1, 2. (a) Ki musebezi mañi wanaanga Jesu kuba ona wa butokwa hahulu mwa bupilo bwahae, mi ki kabakalañi? (b) Luswanela kuezañi kuli lupete hande musebezi waluna ka kuba ‘babasebeza hamoho ni Mulimu’?

JESU KRESTE neli mubeti ni sikombwa sa taba yende. (Mare. 6:3; Maro. 15:8) Naaziba hande mwakuezeza misebezi yemibeli yeo. Ka kuba mubeti, naaitutile mwakuitusiseza lisebeliso za bubeti, ili zenee mukonisa kubeta lika za butokwa kuzwelela fa likota. Ka kuba muluti wa taba yende, naaitusisanga hande zibo ya mwa Mañolo kutusa batu-tu feela kuutwisisa niti ya mwa Linzwi la Mulimu. (Mat. 7:28; Luka 24:32, 45) Jesu hanaanani lilimo ze 30, atuhela musebezi wahae wa bubeti bakeñisa kuli naaziba kuli kuba sikombwa neli ona musebezi wa butokwa hahulu. Naabulezi kuli kushaela taba yende ya Mubuso wa Mulimu ki leliñwi la mabaka Mulimu hanaa mulumile fa lifasi. (Mat. 20:28; Luka 3:23; 4:43) Jesu naanga musebezi wa kukutaza kuba yona nto ya butokwa hahulu mwa bupilo bwahae, mi naabata kuli batu babañwi bamutuse kupeta musebezi wo.—Mat. 9:35-38.

² Mwendi luna halu babeti, kono lu likombwa za taba yende. Musebezi wo ki wa butokwa hahulu kuli mane Mulimu walutusanga kuupeta; ki lona libaka Bibele haibulela kuli “lusebeza hamoho ni Mulimu.” (1 Makor. 3:9; 2 Makor. 6:4) Lwaziba kuli “linzwi [la Jehova] kaufelaa lona ki niti.” (Samu 119:159, 160) Kabakaleo, luswanela kubona teñi kuli ‘lwaluta ni kutalusa linzwi la niti ka mukwa olukile’ haluli mwa bukombwa. (Mubale 2 Timotea 2:15.) Kacwalo, ki kwa butokwa kuli  luekeze kwa buikoneli bwaluna bwa kuitusisa Bibele, sona sisebeliso sa butokwa hahulu seluitusisanga kwa kuluta batu niti ka za Jehova, Jesu, ni Mubuso. Kopano ya Jehova ilukisize liitusiso zeñwi zelutokwa kuziba mwakuitusiseza zona ilikuli lupete hande bukombwa bwaluna. Liitusiso zeo ki zona lihatiso zeluitusisanga kwa kuluta batu.

3. Luswanela kuisa mamelelo kwa nto mañi mwahalaa nako yesiyezi ya kukutaza taba yende, mi ka kuya ka liñolo la Likezo 13:48, ki batu babacwañi boluswanela kubata?

³ Mwendi mubata kuziba libaka lihatiso zeo halibulelwa kuli ki lihatiso zeluitusisanga kwa kuluta batu isiñi lihatiso zeluitusisanga kwa kukutaza. “Kukutaza” kutalusa kushaela taba yeñwi; kono “kuluta” kutalusa kukenya lushango lo mwa pilu ni mwa munahano wa mutu, ilikuli akone kusebelisa zaituta. Mwahalaa nako yesiyezi ya kukutaza taba yende, luswanela kuisa hahulu mamelelo kwa kukalisa lituto za Bibele ni kuluta batu niti. Kuli lueze cwalo, lutokwa kuikataza kubata batu kaufela “ba lipilu zende bababata bupilo bobusa feli” ni kubatusa kuli babe balumeli.—Mubale Likezo 13:44-48.

