Kana Wo Ki Ona Musebezi O Munde ka ku Fitisisa O Mu Kona ku Eza?

HAIBA mu Bakreste ba ba kolobelizwe, kaniti ze mu ezeza tato ya Mulimu kikuli mwa mu lata. Hape, bukombwa kaniti bu lukela ku ba ona musebezi wa mina o mutuna. Mane, Jesu Kreste n’a file balateleli ba hae kaufela musebezi wa ku tahisa balutiwa. (Mateu 28:19, 20) Ki niti kuli mwendi ka nako ya cwale ye mwa beleka kuli mu ipilise. Kono kakuli mu balateleli ba Jesu mi mu Paki ya Jehova, nto ya pili kikuli mu sikombwa sa Sikreste, y’a nga musebezi wa ku kutaza za Mubuso ku ba nto ya butokwa hahulu mwa bupilo.—Mateu 24:14.

Mwendi se mu nonobokile kamba se mu kwanisize lilimo za kwa makalelo a ma-20 za ku pepwa. Mwendi mu nahanisisize hahulu ka za ze mu bata ku eza mwa bupilo. Ha mu nze mu alakanya ze li teñi ze mu kona ku eza, mwendi sa butokwa hahulu se mu ka tokwa ki ku eza nto ye ka mi kolwisa luli.

Cwale he m’u nge z’a bulela Jørgen wa kwa Denmark ka za keto ya n’a ezize. Jørgen u i talusa kuli ki “bupilo sakata bo bu konisa mutu ku isa pilu kwa musebezi wa butokwa ka ku fitisisa o li teñi.” Eva, musali wa lilimo ze 31 wa kwa Greece, u li: “Ha ni bapisa bupilo bwa ka ni bwa litaka za ka, kamita ni ipulelelanga kuli ki bwa ngana hahulu, bwa ni kolwisa, mi bu tabisa hahulu.” Ki musebezi mañi o kolwisa cwalo? Mu kona ku fumana cwañi ona musebezi o cwalo w’o?

Kana Mulimu Wa Supeza Nzila?

Ku keta za ku eza mwa bupilo ku kona ku ba t’atanyana. Mane, ba bañwi ba kana ba lakaza kuli kambe Mulimu n’a ka ba supeza luli z’a bata kuli ba eze.

Mushe ha n’a li mwa Midiani, Jehova n’a mu laezi kuli a kutele kwa Egepita ku yo zwisa Maisilaele mwa butanga. (Exoda 3:1-10) Lingeloi la Mulimu ne li bonahezi ku Gidioni ya n’a ketilwe ku lamulela Isilaele kwa maswenyeho. (Baatuli 6:11-14) Davida n’a lisa lingu Mulimu ha n’a bulelezi Samuele ku mu toza ili ku mu keta ku ba yena mulena ya tatama wa Isilaele. (1 Samuele 16:1-13) Kacenu ha lu etelelwi cwalo. Ze lu tokwa fela ku eza ki ku alakanya litaba ni ku keta mwa ku itusiseza buikoneli bw’a lu kapwekile Mulimu.

Jehova u kwalulezi mikulwani ba ba li Bakreste kacenu “munyako o mutuna wa musebezi o zwelapili.” (1 Makorinte 16:9) Ka nzila ifi? Mwa lilimo ze lishumi ze felile, palo ya bashaeli ba Mubuso i ekezehile ka palo ye fitelela 2,125,000 kuli cwale mwa lifasi kaufela palo hamoho se i fitelela 6,000,000. Ki bomañi ba ba tusa mwa ku hatisa limilioni za Libibele, libuka, libroshuwa, limagazini, ni matrakiti a tokwahala kwa ku fepiwa kwa moya ni mwa musebezi wa mwa lifasi kaufela wa ku kutaza taba ye nde? Ba ba na ni tohonolo ye munati yeo ki lilama za lubasi lwa fa Betele lwa mwa lifasi lote.

Bupilo Bo bu Fa Munyaka

Betele i talusa “Ndu ya Mulimu.” Mahae a Betele ki libaka ko ba yahile baitateli ba Sikreste ba ba sebeleza kwa sibaka se situna sa tamaiso ni kwa liofisi za mutai za Watch Tower Society. (Genese 28:19) Mabasi a cwale a fa Betele a kana a likanyezwa kwa ‘mandu ao muyahisi wa ona ki butali’ ili a’ lukisizwe hande mi ili a’ tomile fa lilato la ku lata Jehova.—Liproverbia 24:3.

