LUUNGEÑI kuli caziba utatuba siswaniso sesiingilwe ka mushini, ili sesibonisa mayemo a lihalimu. Hanzaa eza cwalo, ulemuha kuli kunani liñungwa leliatumela sibaka sesiñwi mokupila batu babañata. Bakeñisa kuli waiyakatwa bupilo bwa batu, ueza mwakonela kaufela kulemusa batu pili liñungwa lisika taha kale.

Ka mukwa oswana, Jehova usweli kulemusa batu ka za liñungwa lelisabisa hahulu leliatumela, ili lebasika utwa kale batu ku babazibisanga za mayemo a lihalimu. Ueza cwañi cwalo? Mi ki kabakalañi halukona kubulela kuli ufa batu nako yeñata ya kuli baange muhato oswanela? Kuli lualabe lipuzo zeo, halukaleñi ka kunyakisisa litemuso zeñwi zanaafile Jehova kwamulaho.

Mwa linako za litaba za mwa Bibele, Jehova naafile batu litemuso zeshutana-shutana ka za ‘mañungwa’ kamba katulo yanaakafa batu bane batulile milao yahae kabomu. (Liprov. 10:25; Jer. 30:23) Asika bafa kale katulo, naabalemusanga inze kusanani nako, mi naabatalusezanga licinceho zene batokwa kueza kuli bamuutwe. (2 Mal. 17:12-15; Neh. 9:29, 30) Kuli atuse batu kueza licinceho zetokwahala, hañata naaitusisanga batanga bahae babasepahala ba fa lifasi kuzibahaza likatulo zahae ni kubatusa kueza licinceho zeo kapili-pili.—Amo. 3:7.

Nuwe ki yomuñwi wa batanga ba Jehova babasepahala bane baitusisizwe kulemusa batu. Ka lilimo zeñata, Nuwe ka bundume, naalemusize batu bane bapila ka muzamao wa buhule ni bane banani mifilifili ka za Muunda one ukataha. (Gen. 6:9-13, 17) Mi hape naaezize mwanaakonela kaufela kubataluseza zene baswanela kueza kuli bapunyuhe Muunda kuli mane hasamulaho naabizizwe kuli naali “mukutazi wa kuluka.”—2 Pit. 2:5.

Kusina taba ni buikatazo bwanaaezize Nuwe, batu bane bapilile pili Muunda usika taha kale, nebasika utwa temuso yeo yenezwa ku Mulimu. Nebabonisize kuli nebasina tumelo. Kabakaleo, Muunda hane utile, nebashwile mi ‘neu bakukisize kaufelaa bona.’ (Mat. 24:39; Maheb. 11:7) Muunda hase utile, nebasina libaka la kunyaza Mulimu kuli naasika balemusa.

Ka linako zeñwi, Jehova naalemusanga batu nakonyana pili liñungwa la katulo yahae lisika fita kale. Nihakulicwalo, naafanga batu nako yeñata kuli baange muhato. Ka mutala, Jehova naalemusize Maegepita pili asika batahiseza kale Likoto Zelishumi zeneka bawela. Naaezize cwalo ka kuluma Mushe ni Aruni kuli bayo lemusa Faro ni batanga bahae za koto yabu 7, ili yona pula yetuna ya simbwewewe. Kana Mulimu naafile batu nako yelikani ya kufumana makundamo ni kupunyuha pula yeo, hailifo naabafile temuso inze kusiyezi feela lizazi lililiñwi kuli pula yeo inele? Bibele ibulela kuli: “Mutu kaufela kwa batanga ba Faro yanaasabile linzwi la Jehova apakisa kukenya batanga bahae ni limunanu zahae mwa mandu, kono mutu kaufela yanaasika isa pilu kwa linzwi la Jehova atuhelela batanga bahae ni limunanu zahae mwa naheñi.” (Exo. 9:18-21) Kaniti luli, Jehova naafile batu litemuso pili kusanani nako ilikuli bane bakaanga muhato kapili bapunyuhe.