4. Lukona kuziba cwañi batu “ba lipilu zende bababata bupilo bobusa feli,” mi lukona kubafumana cwañi?

⁴ Lukona kuziba cwañi batu “ba lipilu zende bababata bupilo bobusa feli”? Sina feela mone kuinezi mwa linako za baapositola, lukona feela kubafumana haiba lukutaza. Kabakaleo, lutokwa kueza sina feela mwanaalaelezi Jesu, hanaaize: “Hamukena mwa muleneñi kamba mwa munzi, mubate mwateñi yaswanela.” (Mat. 10:11) Halulibeleli kuli batu babasina niti, babanani buikuhumuso, kamba babasa tabeli za Mulimu bakaamuhela taba yende. Lubata batu babasepahala, babaikokobeza, ni babatabela luli kuituta niti. Musebezi waluna wa kubata batu babaswanela ukona kubapanywa kwa musebezi wanaaezize Jesu wa kubata likota zeswanela kuli abete lika za mwa ndu, likwalo, licoko ni zeñwi cwalo. Hasaafumani likota zeswanela, naanganga lisebeliso zahae ni kuitusisa buikoneli bwahae kubeta lika zanaabata. Ni luna luswanela kueza nto yeswana halunze luikataza kutusa batu ba lipilu zende kuba balutiwa.—Mat. 28:19, 20.

5. Luswanela kuzibañi ka za lihatiso zeluitusisanga kwa kuluta batu? Mufe mutala. (Mubone maswaniso a fa likepe 11.)

⁵ Mubeleki ubanga ni lisebeliso zeñata mi sisebeliso ni sisebeliso sinani musebezi wasona. Ka mutala, Jesu naatokwa kuba ni lisebeliso zeñata mwa musebezi wa bubeti. * Naatokwa kuba ni lisebeliso za kumishalisa ni kulalisa, za kupumisa likota ka zona, za kupunya masuba ka zona, za kubetisa, lisebeliso zetusa kuli mabala alikanelele ni lisebeliso za kungungekisa mabala ka zona. Ka mukwa oswana, hatiso ni hatiso yeluitusisanga kwa kuluta batu inani musebezi wayona. Kacwalo, halunyakisiseñi molukona kuitusiseza lihatiso za butokwa zelufilwe.

6, 7. (a) Muitusisize cwañi makadi azibahaza webusaiti yaluna? (b) Mapampili a kumemela batu kwa mikopano ya puteho apeta misebezi mañi yemibeli?

⁶ Makadi Azibahaza Webusaiti Yaluna. A ki makadi amanyinyani kono alutusa kuizibahaza kwa batu ni kubalibisa fa webusaiti yaluna, mi hase bakeni fa webusaiti yaluna, bakaituta zeñata ka za luna, mi mane bakona kukupa kuituta Bibele. Ka nako ya cwale, batu babafitelela 400,000 sebafitisize kupo ya kuituta Bibele ka kuitusisa webusaiti ya jw.org, mi zazi ni zazi batu babañata bakupanga kuituta Bibele! Kacwalo, hamueza misebezi yamina ya ka zazi ni zazi mube ni makadi azibahaza webusaiti yaluna kuli muitusise ona hamuba ni kolo ya kukutaza.

⁷ Mapampili A Kumemisa Batu. Pampili yeluitusisanga kwa kumemela batu kwa mikopano ya puteho ipeta misebezi yemibeli. Pampili yeo inani manzwi aali: “Mwa memiwa ku ituta Bibele ni Lipaki za Jehova.” Pampili yeo hape ibonisa kuli mutu yatabela wakona kuituta Bibele “kwa mikopano ya luna ya nyangela” kamba ‘kuituta ni mutu yomuñwi.’ Kabakaleo, pampili ye hai luzibahazi  feela kwa batu kono hape itusa kuli batu “babalemuha kuli batokwa za Mulimu” baitute Bibele ni luna. (Mat. 5:3) Nihakulicwalo, ibe kuli batu batabela kuituta Bibele kamba kutokwa, kaufelaa bona bakona kufumaneha kwa mikopano yaluna. Haiba bafumaneha kwa mikopano yaluna, bakalemuha kuli luluta niti yezwa mwa Bibele.