Ku kona ku bulelwañi ka za bupilo bo bu pilwa fa Betele bo bu swana ni bwa mwa lubasi? Silama sa lubasi lwa fa Betele mwa Estonia ili wa lilimo ze 25 u li: “Ni ikola ku ba mwahal’a balikani ba Jehova nako kaufela. Nto yeo ki yona nto ya butokwa hahulu ku na fa Betele.”—Samu 15:1, 2.

 Mwa lifasi kaufela ka nako ye, ibat’o ba b’a 19,500 ba na ni tohonolo ya ku ba mwa sebelezo ya fa Betele. (Samu 110:3) Mwa United States, ibat’o ba licika la ba ba fa Betele ba mwahal’a lilimo ze 19 ni 29 za ku pepwa. Sina Isaya, ba bulezi kuli: “Ki na yo, u lume na!” (Isaya 6:8) Isaya na s’a ineezi kale ku Jehova, mi f’o n’a ifana ku eza sebelezo ye ñwi. Nto yeo ku bonahala ne i talusa kuli n’a tokwa ku itombola lika ze ñwi ze nde za n’a kona ku ba ni zona. Ba ba mwa sebelezo ya fa Betele ba siile mahae a bona ni lika ze ne ba twaezi. Hape ba siile bondat’a bona, bom’a bona, banabahabo, likaizeli, ni balikani. Ba itombola cwalo “kabakala . . . Evangeli.”—Mareka 10:29, 30.

Kono ki limbuyoti kwa bunde za kwa moya ze li teñi fa Betele! Silama wa mwanana wa lubasi lwa fa Betele mwa Russia u talusa kuli: “Ka ku ba ni buitomboli, lu kona ku ituta ze ñata ze ka lu tusa ku pila mwa lifasi le linca. Ku na, limbuyoti za Jehova li fitela kwahule ze ni itombola.”—Malaki 3:10.

Bupilo bwa fa Betele

Bupilo bwa fa Betele bu cwañi? Ba mwa lubasi lwa fa Betele ba lumela kuli bupilo b’o ki bo bunde mi bwa kolwisa, mane bwa tabisa hahulu. Jens, wa lilimo ze 43, u ikola sebelezo ya fa Betele. Libaka? U li: “Ki kabakala ku ikutwa kuli lu na ni kabelo mwa buikatazo bo butuna bwa ku peta musebezi wa butokwa. Ni kona ku lemuha butuna ni butokwa bwa musebezi wa Jehova.”

Ku kala la Mubulo ku isa la Mukibelo, lizazi fa Betele li kalanga ka milapelo ya kakusasana. Yeo ki puhisano ya Bibele, ye okamelwa ki eluda ya yeziseli. La Mubulo manzibwana, ku lukisizwe hora ya kuli lubasi lu itute Bibele ka tuso ya Tora ya ku Libelela. Fokuñwi i latelelwanga ki ngambolo ye tomile fa taba ya ka Mañolo ili ye lukiselizwe sihulu ku tusa lubasi lwa fa Betele.

Ku ezahalangañi mutu h’a taha kwa Betele? Kuli lilama ze nca ba kenyiwe mwa bupilo bwa fa Betele, mizwale ba ba buzwize kwa moya mwahal’a lubasi ba fanga lituto ze talima litaba ze fitana-fitana za sebelezo ya fa Betele. Ka liviki li sikai mwahal’a silimo sa pili, silama yo munca wa lubasi lwa fa Betele u kena sikolo se sinde sa ka viki se si lukiselizwe ku ekeza kwa kutwisiso ya hae ya Mañolo. Lilama ze nca hape ba banga ni tukiso ye ipitezi ya ku bala Bibele. Lilama ze nca za lubasi ba balanga Bibele mutumbi mwa silimo sa bona sa pili mwa sebelezo ya fa Betele.

