Mwa ku Talimanela Ni Maikuto A Ku Zwafa

● Asafi n’a bilaezi kuli: “Luli, ni kenisize pilu ya ka fela, mazoho a ka, ni a tapisize fela ku a tokwisa mulatu. Kakuli ni natiwa lizazi kaufela, mi kakusasana, ka zazi ni zazi, ni fiwa koto.”—Samu 73:13, 14.

● Baraki n’a tongile kuli: “Na, ni na ni bumai, kakuli [Muñ’a] Bupilo u ekelize maswabi kwa butuku bwa ka; ni katezi ku tonga, ha ni boni pumulo.”—Jeremia 45:3.

● Naomi na lilokile kuli: “Ya-Mata-Kaufela u ni ezize ka mukwa o babisa hahulu. Ni ile ni li ya ipelize, kono [Muñ’a] Bupilo u ni kutisize ni sina se siñwi; mu sa ni bizezañi Naomi, kanti [Muñ’a] Bupilo u ni tamile litaba, mi Ya-Mata-Kaufela u ni tahiselize maswabi?”—Ruti 1:20, 21.

BIBLE i na ni mitala ye miñata-ñata ya balapeli ba ba sepahala ba Jehova ili bao ka linako ze ñwi ne ba fenyizwe ki maikuto a ku zwafa. Buniti ki bwa kuli kaufela luna ka ku ba batu ba ba si ka petahala lu tahelwanga ki maikuto a cwalo ka linako ze ñwi. Ba bañwi ku luna mwendi ba sabelelwa hahulu ki ku zwafa ku fita ba bañwi. Ba ba cwalo mwendi mane hape ba kona hahulu ni ku ishwela makeke. Ba kona ku ba cwalo mwendi kabakala kuli ba kile ba ipumana mwa miinelo ye maswe.

Nihakulicwalo, maikuto ao haiba a tuhelelwa a kona ku sinya swalisano ya mina ni ba bañwi hamohocwalo ni Jehova Mulimu. Musali yo muñwi wa Sikreste ya n’a i shwelanga hahulu makeke n’a lumezi kuli: “Ne ni hananga limemo ze ñata za kwa likezahalo za ku itabisa bakeñisa kuli ne ni ikutwanga kuli ha ni mulikani ya butokwa ku ba ba li mwa puteho.” Maikuto a cwalo luli a kona ku tataula bupilo bwa mutu. Ki sifi se mu kona ku eza ili ku a lwanisa?

Mu Sutelele ku Jehova

Kwa Samu 73, Asafi n’a ñozi ka ku nonga ka za ku zingeha kwa hae. Ha n’a bapanyize bupilo bwa hae kwa bupilo bwa ba ba maswe bo ne bu kondile, a ba shwela muna. Na lemuhile kuli be ne ba sa sabi Mulimu ne ba ikuhumusa mi ne ba li ba mifilifili, mi ne ba bonahezi ku sa fiwa koto. Asafi a bonisa ku honona ka za butokwa bwa ku ndongwama kwa hae nzila ye lukile mwa bupilo.—Samu 73:3-9, 13, 14.

Sina Asafi, kana se mu lemuhile ku kondisa ko ku iponahaza kwa ba ba maswe ili ba ba sa pati likezo za bona ze maswe? Asafi na konile cwañi ku tula maikuto a hae a ku zwafa? U zwelapili kuli: “Kiha ni kengeela litaba zeo, kuli ni li utwiseze, kono za ni ziyeza hahulu; ku fitela ha ni kena mwa Sibaka se si kenile sa Mulimu, mi na lemuha ko ba y’o felela batu bao.” (Samu 73:16, 17) Asafi n’a ngile mihato ye minde ka ku lapela ku Jehova. Ka ku itusisa manzwi a n’a kile a itusiswa ki muapositola  Paulusi, lu kana lwa bulela kuli Asafi a hatelela “mutu fela” ka ku zusa “mutu wa moya” ku ili yena. Ka pono ya kwa moya ye uncafalizwe, n’a utwisisize kuli Jehova u toile bumaswe ni kuli ba ba maswe ba ka fiwa koto ka nako ye lukela.—1 Makorinte 2:14, 15.

Ku butokwa luli kuli mu lumeleze Bibele ku mi tusa ku isa pilu kwa muinelo o buniti wa bupilo. Jehova u lu hupulisa kuli wa bona ze ba eza ba ba maswe. Bibele i luta kuli: “Mu si ke mwa ipuma, Mulimu h’a somiwi; kakuli s’a cala mutu, ki sona s’a ka kutula . . . Lu si ke lwa katala ku eza hande.” (Magalata 6:7-9) Jehova u ka beya ba ba maswe “mwa mabaka mo ku telela”; u ka ba “wiseza fafasi ku ba yundisa.” (Samu 73:18) Kwa mafelelezo, katulo ya Mulimu ye lukile i ka fitiswa.