8. Ki kabakalañi hakuli kwa butokwa kuli batu bafumanehe kwa mikopano yaluna nihaiba feela hañwi? Mufe mutala.

⁸ Ki kwa butokwa kuli luzwelepili kumema batu kuli bafumanehe kwa mikopano yaluna nihaiba feela hañwi. Kabakalañi? Kabakala kuli habaka taha kwa mikopano yaluna, bakalemuha kuli lushutanela kwahule ni bulapeli bwa buhata kakuli luna lwafepiwa hande kwa moya kono babaswalisana ni Babilona Yomutuna bona balapa. (Isa. 65:13) Bo Ray ni bo musalaa bona bo Linda, babapila kwa United States nebalemuhile taba yeo lilimo-limo kwamulaho. Bo mutu ni musalaa hae bao banahana za kukalisa kuyanga kwa keleke. Nebalumela kuli Mulimu uteñi mi nebaikutwa kuli nebatokwa kumuziba; kacwalo, bapotela likeleke kaufela zenefumaneha mwa muleneñi one bapila ku ona, iliñwi ka iliñwi. Nekunani likeleke zeñata mwa sibaka seo. Kwa makalelo, bo muuna ni musalaa hae bao nebaikatulezi kuli keleke yene bakaswalisana ni yona neilukela kukwanisa lika zepeli zene batomile. Sapili, nebaswanela kuituta sesiñwi kwa mukopano wa keleke yeo, mi sabubeli, batu bane baswalisana ni keleke yeo nebaswanela kuapala sina batu babalapela Mulimu. Hamulaho wa lilimo zeñata, nese bapotezi likeleke zeñata, kono hakuna keleke yenekwanisize lika zene batokwa. Nebasika ituta nto nihaiba yekana kwa likeleke kaufela zene bapotezi, mi batu ba mwa likeleke zeo nebasina mutinelo omunde. Hase bazwile mwa keleke ya mafelelezo yene baizo potela, bo Linda baya kwa musebezi, mi bo Ray bona baya kwa ndu. Bo Ray hane banze baya kwa ndu, bafita bukaufi ni Ndu ya Mubuso inze bazamaisa mota yabona mi baipulelisa, bali: ‘Pili niyo bona zesweli kuezahala mwa keleke yale.’ Kaniti luli, lika zene bafumani neli batabisize hahulu! Batu kaufela bane bali kwa Ndu ya Mubuso nebabonisa moya omunde ni silikani, mi nebaapezi hande. Bo Ray baina kwa sipula sa kwapili, mi nebaikozi hahulu lituto zene baitutile! Nekubile feela sina mwanaabulelezi muapositola Paulusi ka za mutu yataha kwa mukopano wa Bakreste lwapili, mi ubulela kuli: “Kaniti Mulimu uteñi mwahalaa mina.” (1 Makor. 14:23-25) Kuzwa zazi leo, bo Ray bakala kufumanehanga kwa mikopano ya la Sunda kamita; hasamulaho, bakala kufumanehanga kwa mikopano kaufela ya mwahalaa sunda. Bo Linda ni bona bakala kufumanehanga kwa mikopano, mi nihaike kuli nebali mwa lilimo za ma 70, baamuhela tuto ya Bibele, mi hasamulaho bakolobezwa.

9, 10. (a) Ki kabakalañi matrakiti haali abunolo kuitusisa ona? (b) Mutaluse mwakuitusiseza trakiti ya Mubuso wa Mulimu ki Nto Mañi?

⁹ Matrakiti. Lunani matrakiti a 8 eluitusisanga kwa kukalisa puisano ni batu ka bunolo. Kuzwa feela ka nako yelukala kuitusisa ona mwa 2013, kuhatisizwe matrakiti afitelela 5 bilioni! Bunde bwa matrakiti ao kikuli musaziba feela kuitusisa trakiti iliñwi mukaziba mwakuitusiseza kaufelaa ona bakeñisa kuli alukisizwe ka nzila yeswana. Mukona kuitusisa cwañi matrakiti kuli mukalise puisano ni mutu?