Faro ni batanga bahae ni bona nebalemusizwe pili Mulimu asika batahiseza kale koto yabulishumi. Nihakulicwalo, nebabonisize butoto ka kusautwa temuso yeo. (Exo. 4:22, 23) Kabakaleo, bana babona ba baeli nebashwile. Bo neli bumai luli! (Exo. 11:4-10; 12:29) Kana nebanani nako yeñata ya kuunga muhato? Eni! Mushe naapakisize kulemusa Maisilaele  ka za koto yabulishumi yenetuha itaha, mi naabalaezi zene baswanela kueza kuli bapilise mabasi abona. (Exo. 12:21-28) Ki batu babakai bane bamamezi temuso yeo? Lipatisiso zeñwi libonisa kuli batu bababato eza 3,000,000, ili Maisilaele, hamoho ni “sikopekope sa batu” bane basi Maisilaele, kukopanyeleza cwalo ni Maegepita, nebapunyuhile katulo ya Mulimu mi nebazwile mwa Egepita.—Exo. 12:38; litaluso ze kwatasi.

Sina mose lunyakisiselize, Jehova kamita naafanga batu kolo ya kuunga muhato pili asika tahisa kale katulo yahae. (Deut. 32:4) Ki kabakalañi Mulimu hanaaezanga cwalo? Muapositola Pitrosi naatalusize kuli Jehova “hatabeli kuli mutu ufi kamba ufi atimezwe kono utabela kuli batu kaufela babake.” (2 Pit. 3:9) Kaniti luli, Mulimu waisa pilu batu. Naabata kuli batu babake ni kuli baange muhato pili asika tahisa kale katulo yahae.—Isa. 48:17, 18; Maro. 2:4.

Ni kacenu, batu kaufela baswanela kumamela temuso ya butokwa yesweli kukutazwa mwa lifasi kaufela. Jesu hanaali fa lifasi, naalemusize kuli lifasi lelimaswe le nelika sinyiwa ka nako ya “ñalelwa yetuna.” (Mat. 24:21) Hanaabulela za katulo yeo, naafile bupolofita bone butalusa hande lika zeneka ezahala kwapili ni zene bakaipumana ku zona balateleli bahae nako yeo hainze iatumela. Hamulaho, naabulezi za likezahalo zeneka bateñi mwa lifasi kaufela, ili zelusweli kuiponela kacenu.—Mat. 24:3-12; Luka 21:10-13.

Kono pili ñalelwa yeo isika kalisa kale, Jehova usweli kususueza batu kaufela kuli baiketele kumusebeleza ni kumuutwa. Mulimu ubata kuli batu baba muutwa baikole bupilo bobunde ka nako ya cwale ni kuli bato ikola limbuyoti mwa lifasi lelinca. (2 Pit. 3:13) Jehova ubata kutusa batu kuba ni tumelo mwa lisepiso zahae, mi ueza cwalo ka kubafa lushango lolupilisa. Lushango lo ki ‘taba yende ya Mubuso,’ ili yanaapolofitile Jesu kuli neika “kutazwa mwa lifasi kaufela kuli ibe bupaki kwa macaba kaufela.” (Mat. 24:14) Mulimu uonga-ongile balapeli bahae ba niti kuli bafe “bupaki” kamba lushango lo mwa linaha zefitelela 240. Jehova ubata kuli batu babañata bamamele temuso yeo mi bato punyuha “liñungwa” lelitaha, ili yona katulo yahae yelukile.—Zef. 1:14, 15; 2:2, 3.

Kwaiponahalela hande kuli Jehova wafanga batu nako ya kuunga muhato pili asika fitisa kale katulo yahae. Kono taba ya butokwa ki ye: Kana batu bakautwa temuso ya Mulimu inze kusanani nako? Ka kuba balumiwa ba Mulimu, haike lueze molukonela kaufela kutusa batu babañata kupunyuha mafelelezo a lifasi le.