Lituto zeo kaufela li tusa cwañi? Joshua wa lilimo ze 33 ya li silama sa lubasi lwa fa Betele mwa Hong Kong u alaba kuli: “Betele i tibisize luli buitebuho bwa ka bwa ku itebuha Jehova. Ni kona ku eza sango ni mizwale ba bañata ba ba yeziseli ba ba tandile buñata bwa nako ya bupilo bwa bona inze ba sebeleza Jehova. Sihulu ni ikolanga litukiso za kwa moya, ze cwale ka milapelo ya kakusasana ni Tuto ya lubasi ya Tora ya ku Libelela. Hape, ni lata bupilo bwa fateñi bwa kozo ili bo bu bunolo. Bu ni tusa ku sa ba ni lipilaelo ze kona ku pimiwa. Hape ni ituta ku talima lika ka Sikreste, mi nto yeo i bile ye tusa kamita.”

Lilama za lubasi lwa fa Betele ba itusisanga buñata bwa nako ni buikatazo bwa bona kwa ku eza ze ne ba itatezi ku t’o eza. Ne ba itatezi ku itusisa m’ata ni booko bwa bona kwa ku tokomela sihulu musebezi o ba filwe ku eza fa Betele. Ki lika ze ñata-ñata ze tokwa ku ezwa. Ba bañwi ba sebelisanga mishini ye hatisa kamba ku sebeza ku za ku maneka libuka ze lumelwa kwa liputeho ze ñata. Ba bañwi ba sebeleza mwa litatehelo, licelo, kamba ko ku tapisezwa liapalo. Misebezi ye miñwi ki ku kenisa, ku lima, ku yaha, ni cwalo-cwalo. Ba bañwi ba na ni musebezi wa ku tokomela liitusiso za mwa makolo ao. Ba bañwi ba talima za buikangulo kamba ku sebeza mwa liofisi. Misebezi ya fa Betele kaufela ki mingendenge ye tabisa mi i fa hahulu munyaka. Misebezi ye ezwa fa Betele i kolwisa hahulu sihulu kakuli i yemela litaba ze ama Mubuso mi i ezwa kabakala ku lata Mulimu.

Lilama za lubasi lwa fa Betele ba fiwanga liputeho kwa ku yo kopananga. Kwateñi, ba iponela ka sibili lituso za musebezi wa bona. Ba  ikolanga ku ya kwa mikopano ya puteho ni ku abana mwa musebezi wa ku kutaza. Kabakaleo, lilama za lubasi lwa fa Betele ba fitile fa ku utwana hahulu ni mizwale ni likaizeli ba mwa liputeho za mwa silalanda.—Mareka 10:29, 30.

Rita, ya li silama sa lubasi lwa fa Betele mwa Britain, u li: “Ni itebuha hahulu puteho! Ha ni li kwa mikopano hamoho ni mwa bukombwa, ni tiyanga hahulu mwa tumelo ku bona teñi mizwale, likaizeli, banana, ni basupali ba ba lateha! Ba banga teñi ku be cwañi kamba cwañi. Nto yeo i ni tusanga ku tukufalelwa hahulu sebelezo ya ka ya fa Betele.”

Haki kuli ze ezwa fela fa Betele ki ku sebeza, ku ya kwa mikopano, ku ya mwa sebelezo ya mwa simu, ni ku ituta. Lubasi lu banga ni linako za ku ishumusa. Fokuñwi, ku banga ni “Manzibwana a Lukiselizwe Lubasi” a’ tabisa mi ili a’ tusa kwa moya. Nako yeo i fanga kolo ya ku ikola ku ziba miinelo ni mibonelo ya ba bañata ni ku ziba lika ze susueza ka za bupilo bwa ba bañwi ba ba sebeleza fa Betele. Ze ñwi ze tabisanga ki ku potelana ko kunde ili ko ku yaha. Ku kana kwa lukiswa libaka kwa ku ezeza lipapali ze tiisa mibili, hamoho ni lifalana za libuka ze tusa ku za ku bala ka butu ni ku eza patisiso. Mi nto ye ñwi ye sa koni ku libalwa ki lingambolo ze munati ze banga teñi ka nako ya ku ca ili fa litafule za mwa licelo.

Tom ya li silama sa lubasi lwa fa Betele mwa Estonia, u li: “Bukaufi ni Betele ku inzi liwate. Mi hape fakaufi ku na ni mushitu o munde ko ni yo tambalanga ni musal’a ka. Hape fokuñwi ni bapalanga papali ya ngofu (golf), ya mufuta wa ñoma (hockey), ni tenesi (tennis). Zeo ni li bapalanga ni balikani ba mwa puteho ni fa Betele. Mi haiba miinelo ya za mbyumbyulu i lumeleza, lu y’o cobanga linjinga za luna.”