¹⁰ Luungeñi kuli mubata kuitusisa trakiti ya Mubuso wa Mulimu ki Nto Mañi? Mubonise mutu yo puzo yeinzi fa likepe la fahalimu, mi mumubuze kuli: “Kana mukile mwaipuza kuli Mubuso wa Mulimu ki nto mañi? Kana muunga kuli ki . . . ?” Hasamulaho, mumubuze kuli naakaketa kalabo ifi kwa likalabo zetaalu zebonisizwe. Kusina kumutaluseza kuli kalabo yafile ilukile kamba haisika luka, muye mwahali fokubonisizwe kuli “Zeibulela Bibele” mi mubale mañolo abonisizwe, ili liñolo la Daniele 2:44 ni Isaya 9:6. Haiba mutu yo ulukuluhile, muzwelepili kuikambota ni yena. Mi sa mafelelezo, mumubonise puzo yefumaneha fa likepe la mafelelezo la trakiti yeo mwatasaa toho ya taba yeli, “Za Kunahanisisa,” mi puzo yeo ili:  “Bupilo bukaba cwañi Mubuso wa Mulimu hauka busa lifasi?” Yeo ikaba yona puzo yemuka nyakisisa fa musipili otatama. Hamuka kutela ku yena, mumulibise kwa tuto 7 ya broshuwa ya Taba Yende Yezwa ku Mulimu!, ili yeñwi ya lihatiso zeluitusisanga kwa kukalisa lituto za Bibele.

11. Limagazini zaluna lilukiselizwe kupetañi, mi luswanela kuzibañi ka za magazini ni magazini?

¹¹ Limagazini. Limagazini za Tawala ya Mulibeleli ni Muzuhe! lihatisizwe ni kutolokiwa mwa lipuo zeñata kufita magazini ifi kamba ifi mwa lifasi kaufela. Bakeñisa kuli libaliwanga ki batu babañata mwa lifasi kaufela, litaba zefumaneha mwateñi lilukisizwe ka nzila yetahisa kuli batu mwa lifasi kaufela batabele kulibala. Luswanela kuitusisa lihatiso zeo kuli lutuse batu kuisa pilu kwa lika za butokwa hahulu mwa bupilo kacenu. Kono kuli lukone kufa limagazini zeo kwa batu babaswanela, luswanela pili kuziba mufuta wa batu beilukiselizwe magazini ni magazini.

12. (a) Magazini ya Muzuhe! ilukiselizwe bo mañi, mi mulelo wayona ki ufi? (b) Ki lika mañi zende zemuikozi hane muitusisa magazini ya Muzuhe! cwanoñu fa?

¹² Magazini ya Muzuhe! ilukiselizwe batu babanani zibo yenyinyani ka za Bibele kamba mane babasa izibi. Batu babacwalo mwendi habazibi sesiñwi ka za lituto za Sikreste, mi mwendi habasepi bulapeli kamba mwendi habazibi kuli Bibele inani litaba zekona kubatusa. Mulelo omutuna wa magazini ya Muzuhe! ki kukolwisa batu kuli Mulimu uteñi luli. (Maro. 1:20; Maheb. 11:6) Hape ilukiselizwe kutusa batu kuba ni tumelo ya kuli Bibele ki “linzwi la Mulimu” luli. (1 Mates. 2:13) Limagazini za Muzuhe! zetaalu za mwa 2018 linani litoho za taba zeli: “Lika Zetahisa Tabo,” “Lika ze 12 Zekona Kutusa Mabasi Kuikola Bupilo,” ni “Zekona Kutusa Babashwezwi.”

13. (a) Magazini ya Tawala ya Mulibeleli ya nyangela ilukiselizwe bo mañi? (b) Ki lika mañi zende zemuikozi hane mufa magazini ya Tawala ya Mulibeleli ya nyangela cwanoñu fa?

