulimu likakena mwa minahano yaluna ni lipilu zaluna. Litaba zeo zeñozwi ka kususumezwa ki moya okenile lika lutusa kucinca mupilelo waluna, ilikuli lupile ka nzila yetabisa Mulimu. (Maheb. 4:12) Kono kuli lutusiwe hahulu ki moya okenile, luswanela kufumananga nako ya kuituta Bibele kamita ni kunahanisisa zelubala. Haiba lueza cwalo, Linzwi la Mulimu lika lutusa kubulela ni kueza lika zetabisa Mulimu.

14. (a) Ki kabakalañi halukona kubulela kuli mikopano ya puteho ki kona koufukela moya? (b) Lukona kueza cwañi kuli lutusiwe hahulu ki moya okenile?

¹⁴ Sabubeli, mulapele Mulimu hamoho ni mizwale ni likaizeli bamina. (Samu 22:22) Ka mubulelelo wa swanisezo, lukali mikopano ya puteho ki kona koufukela moya. Jehova ulufanga moya wahae haluli kwa mikopano. (Sin. 2:29) Ki kabakalañi halubulela cwalo? Kakuli halukopana ni mizwale ni likaizeli baluna kulapela Jehova, lukupanga moya okenile, luopelanga lipina za Mubuso zetomile fa Linzwi la Mulimu, mi luteelezanga kwa litaelo za mwa Bibele zefiwanga ki mizwale babaketilwe ki moya okenile. Moya okenile hape utusanga likaizeli kuitukiseza ni kufa hande lingambolo zabona. Niteñi, kuli lutusiwe hahulu ki moya okenile, luswanela kuyanga kwa mikopano inze luitukiselize kuyo alaba. Halueza cwalo, lukabe luitukiselize kuamuhela moya okenile sina sisepe mosikona kutusezwa ki moya haiba liseili libapuzwi.

15. Lutokwa kuezañi kuli lulumeleze moya okenile kulutusa mwa musebezi wa kukutaza?

¹⁵ Sabulaalu, muezange musebezi wa kukutaza. Haiba luitusisa Bibele mwa musebezi wa kukutaza ni kuluta, lulumeleza moya okenile kulutusa mwa bukombwa. (Maro. 15:18, 19) Kono kuli lutusiwe hahulu ki moya wa Mulimu, luswanela kukutazanga kamita ni kuitusisa Bibele folubela ni kolo kaufela. Nzila yeñwi yekona kumitusa kuba ni lipuisano zende ni batu hamuli mwa bukombwa, ki kuitusisa liakalezo za mwakuambolisanela ni batu zefumaneha mwa Buka ya Mukopano wa Bupilo ni Bukombwa.

16. Ki ifi nzila yende hahulu yelukona kufumana ka yona moya okenile?

¹⁶ Sabune, mulapelange ku Jehova. (Mat. 7:7-11; Luka 11:13) Nzila yende hahulu yelukona kufumana ka yona moya okenile ki kuukupa ku Jehova ka tapelo. Hakuna nto niyekana yekona kupaleliswa litapelo zaluna kufita ku Jehova kamba kupaleliswa mpo yende yezwa ku Mulimu ya moya okenile kufita ku luna, ibe tolongo kamba mane nihaiba Satani. (Jak. 1:17) Luswanela kulapela cwañi kuli lutusiwe hahulu ki moya okenile? Kuli lualabe puzo yeo, halunyakisiseñi ka butungi za tapelo ka kuitusisa swanisezo yefumaneha mwa Buka ya Evangeli ya Luka. *

17. Swanisezo yanaafile Jesu yebulezwi kwa liñolo la Luka 11:5-9, 13, ilulutañi ka za tapelo?

¹⁷ Mubale Luka 11:5-9, 13. Swanisezo ya Jesu ibonisa molukona kukupela moya okenile halulapela. Muuna yabulezwi mwa swanisezo yeo naafilwe zanaatokwa “kabakala kutundamena * kwahae.” Naasika saba kukupa tuso ku mulikanaa hae nihaike kuli neli fahalaa busihu. Jesu naaswaniselize cwañi taba yeo kwa tapelo? Naabulezi kuli: “Muzwelepili kukupa, mi mukafiwa; muzwelepili kubata, mi mukafumana; muzwelepili kungongota, mi mukakwalulelwa.” Luitutañi kwa swanisezo yeo? Kuli lutusiwe ki moya okenile, lulukela kutundamena kuukupa ka tapelo.

18. Ka kuya ka swanisezo ya Jesu, ki kabakalañi halukona kukolwa kuli Jehova uka lufa moya wahae okenile?

¹⁸ Swanisezo ya Jesu hape ilutusa kuutwisisa libaka Jehova haaka lufa moya okenile. Muuna yabulezwi mwa swanisezo ye naabata kubabalela hande muenyi wahae. Naabata kufa muenyi wahae lico yanaapunyize fahalaa busihu kono naasina za kumuyumbula. Jesu naabulezi kuli mulikanaa muuna yo wa mwa swanisezo naalumezi kumutusa kabakala kuli naatundamezi kumukupa sinkwa. Ki tuto mañi yanaaluta Jesu? Haiba mutu yasika petahala naatabela kutusa mulikanaa hae yanaatundamezi kumukupa, uzibe Ndataa luna wa kwa lihalimu yasishemo uka lufa moya okenile haiba lutundamena kumukupa. Kacwalo, lwakona kukolwa kuli Jehova ukaalaba litapelo zaluna za kukupa moya okenile.—Samu 10:17; 66:19.

19. Ki kabakalañi halunani buikolwiso bwa kuli lwakona kuzwelapili kuitiisa?

¹⁹ Lunani buikolwiso bwa kuli lukazwelapili kuitiisa, kusina taba kuli Satani uzwelapili kululwanisa. Kabakalañi? Kabakala kuli moya okenile ulutusa mwa linzila zepeli. Sapili, ulufa maata alukonisa kutula miliko. Sabubeli, ulufa maata alutusa kuzwelapili kusebeleza Jehova kufitela lupila mwa lifasi lelinca. Kacwalo, haike lueze molukonela kaufela kuli lutusiwe hahulu ki moya okenile!