Mu Kona ku Ezañi Kuli Mu Kone ku Amuhelwa?

Luli, Betele sihulu ki sibaka k’o Bakreste ba ba hulile kwa moya ba ezeza Jehova sebelezo ye kenile ni ku sebeleza balumeli ba bañwi mwa  lifasi kaufela. Ba ba ba mwa lubasi lwa fa Betele ba lukela ku kwanisa litokwahalo ze ñwi. Mu kona ku ezañi kuli mu kone ku amuhelwa fa Betele?

Sina Timotea ya n’a sebelize ni muapositola Paulusi, ba ba amuhelwa ku taha fa Betele ba lukela ku ba ni mayemo a mande mwa puteho. (1 Timotea 1:1) Timotea “n’a pakwa ki balumeli ba ba mwa Listra ni Ikone.” (Likezo 16:2) Nihaike kuli n’a sa li mwanana, Timotea n’a ziba Mañolo mi n’a tomile hande mwa niti. (2 Timotea 3:14, 15) Ba ba amuhelwa fa Betele ni bona ba lukela ku ba ba ba ziba Bibele.

Lilama za lubasi lwa fa Betele ba tokwa ku ba ni moya wa buitomboli. Moya wa buitomboli wa Timotea ni buitateli bwa hae bwa ku beya litaba za Mubuso kwapil’a litakazo za hae ne li bonahezi hahulu kuli mane Paulusi n’a kona  ku bulela ka za hae kuli: “Ha ni na wa bubeli, konji yena, wa pilu ye swana sina ya ka, ka ku tokomela za mina. Kaufela ba ipatela za bona, isi za Jesu Kreste. Mu ziba kuli ku sepahala kwa hae ku bonahalile ha n’a sebelize ni na za Evangeli, sina mwana ya tusana ni Ndat’ahe.”—Mafilipi 2:20-22.

Sebelezo ya fa Betele i tokwa banna ni basali ba ba lata za kwa moya. Litukiso ze ezelizwe ba mwa lubasi lwa fa Betele li ba konisa ku hula kwa moya ka tuto ya Bibele, ka ku yanga kamita kwa mikopano ya Sikreste ni mwa bukombwa bwa mwa simu, ni ka ku eza sango ni Bakreste ba ba buzwize. Kacwalo ba ba fa Betele ba tusiwa ku mamela kelezo ya Paulusi ye li: “Mu zamaye cwalo ku [Kreste Jesu], mu nze mu tibisa mibisi ku yena, mu tomwa ku yena, mu tiye mwa tumelo, mo mu lutezwi, mu nze mu tezi buitumelo.”—Makolose 2:6, 7.

Bakeñisa mo u inezi musebezi wa fa Betele, ba ba amuhelwa mwa sebelezo ye nde yeo ba lukela ku ba ba ba tiile ili ba mibili ye iketile hande. Haiba mwa kwanisa litokwahalo ze lu bulezi, mi mu ba lilimo ze 19 kamba ku fitelela, mi hape haiba se ku fitile nihaiba silimo ku zwa fo ne mu kolobelizwe, lu mi susueza ku nahana za sebelezo ya fa Betele.

Kaufel’a Luna Lu Na ni Sa ku Eza

Ka ku ba Bakreste, kaniti kaufela luna lu lakaza ku eza pili za Mubuso mwa bupilo bwa luna ni ku sebeleza Jehova ka moyo kaufela. (Mateu 6:33; Makolose 3:23) Lwa kona ni ku susueza ba ba fa Betele kuli ba zwelepili ku ezeza teñi sebelezo ye kenile. Mi sihulu mizwale ba micaha ba ba kwanisa ze tokwahala za ku ba mwa sebelezo ya fa Betele ba susuezwa ku satalalela tohonolo yeo ye munati.

Sebelezo ya fa Betele ki sebelezo ye kolwisa kwa moya, ili ye kona ku ba ona musebezi o munde ka ku fitisisa ku mina. Kona mw’a bu ngela Nick cwalo. Nick n’a kalile ku sebeleza fa Betele ha n’a na ni lilimo ze 20. S’a bile mwa sebelezo ya fa Betele ka lilimo ze lishumi, mi u li: “Ni lapelanga hañata ku Jehova ili ku itumela ku yena kabakala sishemo sa hae se si si ka libelelwa. Ki lifi ze ñwi ze ni kona ku bata? Kwanu, lu pila ni Bakreste ba ba sepahala ba ba eza mo ba konela kaufela mwa ku sebeleza Jehova.”