¹³ Magazini ya Tawala ya Mulibeleli ya nyangela, italusanga litaba zeiluta Bibele, mi ilukiselizwe batu babakuteka Mulimu ni Linzwi lahae. Nihaike kuli batu bao bakona kuba ni liselinyana ka za litaba za mwa Bibele, habana zibo yenepahezi ya zeiluta Bibele. (Maro. 10:2; 1 Tim. 2:3, 4) Limagazini za Tawala ya Mulibeleli zetaalu za mwa 2018 linani litoho za taba zeli: “Kana Bibele Isakona Kulutusa Kacenu?,” “Ki Lika Mañi Zekaezahala Kwapili?,” ni “Kana Mulimu Wamiisa Pilu?”

14. (a) Mavidio amane abonisizwe fa progilamu ya JW Library mwa kalulo ya lihatiso zeluitusisanga kwa kuluta batu apetañi? (b) Ki lika mañi zende zemuikozi hane mubuhisa mavidio a?

¹⁴ Mavidio. Jesu hanaali fa lifasi, babeti nebaitusisanga feela lisebeliso za mazoho. Kono mazazi a, babeti baitusisanga ni lisebeliso za malaiti zecwale ka lisaha, mishini ya kupunyisa ka yona masuba, mishini ya kukwakulisa mabala, mishini ya kubeisa ka yona limapo ni yemiñwi cwalo. Kwandaa kuba feela ni libuka zehatisizwe, selunani mavidio amande a kubuhisa batu, mi fa progilamu ya JW Library mwa kalulo ya lihatiso zeluitusisanga kwa kuluta batu kubonisizwe mavidio amane, acwale ka: Ki Kabakalañi Ha lu swanela Ku ituta Bibele?, Tuto ya Bibele I Eziwanga cwañi?, Kiñi ze Ezahalanga Kwa Ndu ya Mubuso?, ni Lipaki za Jehova—Ki Luna bo Mañi? Mavidio amañwi akona kutusa hande fa musipili wapili, mi amañwi ona akona kuitusiswa fa musipili wa makutisezo. Mavidio ao ki amande hahulu bakeñisa kuli akona kususueza batu kuituta Bibele ni kufumaneha kwa mikopano yaluna.

15. Mufe mutala obonisa mobakona kutusezwa batu haiba babuha vidio yefumaneha mwa puo yabona.

¹⁵ Ka mutala, kaizeli yomuñwi naakopani ni musali yanaaziba feela puo ya Siyapese yanaatutile kuzwa kwa Micronesia, mi amubonisa vidio ya Ki Kabakalañi Ha lu swanela Ku ituta Bibele?, yefumaneha mwa puo yahae. Vidio hase ikalile kubuhisa, musali yo abulela kuli: “Ki puo yaka ye. Esi mwendi nalola! Mubulelelo wa mutu yo ubonisa kuli uzwa kwa sioli senisimuluha ku sona. Ubulela puo  yaka luli!” Hasamulaho wa kubuha vidio yeo, musali yo asepisa kuli naakayo bala ni kubuha litaba kaufela za fa jw.org zefumaneha mwa puo yahae. (Mubapanye Likezo 2:8, 11.) Halunyakisiseñi mutala omuñwi. Kaizeli yomuñwi wa kwa United States naalumile linki ya vidio yeswana yeo ku mwanaa kaizelaa hae wamushimani yapila kwa naha ya kwahule, ili yefumaneha mwa puo yahae. Mushimani yo abuha vidio yeo, mi añolela kaizeli yo kuli: “Taba yene nikomokisize hahulu ki yebonisa kuli kunani sibupiwa sesimaswe sesimaata sesizamaisa lifasi le. Naikupela tuto ya Bibele.” Mushimani yo upila mwa naha mo musebezi waluna ukwalilwe!

16. Mutaluse mulelo wa broshuwa ya: (a) Muteeleze ku Mulimu mi Mupile Kuya Kuile. (b) Taba Yende Yezwa ku Mulimu! (c) Ki bo Mañi Babaeza Tato ya Jehova Kacenu?

