Muzeko Ka Za Zuho Ya Jesu

“Na kona ku mi taluseza patalaza kuli niha lu kona ku kolwa luli kuli Jesu n’a pilile . . . , ha lu koni ku bulela ka buikolwiso bo bu swana kuli lwa ziba kuli N’a zusizwe kwa bafu ki Mulimu.” Kona mwa n’a taluselize yo muhulu wa bulapeli bwa Church of England, ili Yo muhulu wa mabishopu mwa Canterbury.

MUAPOSITOLA Paulusi wa Sikreste yena n’a sa hononi ka za taba yeo. Mwa kauhanyo 15 ya liñolo la hae la pili le li buyelezwi la n’a ñolezi Bakreste ba mwa Korinte wa kwaikale, Paulusi n’a ñozi kuli: “Pili ku ze ñwi, ni mi file se ni amuhezi ni na: Kikuli Kreste u shwile kabakala libi za luna, mo ku ñolezwi mwa Mañolo; ni kuli u kile a patwa, mi a zuha ka lizazi la bulalu, mo ku ñolezwi mwa Mañolo.”—1 Makorinte 15:3, 4.

Ne li tumelo mwa zuho ya Jesu Kreste ye n’e susuelize balateleli ba hae ku kutaza za Evangeli mwa naha ya Magerike ni Maroma—“ku ba ba li teñi kaufela mwatas’a lihalimu.” (Makolose 1:23) Mane, zuho ya Jesu ki ona mutomo tota wa tumelo ya Sikreste.

Nihakulicwalo, ku zwa kwa makalelo luli, ba bañata ha ba si ka kolwa ni ku lumela kuli zuho ya Jesu ne i bile teñi. Kwa Majuda ka nañungelele, ne li bunyefuli balateleli ba Jesu ku bulela kuli munna ya na kokotezwi y’o ne li yena Mesiya. Mi Magerike ba bañata be ne ba itutile, ili be ne ba na ni tumelo ya ku sa shwa kwa moyo, ku bona muhupulo wa zuho ya bafu ne li fela nto ye nyenyisa.—Likezo 17:32-34.

Bahononi Ba Cwale

Mwa lilimo za cwanoñu fa, baituti ba ba ipala ku ba Bakreste se ba hatisize libuka ni litaba ze ñozwi ili ku bonisa kuli zuho ya Jesu ki litangu. Hape se ba kalisize kañi ye tuna ka za yona taba yeo. Mwa patisiso ya bona ka za “Jesu wa kwaikale,” baituti ba ba fitana-fitana ba kananisana kuli litaba za Evangeli ka za libita la mukungulu ni za ku bonahala kwa Jesu hamulaho wa ku zuha kwa hae ki matangu fela. Ba li ki matangu a n’a ikupulezwi hamulaho wa nako ye telele ku zwa fa lifu la hae ka ku yemela litaba za m’ata a hae a kwa lihalimu.

Ka mutala, m’u nge mubonelo wa muituti wa mu-German ya bizwa Gerd Lüdemann, ya li caziba wa Testamente Ye Nca mi hape yo a li muñoli wa buka ya What Really Happened to Jesus—A Historical Approach to the resurrection. U talusa kuli zuho ya Jesu ki “sikuka se si si na mutomo” ili seo mañi ni mañi ya kumalezi kwa “mubonelo wa sayansi kwa lifasi” a lukela ku ambuka.

 Caziba Lüdemann u tiiseza kuli Jesu ya n’a zuhile kwa bafu ili yo n’a bonahezi ku muapositola Pitrosi ne li pono fela ye ne tisizwe ki ku eshulwa ki masitapilu ni maswabi kwa Pitrosi kabakala kuli n’a latuzi Jesu. Mi ka ku ya ka Lüdemann, ku bonahala kwa Jesu kwa buñata bwa balumeli b’a 500 ka nako ye swana ko ne ku ezahezi ne li fela “sinyakanyaka sa buñata.” (1 Makorinte 15:5, 6) Ka bukuswani, buñata bwa baituti ba bonisa kuli litaba za Bibele ka za Jesu ya n’a zuhile kwa bafu ki mihupulo fela ya ze n’e ezahezi ili ye ne i ezisize balutiwa ku ikutwa ku uncafazwa mwa buikolwiso bwa za kwa moya ni ku ba ni cisehelo ku za bulumiwa.

Ki niti, buñata haki ba ba isa hahulu pilu kwa mizeko ya bucaziba. Nihakulicwalo, puhisano ka za zuho ya Jesu i lukela ku iswa mamelelo ki luna kaufela. Ki kabakalañi? Kakuli haiba n’a si ka zusiwa, Bukreste kanti bu yemi fela fa mutomo wa buhata. Kwa neku le liñwi, haiba zuho ya Jesu ki taba ye ezahezi luli mwa litaba za kwamulaho, u zibe Bukreste bu tomile fa niti. Haiba ku cwalo, buipapato ni lisepiso za Kreste ki ze lukile. Hape, haiba ku na ni zuho, lifu haki mutuli yo mutuna kono ki sila se si konwa ku fenyiwa.—1 Makorinte 15:5.

[Manzwi a bañi ba siswaniso fa likepe 3]

Ku Zwelela mwa Self-Pronouncing Edition of the Holy Bible, ye kopanyeleza King James version ni Revised version