Bibele ibulela ka kuutwahala kuli Jehova wakona kupolofita zekaezahala kwapili. (Isa. 45:21) Kono haitalusi litaba kaufela ka za mwaezezanga cwalo, faezezanga cwalo, kamba mane nihaiba buñata bwa litaba zaketanga kuziba. Kacwalo, haluzibi litaba kaufela zeama buikoneli bwa Jehova. Nihakulicwalo, kunani litaba lisikai feela zeluziba.

Jehova wakona kueza lika kaufela zabata, kono fokuñwi ukona kuiketela kusaeza lika zeñwi. Bakeñisa kuli unani butali bobutuna hahulu, wakona kuketa kupolofita nto ifi kamba ifi. (Maro. 11:33) Mi bakeñisa kuli unani buiswalo bobutuna hahulu, wakona kuketa kusaziba zekaezahala.—Mubapanye Isaya 42:14.

Jehova utahisanga kuli tato yahae iezahale. Taba yeo iswalisana cwañi ni buikoneli bwahae bwa kupolofita za kwapili? Isaya 46:10 italusa kuli: “Nipolofita mafelelezo a taba isali kwa makalelo, mi kuzwa kwakale, nipolofita lika zesika ezwa kale. Nili: ‘Mulelo waka ukatiya, mi nikaeza senilata kaufela.’”

Kacwalo, libaka leliñwi Jehova hakona kupolofita za kwapili kikuli unani maata akutahisa kuli lika liezahale. Jehova hatokwi kuziba zekaezahala kwapili inge cwalo mutu yakona kubala litaba ze kwa mafelelezo a buka kuli azibe mafelelezo a likande. Kono Jehova wakona kuatula kuli nto yeñwi iezahale ka nako yetomilwe mi kihona akatahisa kuli nto yeo iezahale nako yeo haika fita.—Exo. 9:​5, 6; Mat. 24:36; Lik. 17:31.

Ki lona libaka Bibele haitusisa manzwi acwale ka “niilukisize,” “niiezize,” ni “senilelile,” ili kutalusa zaezanga Jehova ka za likezahalo zeñwi za kwapili. (2 Mal. 19:25; litaluso ze kwatasi; Isa. 46:11) Manzwi ao atolokilwe fa linzwi la mwa puo ya kwa makalelo lelitalusa “mubupi.” (Jer. 18:4) Sina feela mubupi wa sikwala hakona kubupa ndondo yende hahulu fa lizupa, Jehova ni yena wakona kuketa kupeta lika kaufela kulikana ni tato yahae.—Maef. 1:11.

Jehova wakuteka tukuluho ya batu ya kuiketela za kueza. Haasika lukiseleza cimo zekaezahala mwa bupilo bwa mutu ni mutu; mi hatahisangi kuli batu ba lipilu zende baeze lika zekatahisa kuli bayundiswe. Ulumelelize batu kuiketela kupila ka nzila yebatabela, mi ubasusueza kuiketela kupila ka nzila yende.

Halunyakisiseñi mitala yemibeli. Mutala wapili uama batu bane bapila mwa muleneñi wa Ninive. Jehova naapolofitile kuli muleneñi wo neuka yundiswa kabakala bumaswe bone buatile mwateñi. Kono batu ba mwateñi hane babakile, Jehova “acinca muhupulo wahae ka za ziyezi yanaabulezi kuli naaka batahiseza yona, mi naasika itahisa.” (Jona. 3:​1-10) Jehova naacincize muhupulo wahae ka za lika zanaapolofitile, bakeñisa kuli batu ba mwa Ninive nebaitusisize tukuluho ya kuiketela za kueza, kuiketela kubaka hane bautwile lushango lwa temuso lwanaa balumezi Jehova.

Mutala wabubeli ki wa bupolofita bobuama Sirusi, yanaaka lukulula Majuda mwa buhapiwa ni kulaela kuli tempele ya Jehova iyahiwe sinca. (Isa. 44:26–45:4) Mulena Sirusi wa Peresia naatalelelize bupolofita bo. (Ezira 1:​1-4) Nihakulicwalo, Sirusi naasalapeli Mulimu wa niti. Jehova naaitusisize Sirusi kutaleleza bupolofita, kono naasika mupaleliswa kuitusisa tukuluho yahae ya kuiketela za kueza kuli akete yanaaka lapela.—Liprov. 21:1.

Zeo ki lika lisikai feela zanyakisisanga Jehova haapolofita zekaezahala kwapili. Niti kikuli, hakuna mutu yautwisisa ka kutala linzila za Jehova. (Isa. 55:​8, 9) Niteñi, zalupatululezi Jehova litiisa tumelo yaluna ya kuli kamita uezanga lika zelukile—kukopanyeleza cwalo ni hapolofita zekaezahala kwapili.