¹⁶ Libroshuwa. Mukona kuluta cwañi niti ku mutu yasazibi hande kubala kamba yasina lihatiso mwa puo yahae? Kunani hatiso yelukona kuitusisa mwa muinelo ocwalo, ili broshuwa ya Muteeleze ku Mulimu mi Mupile Kuya Kuile. * Hatiso yende yelukona kuitusisa kwa kukalisa lituto za Bibele ki broshuwa ya Taba Yende Yezwa ku Mulimu! Mwakona kubonisa mutu litoho za taba ze 14 zebonisizwe kwa mafelelezo a broshuwa ye, mi mumutaluseze kuli akete taba yatabela hahulu. Hasaaketile taba yatabela, mukalise kuituta ni yena mwa taba yeo. Kana mukile mwaitusisa muezezo wo fa musipili wa makutisezo? Broshuwa yabulaalu yeluitusisanga kwa kuluta batu ki broshuwa ya Ki bo Mañi Babaeza Tato ya Jehova Kacenu? Broshuwa ye ilukiselizwe kulibisa baituti baluna ba Bibele kwa kopano ya Mulimu. Kuli muzibe momukona kuitusiseza yona hamuituta Bibele ni mutu, mubone Buka ya Mukopano wa Bupilo Bwaluna Bwa Sikreste ni Bukombwa ya March 2017.

17. (a) Ki ufi mulelo wa buka ni buka yeluitusisanga kwa kuluta batu Bibele? (b) Baituti kaufela babaeza zwelopili mane kufitela bakolobezwa baswanela kuezañi, mi ki kabakalañi?

¹⁷ Libuka. Hase mukalile kuituta ni mutu mwa broshuwa, mwakona kushimbulukela mwa buka ya Bibele Ilulutañi? ka nako ifi kamba ifi. Buka ye ikatusa muituti kuekeza kwa zibo yahae ya lituto za Bibele za makalelo. Hase mufelize kuituta buka yeo ni mutu, mi haiba muituti yo usweli waeza zwelopili, muzwelepili kuituta ni yena mwa buka ya Molukona Kuzwelapili Kubela Mwa Lilato la Mulimu. Buka ye ikatusa muituti kuziba mwakona kusebeliseza likuka za Bibele mwa bupilo bwahae. Muhupule kuli muituti usatokwa kuzwelapili kuituta kusina taba kuli ukolobelizwe, mane kufitela afeza kuituta libuka zepeli zeo. Kueza cwalo kuka mutusa kutiiseza mwa niti.—Mubale Makolose 2:6, 7.

18. (a) Liñolo la 1 Timotea 4:16 lilususueza kuezañi ka kuba baluti ba niti, mi ki lika mañi zekona kuzwa mwateñi? (b) Mulelo waluna uswanela kuba ufi halunze luitusisa lihatiso zeluitusisanga kwa kuluta batu?

¹⁸ Ka kuba Lipaki za Jehova, lufilwe musebezi wa kushaela “lushango lwa niti ya taba yende,” ili loluka tusa batu kufumana bupilo bobusa feli. (Makolo. 1:5; mubale 1 Timotea 4:16.) Ki lona libaka halulukiselizwe lihatiso zeluitusisanga kwa kuluta batu, ilikuli lubatuse kufumana bupilo bobucwalo. (Mubone mbokisi yeli, “ Lihatiso Zeluitusisanga Kwa Kuluta Batu.”) Haike lulike ka molukonela kaufela kuitusisa hande lihatiso ze. Muhasanyi ni muhasanyi wakona kuketa kuitusisa hatiso ifi kamba ifi kwa lihatiso zeluitusisanga kwa kuluta batu haambola ni mutu yatabela, mi wakona kuketa nako yende ya kuitusisa yona. Kono mulelo waluna hauswaneli kuba wa kuabela feela lihatiso kamba kufa lihatiso kwa batu babasa tabeli kuteeleza kwa lushango lwaluna. Mulelo waluna ki kuluta batu kuba balutiwa, ili batu babanani niti, babaikokobeza, ni babatabela kuituta za Mulimu, bona batu “ba lipilu zende bababata bupilo bobusa feli.”—Lik. 13:48; Mat. 28:19, 20.