Swalisano ya mwa Lifasi Kaufela ya Batu Ba Ba Babalelana

KO LI kona ku bona liito kaufela, ku na ni batu. Buñata ki basupali, ili bao ba bañwi ku bona se ba fokozi hahulu kuli mane ba fumana butata bwa ku zamaya. Ku na ni baima ni bo sinyalana ba banca ba ba na ni bana ba banyinyani ba ku babalela. Kaufela bona ki babalehi—banna, basali, ni banana—ba ba hapelelizwe ku tunuha mwa mahae a bona ni ku balehela mwa naha y’e li mabapa. Ba hapelelizwe ku eza cwalo ki ndwa ya mwahal’a bayahi ba naha, likozi za ka taho, kamba likezahalo ze ñwi. Ba bañwi se ba hapelelizwe ka ku kuta-kutela ku zwa mwa libaka mo ba pila. Ha ba bona sisupo sa pili sa maefe-efe mwa naha ya bona kamba sa likozi za ka taho, ba pamula libyana li sikai za mwa ndu, b’a nga bana ba bona, ni ku liba kwa sibaka se si si na butata. Hasamulaho, miinelo ha i kutela ku ba ye minde, babalehi ba bañata ba kutela ku yo yaha sinca mandu a bona ni ku kalisa sinca bupilo.

Mwahal’a lilimo-limo, Central African Republic se i amuhezi babalehi ba ba zwa kwa linaha li sikai. Cwanoñu fa, likiti-kiti za batu, ku kopanyeleza cwalo ni buñata bwa Lipaki za Jehova, ne ba tamehile ku baleha mwa naha ya Democratic Republic of Congo m’o ndwa i sweli ku kolota, ku liba kwa Central African Republic ko ku na ni buiketonyana.

Mizwale Ba Tusa Ba Ba mwa Butokwi

Lipaki ba mwa Central African Republic ne b’a ngile kuli ku onga-onga lituso ki tohonolo. Mizwale ba Sikreste be ne ba taha ne ba lukiselizwe mafitelo. Pili, ne ba lukiselizwe mizuzu mwa mandu a batu, kono palo ya babalehi ha n’e nze hula, kwa bonahala kuli litukiso za ngana ni ku fita ne li na ni ku eziwa. Mandu a Mubuso a mañwi a fetulwa ku ba mandu a malobalo. Lipaki ba mwa silalanda ba ifana mwa ku eza musebezi wa ku ekeza kwa malaiti, ku beya mapaipi a mezi, ni ku beya bulilo fa lindandulo ili ku lukiseza be ne ba filwe ku lobala teñi. Babalehi ne ba belekisana hamoho ni mizwale ba mwa silalanda mwa ku toma ona mandu a malobalo a swalelele ao. Tukiso ye tezi ya mikopano ya Sikreste ne i ezizwe mwa puo ya Lingala ilikuli ba ba taha ba fiwe sico sa kwa moya se si fa bupilo. Swalisano ye tezi mwahal’a Lipaki ba mwa silalanda ni baenyi ba bona ne i bonisize kuli sizwale sa mwa linaha kaufela ki nto ya luli.

Mabasi a babalehi fokuñwi n’a sa fitangi hamoho. Fokuñwi, lilama za lubasi be ne ba kauhanyizwe  ne ba kopanelanga sinca kwa sibaka sa bona sa mafitelo. Mukoloko wa be ne ba fita hande ne u bulukiwa fa Ndu ya Mubuso ye ñwi ni ye ñwi. Litukiso ne li eziwa za ku bata be ne ba li siyo. Ofisi ya mutai ye etelela musebezi wa Lipaki za Jehova mwa naha ne i lukulula limota ze talu ka zazi ili ku tusa Lipaki be ne ba sa li mwa nzila ni ku bata be ne ba ka na ba latehile. Limota zeo ne li zibahala ka muñolo o mutuna o n’o ñozwi ku zona, o li “WATCH TOWER—Jehovah’s Witnesses.”

Mu nahane tabo ye n’e bile teñi muta sikwata sa banana ba babalehi ba 7 be ne ba kauhanyizwe kwa bashemi ba bona ha ne ba boni mota ye n’e li ya Lipaki za Jehova. Ka bubebe-bebe ba matela kwa mota ni ku yo itibahaza kuli ki Lipaki. Mizwale ba ba longa mwa mota ni ku ba isa kwa Ndu ya Mubuso, ili ko kwa nalule-lule ba yo kopana sinca ni mabasi a bona.

Ki sika mañi se si konisize Bakreste ba ba sepahala bao ku talimana ni miinelo ye cwalo, isi hañwi fela, kono ka ku kuta-kutela? Ba kolwa ka ku tala luli kuli lu pila mwa mazazi a mafelelezo sina ka mo ku bulelezwi cimo mwa Mañolo a Kenile.—2 Timotea 3:1-5; Sinulo 6:3-8.

Kacwalo, ba ziba kuli ona cwale-cwale fa Jehova Mulimu u ka felisa lindwa, sitoyo, mifilifili, ni mikwangalakanyi. Butata bwa ku baleha bu ka ba nto ya kwamulaho. Mwa nako ye, ka ku swalisana ni kelezo ya muapositola Paulusi ye kwa 1 Makorinte 12:14-26, Lipaki za Jehova ba satalala ku babalelana. Niha ba kauhanyizwe ki linuka, miseto, lipuo, ni ku ba mwa libaka ze kwahule, ba iyakatwa ka za yo muñwi ku yo muñwi, kacwalo ba bubebe kwa k’u nga muhato yo muñwi h’a ba mwa butokwi.—Jakobo 1:22-27.

[Mapa ye fa likepe 30]

(Kuli mu bone mo i hatiselizwe luli, mu bone hatiso)

AFRICA

Central African Republic

Democratic Republic of Congo

[Manzwi a bañi ba siswaniso]

Mountain High Maps® Copyright © 1997 Digital Wisdom, Inc.

[Maswaniso a fa likepe 30]

Mandu a Mubuso a malalu n’a fetuzwi ku ba libaka za mafitelo

[Siswaniso se si fa likepe 31]

Libaka za ku apehela ne li lukisizwe ka bubebe-bebe

[Siswaniso se si fa likepe 31]

Buñata-ñata bwa babalehi ba nze ba fita

[Maswaniso a fa likepe 31]

Kihona ba sa zo pepwa mi se ba li babalehi