Tukiso ye zwelapili ya ku fepiwa kwa moya fa tafule ya Jehova ni swalisano ye nde ni batu ba Mulimu i ka mi tusa mwa ku tiisa tumelo ya mina ni ku felisa ku zwafa kamba maikuto a mañwi a maswe. (Maheberu 10:25) Sina Asafi, mwa kona ku fumana tuso ya Mulimu ye lilato ka ku ina bukaufi ni yena. Asafi u zwelapili kuli: “Ni inzi ni Wena kamita; u ni sweli ku la ka la bulyo. U ka ni zamaisa ka kelezo ya hao, mi kwapili u ka ni amuhela mwa kanya.” (Samu 73:23, 24) Mukreste yo muñwi y’a kile a nyandiswa kwa bwanana na zibile ku nepahala kwa manzwi ao. N’a bulezi kuli: “Ku swalisana hahulu ni puteho ne ku ni bonisize kalulo ye ñwi ya bupilo. Ne ni iponezi hande kuli maeluda ba Sikreste ba na ni lilato, ni kuli ne ba si mapolisa kono ki balisana.” Ee, maeluda ba Sikreste ba ba mufelañeke ba peta kalulo ye tuna mwa ku felisa maikuto a sinya.—Isaya 32:1, 2; 1 Matesalonika 2:7, 8.

Mu Amuhele Kelezo ya Jehova

Baruki, muñoli wa mupolofita Jeremia, n’a bilaezi bakeñisa masitapilu a n’a tiswa ki musebezi wa hae. Nihakulicwalo, Jehova a toma mamelelo ya Baruki fa taba ya luli. “Kikuli wena u ka ipatela linto ze tuna? U si ke wa ipatela zona, kakuli ni ka tiseza batu kaufela bumaswe, ku bulela [Muñ’a] Bupilo; kono ni ka ku fa bupilo bwa hao, ibe mbuya ya hao, mwa mabaka kaufela m’o ka ya.”—Jeremia 45:2-5.

Ka mubulelelo o nongile luli, Jehova n’a talusize kuli lindongwamo za buitati za Baruki ki zona ze ne li tahisize ku zwafa kwa hae. Baruki n’a si ke a kona ku fumana tabo mwa musebezi wa hae wa n’a filwe ki Mulimu, inge a ipatela linto ze tuna ka nako ye swana. Ni mina ne mu kana mwa fumana kuli se sinde luli ku si eza kuli mu felise ku zwafa ki ku pima ze yembulula ni ku amuhela kozo ya munahano ye zwa kwa buikolwiso bwa silumeli.—Mafilipi 4:6, 7.

Naomi wa mbelwa n’a si ka lumeleza masitapilu ku mu kutiseza mwamulaho muta munn’a hae ni bana ba hae ba babeli ne ba timezi  mwa Moabi. Nihakulicwalo, ku boniswa kuli ka nakonyana n’a utwile bumaswe ka za muinelo wa hae ni wa makwenyan’a hae ba babeli. Ha n’a ba kupa kuli ba kutele habo bona, Naomi a bulela kuli: “Ni swabile hahulu bakeñisa mina, kakuli lizoho la [Muñ’a] Bupilo li ni linduzi.” Ha n’a fitile mwa Betelehema hape a tiiseza kuli: “Mu si ke mwa ni biza Naomi, (Ya Tabisa); kono mu ni bize Mara (Ku baba), kakuli Ya-Mata-Kaufela u ni ezize ka mukwa o babisa hahulu.”—Ruti 1:13, 20

Niteñi, Naomi na si ka ikambusa ku Jehova ni batu ba hae ka ku zwelapili mwa maswabi. Ha n’a li mwa Moabi, n’a utwile kuli “[Muñ’a] Bupilo u potezi sicaba sa hae, mi u si file lico.” (Ruti 1:6) N’a utwisisize kuli se sinde ka ku fitisisa ne li ku yo ina ni batu ba Jehova. Hamulaho Naomi a kutela kwa Juda ni mukwenyan’a hae Ruti, mi ka bucaziba a etelela Ruti ka mwa n’a ka yo ezeza ku Boazi, wahabo bona.

Ka ku swana kacenu, basepahali ba ba shwezwi ki bosinyalana ni bona ba sweli ku talimana hande ni masitapilu ka ku ba ba ba patehile mwa puteho ya Sikreste. Sina Naomi, ba tukufalelwa litaba za kwa moya, ili ku bala Linzwi la Mulimu ka zazi.

Lituso Ze Zwa mwa ku Sebelisa Butali bwa Silumeli

Litaba za Bibele zeo li fa yeloseli ka za mo mutu a kona ku talimanela ni ze tahiswa ki maikuto a ku zwafa. Asafi n’a batile tuso kwa ndu ya Jehova mi a libelela ku Jehova ka pilu-telele. Baruki n’a amuhezi kelezo ni ku pima ku lyanganiswa ki ku lata sifumu. Naomi n’a zwezipili ku sebeza mwahal’a batu ba Jehova, ili ku lukiseza kalibe Ruti za matohonolo a ku lapela Mulimu wa niti.—1 Makorinte 4:7; Magalata 5:26; 6:4.

Mwa kona ku felisa ku zwafa ni maikuto a mañwi a maswe ka ku toma fa tulo ya bumulimu ili yeo Jehova a file batu ba hae, ka buñwi ni ka ku ba sikwata. Kuli mu eze cwalo, mu yeye fa ponahazo ye ipitezi ya lilato la Jehova mwa ku mi fa tiululo. Mu itebuhe lilato la niti la sizwale sa Sikreste. Mu tome fa bupilo bwa mina bwa mwa lifasi le linca la Mulimu le li ka tuha li taha. Mi haike mu alabe sina Asafi kuli: “Ku Mulena [Muñ’a] Bupilo, ki ko ni sabela, kuli ni bulele za misebezi ya hao kamukana.”—Samu 73:28.