Kana Bulapeli Bu Ka Tisa Kozo mwa Lifasi?

KUKALA la August 28 ku isa la August 31, 2000, bayemeli ba ba fitelela 500 ba ba zwa mwa linaha ze 73 ne ba kopani mwa New York City. Ne ba kopani hamoho kwa Kopano ya ba Macaba kwa “Mukopano O Mutuna wa Lilimo ze Sikiti wa Kozo ya mwa Lifasi Kaufela wa Babusi ba Bulapeli ni Likeleke.” Buñata bwa babusi bao ne ba apezi likuwani, liapalo ze telele za mubala wa ñandatalukeke, likuwani za mafufa, ni liapalo ze telele ze nsu, mi ne ba yemela bulapeli bo buñata. Ku bona bulapeli b’o ne ku na ni bwa si-Baha’i, si-Buddha, si-Hindu, si-Jain, Sijuda, si-Shinto, si-Sikh, Simozilemu, si-Tao, si-Zoroaster, ni bulapeli bwa Krestendomu.

Bayemeli bao ne ba kopanezi kwa Kopano ya ba Macaba ka mazazi a mabeli kwa mazazi a mane a mukopano w’o. Kono mukopano w’o n’o si ka lifelwa ki Kopano ya ba Macaba. N’o lifezwi ki likopano ze fitana-fitana. Niteñi, babusi ba Kopano ya ba Macaba ni ba bulapeli ne ba bulezi za butokwa bwa ku sebeza hamoho kuli bunjebwe, saluluti sa mubala, matata a maino, lindwa, ni lilwaniso ze tuula batu li feliswe.

Bayemeli bao ba nyatela pampili ye n’e li “Tamo ya ku Yemela Kozo mwa Lifasi Kaufela.” Niha ne ba itumelezi kuli mifilifili ni lindwa “fokuñwi li tahiswanga ka libizo la bulapeli,” mwa pampili yeo ne ku bulezwi kuli be ne ba nyatela bao ne ba ka “swalisana ni Kopano ya ba Macaba . . . mwa ku bata ku tahisa kozo.” Kono ne ku si na likatulo ze nongile ze bonisa mo ne ba ka ezeza cwalo.

Fa lizazi la bubeli, muñoli yo mutuna wa mukopano-tuna w’o, yena Bawa Jain, n’a unguzi manzwi a hae a makalelo ka ku talusa kuli mwa lilimo za kwamulaho, n’a lemuhile kuli ne ku na ni siswaniso se siñwi kwa Kopano ya ba Macaba. Siswaniso seo n’e li sa munna wa butelele bo bu fitelela muyaho wa Ofisi ya Muñoli wa Kopano ya ba Macaba. N’a ngongota fa muyaho w’o inge ya ngongota fa munyako. Kwatas’a siswaniso seo, ne ku na ni pulelo y’e li: “Mulena wa Kozo.” Likwambuyu Jain n’a ize: “[Siswaniso seo] ne si ni amile hahulu ha ne ni si boni. Ne ni buzize batu ba ba fitana-fitana kuli ne [si] talusañi. Cwale kacenu ni li ni fumani kalabo. Kaufela mina ba ba kopani mo, babusi ba bulapeli ni ba likeleke mwa lifasi, mu ni bonisa kuli [ki] mina mulena wa kozo ya ngongota fa munyako wa Kopano ya ba Macaba.”

Bibele ha i bonisi mubonelo w’o. I bonisa kuli Jesu Kreste ki yena Mulena wa Kozo. Ki yena ya ka tahisa kozo mwa lifasi kaufela, isi ka buikatazo bwa babusi ba lifasi ba bupolitiki ni ba bulapeli, kono ka Mubuso wa Mulimu. Ki Mubuso w’o, ee, Mubuso wa Mulimu wa kwa lihalimu, w’o ka swalisanisa batu ba ba utwa ni ku tisa kuli tato ya Mulimu i ezahale fa lifasi-mubu.—Isaya 9:6; Mateu 6:9, 10.