[Mbokisi/Siswaniso se si fa likepe 22]

KI LIFI ZE BA KONA KU EZA MAELUDA NI BASHEMI?

Maeluda ni baokameli ba maeto sihulu ba swanela ku susueza micaha kuli ba kupe ku ya kwa Betele. Cwanoñu fa, patisiso ye n’e ezizwe fela ye ama mikulwani mwa lubasi lwa fa Betele ne i bonisize kuli 34 pesenti ya bona ne ba susuelizwe sihulu ki baokameli ba Sikreste ku toma sikonkwani sa ku ya kwa Betele. Ki niti kuli ba kana ba tondiwa ki liputeho za habo bona. Kono ki hande ku hupula kuli hailif’o Timotea kaniti n’a file mutala o munde kwa mikulwani ba bañwi mwa Listra ni Ikone, maeluda teñi k’o ne ba si ka mu tibela ku y’o sebeza hamoho ni Paulusi. Ne ba si ka nahana kuli ku tuhelela Timotea ku y’o sindeketa muapositola y’o ne ku ka tisa kuli puteho ya habo bona i luze hahulu.—1 Timotea 4:14.

Sihulu bashemi ba Sikreste ba swanela ku bata ku ba susuezo ye nde kwa bana ba bona mwa taba ye. Mwa patisiso ye sa z’o bulelwa, 40 pesenti ya be ne ba buzizwe ne ba ize bashemi ba bona ne li bona be ne ba ba susuelize hahulu ku kena sebelezo ya fa Betele. Kaizeli yo muñwi ya s’a sebelelize fa Betele ka lilimonyana n’a ize: “Bupilo bwa bashemi ba ka mwa sebelezo ya Jehova ne li susumezo ye m’ata ye ne i ni susumelize ku kena sebelezo ya fa Betele. Ka ku bona mutala wa bona mwa bukombwa bwa nako ye tezi, ne ni zibile fela kuli bupilo b’o neikaba bona bo bunde ka ku fitisisa ku bu keta ili bo bu kolwisa hahulu luli.”

[Mbokisi fa likepe 24]

BA ITEBUHA SEBELEZO YA FA BETELE

“Na itebuha hahulu sebelezo ya ka fa Betele. Kwa kolwisa ku ziba kuli ni sebelelize Jehova lizazi mutumbi ni kuli ni ka eza nto ye swana kamuso, kamuso o muñwi, ni cwalo-cwalo. Nto yeo i ni fa lizwalo le linde mi i taza munahano wa ka ka mihupulo ye minde.”

“Betele ki sibaka k’o mutu a kona ku feleza nako ni m’ata a hae kaufela mwa sebelezo ya Jehova ku si na ku hakanyiswa. Nto yeo i nyakalalisa pilu. Kono hape mutu u kona ku bona kopano ya Jehova ka mubonelo u sili. U ikutwa ku ba fakaufi hahulu ni mutomo wa kopano yeo, mi nto yeo i tahisa nyakalalo luli.”

“Ku taha fa Betele ki yona nto ye tuna ka ku fitisisa ye ezahalile mwa bupilo bwa ka. Kwanu, lituto ha li feli. Mi kwanu lituto haki za ku pahamisa na, kono Jehova. Kwanu misebezi ya ka ha i na ku ba ya mbango ni kamuta.”

“Ku itusisa buikoneli bwa ka fa Betele ku ni fa mwangalwa ni kozo mwa pilu kakuli bu itusiswa kwa ku sebeleza Jehova ni mizwale.”

“Musebezi o ne ni eza kwamulaho n’o si ka ni kolwisa ni ku ni tabisa. Ka lilimo-limo ne ni nahana za ku sebeza ni mizwale ni likaizeli hamoho ni ku ba sebeleza. Kona libaka ha ne ni tile kwa Betele. Ni nyakalala hahulu ku ziba kuli buikatazo bwa ka kaufela bu ka tusa ba bañwi kwa moya ni ku lumbekisa Jehova.”