“Ncwa ye Lubeta ye Sa Lemusehi kwa Nyangela”

PATISISO ya cwanoñu fa ya za tobali ya fa kompyuta i patuluzi kuli batu ba bahulu ba ba fitelela 200,000 mwa United States ba ba itusisa Intaneti se ba alungutile likalulo za Intaneti fo ku na ni za tobali. Batu ba bañata-ñata cwale se ba sweli ku eza buhule ku itusisa Intaneti. Muituti wa za minahano ya batu ya bizwa Dr. Al Cooper, ya n’a ezize patisiso yeo, u li: “Nto yeo ki ncwa ye lubeta ye sa lemusehi ili ye se i ata kakuli ki b’a sikai ba ba lemuha kuli ki ye lubeta kamba ba ba sa i’ngi ku ba nto ya lishea.”

Ki bomañi sihulu ba ba kona ku yembululwa ka bunolo ki yona tobali ya fa Intaneti ye cwalo? Dr. Cooper u li: “Ki baitusisi bao takazo ya bona ya tobali ne i hatelezwi mwa bupilo bwa bona kaufela” kono “ka sipundumukela se ba kona ku ikenya ku za tobali ka mo ba latela kaufela” fa Intaneti.

Kono buñata bwa ba ba alungutanga likalulo zeo za Intaneti fo ku na ni tobali ba li ku eza cwalo haki ko ku lubeta. Kana luli ku cwalo? Sina fela mutu h’a ngongwelwa ki milyani ye kola, ba bañata be se ba twaezi za tobali ya fa Intaneti ba batanga ku kolwisa lishuke la bona ka ku ikenya hahulu ku za tobali fa Intaneti. Mane, ba kona ku beya musebezi ni linyalo la bona mwa lubeta!

Kono ba ba bata ku tabisa Mulimu luli ba swanela ku pima ku alunguta likalulo za fa Intaneti ze ama tobali. Linzwi la Mulimu li eleza kuli: “Kifo, mu bulaye lilama za mina ze mwa lifasi, kikuli buhule ni ze masila, ni maikuto a maswe, ni litakazo ze maswe, ni takazo ya ku fuma ili nto ye swana sina sebelezo ya milimu; kakuli buhali bwa Mulimu bu taha kabakala zeo.” (Makolose 3:5, 6) Kuli mutu a ‘bulaye lilama za hae’ ka za takazo ye masila ya za tobali, u tokwa ku ba ni lilato le lituna la ku lata Jehova Mulimu. (Samu 97:10) H’a ipumana kuli u yembuluzwi ki ncwa ye lubeta ya tobali ya fa Intaneti, u lukela ku tiisa lilato la hae la ku lata Jehova ka ku ituta Linzwi la Mulimu, yona Bibele. Ku eza sango se sinde ni Lipaki za Jehova kwa Ndu ya Mubuso ku kona ku tusa hahulu mutu kuli a tiise tundamo ya hae ya ku tabisa Mulimu.