Mu Nyakalale ka Sepo ya Mubuso!

NE LI kezahalo ye nyakalalisa ye n’e bile teñi la March 10, 2001 mwa likalulo ze talu za mwa New York State ze ne li itusisizwe ki lubasi lo lutuna lwa Betele. Ne ku putehani palo ya batu ba ba fita fa 5,784. Kezahalo yeo ne li mukiti wa ku feza sikolo kwa sitopa sa bu 110 sa sikolo sa bulumiwa, sona sa Gilead.

Carey Barber, yo muñwi wa Sitopa Se Si Busa sa Lipaki za Jehova, n’a amuhezi batu kaufela ni ku kalisa tukiso ka ku bulela kuli: “Kwa lu tabisa ku ziba kuli litopa ze eza 110 za baituti ba Gilead se ba lutilwe ku ba balumiwa ni ku lumelwa kwa linaha za mwa lifasi kaufela.”

Mwa ku Zwelelapili ku Nyakalala

Hamulaho wa manzwi a Muzwale Barber a ku kwalula tukiso, Don Adams a ambola kwa baputehi, ni baituti b’a 48 ba ba kwazize, fa taba ye li “Mbuyoti ya Jehova Ya Lu Fumisa.” Ka ku toma ngambolo ya hae fa Liproverbia 10:22, n’a hupulisize baputehi kuli Jehova wa tusa ni ku fuyaula batanga ba hae ha ba beya za Mubuso mwa sibaka sa pili mwa bupilo bwa bona. N’a susuelize baituti ku amuhela musebezi wa bona o munca ka moya wa ku tabela o swana ni wa n’a bonisize muapositola Paulusi ha n’a memilwe ku “silela mwa Masedonia, [ku yo] tusa.” (Likezo 16:9) Niha ne ku na ni matata a n’a tokwa ku tatululwa, ku tabela kwa Paulusi ku yo kutaleza kwa n’a libisizwe ne ku tahisize limbuyoti ze nyakalalisa.

Lilama za sitopa se si kwazize ne ba felize tuto ya bona ya Bibele ya likweli ze ketalizoho ni lituto za ku itukiseza musebezi wa bulumiwa. Niteñi, yo muñwi wa Sitopa Se Si Busa sa Lipaki za Jehova, yena Daniel Sydlik, n’a ba susuelize ku zwelapili ku ba baituti. Ka ku bulela fa taba ye li “Mu Be Balutiwa Ba Ba Sepahala,” a li: “Ku ba mulutiwa ku talusa ku zwelapili ku ipeya ku utwa manzwi a Jesu. Ku ama ku tabela kwa luna ku teeleza kamita kwa manzwi a hae, kwa lushango lwa hae, ni kwa tuto ya hae.” N’a bonisize kuli balutiwa ba Kreste ha ba ikezezi likatulo ku si na ku teeleza kwa linzwi la Mulena; butali bwa Mulimu bu iputezi mwa bupilo bwa Kreste. (Makolose 2:3) Ha ku na yo muñwi ku luna ya kona ku utwa manzwi a Jesu hañwi ni k’u nga kuli wa ziba za hae kaufela, kacwalo Muzwale Sydlik n’a susuelize baituti bao ku zwelapili ku ituta, ku itusisa, ni ku luta niti ya Sikreste, ili nto ye tahisa tukuluho.—Joani 8:31, 32.

Kuli mutu a zwelepili ku ba ya tabile mwa ku sebeleza Mulimu, u lukela ku ba ya tabela ku amuhela kalimelo ni sikululo. Muluti wa kwa Sikolo sa Gilead, Lawrence Bowen, n’a buzize kuli “Kana Lipio Za Mina Li ka Mi Sikulula?” N’a bonisize kuli mwa Bibele lipio za swanisezo li itusiswa kwa ku yemela mihupulo ni maikuto a mutu a tungile ka ku fitisisa. Li kona ku sikulula mutu haiba kelezo ye buyelezwi ye zwa mwa Linzwi la Mulimu i punyize butu bwa mwahali luli. (Samu 16:7; Jeremia 17:10) Busepahali bwa mutu bu kona ku ama Jehova ka butuna. Hamulaho wa ku bala Liproverbia 23:15, 16, mubuleli n’a buzize kuli: “Kana lipio za mina li ka mi sikulula?” A ekeza kuli: “Lu  lapela kuli li eze cwalo, mi kacwalo mu ka konisa Jehova ku ba ni tabo ye tungile ka ku fitisisa. Mu ka zusulusa maikuto a hae a tungile ka ku fitisisa. Ee, mu ka ezisa lipio za Mulimu ku ba mwa nyakalalo ha mu nze mu kumalela ka busepahali kwa misebezi ya mina.”

Ngambolo ya mafelelezo mwa kalulo yeo ya mukopano ne i filwe ki Mark Noumair, ya n’a kile a ba mulumiwa mwa Kenya pili a si ka ba kale muluti wa kwa Sikolo sa Gilead. Ngambolo ya hae ye n’e na ni toho ya taba ye li “Ku Bona ka Meto Ki Ko Kunde Hahulu” ne i koñomekile butokwa bwa kuli mutu a itebuhe z’a na ni zona. Ka ku swalisana ni Muekelesia 6:9, Muzwale Noumair n’a elelize kuli: “M’u nge muinelo ka mo u inezi. Kona se ku talusa ‘ku bona ka meto.’ Mwa sibaka sa ku nyolelwa ka za ze mu bata ku eza kono ili zeo mu sa ezi, mu tundamene ku eza hande hahulu ka mo ku konahalela mwa muinelo o mu li ku ona ka nako yeo. Ku hanelela lika ze siyo, ku ba ni litibelelo ze fitelezi, kamba ku isa mamelelo kwa likalulo ze zwafisa za musebezi wa mina ku ka mi tahiseza ñoñoleho ni lipilaelo.” Ee, ku si na taba ni ko lu inzi kamba miinelo ifi kamba ifi, ku fita fa ku itebuha z’a lu fa Mulimu mwa miinelo ya luna ku tahisa moya wa nyakalalo mwa ku sebeleza Mubupi wa luna Ya Pahami.

Ze Bonwi Ze Nyakalalisa za Sebelezo ya Mubuso ni za fa Gilead

Hamulaho wa kelezo ye sebeza ye ne filwe ka lingambolo zeo, baituti ba talusa ka butungi ze  ne ezahalile ha ne ba li mwa bukombwa bwa fa nyangela mwahal’a likweli ze ketalizoho za lituto za bona. Ka ketelelo ya Wallace Liverance, yena muñoli wa kwa Sikolo sa Gilead, baituti be ne ba kwazize bao ba talusa mo ne ba ipakezi ku ba likombwa za Mulimu. (2 Makorinte 4:2) Ne ba konile ku susumeza mazwalo a ba bañwi e ba filwe ki Mulimu. Ze ne ba petile baituti bao ne li bonisize ka mo lituto za Bibele ne li kaliselizwe kwa batu ba ba sepahala be ne ba katani mwa linzila, mwa bukombwa bwa fa ndu ni ndu, ni mwa miezezo ye miñwi. Ka linako ze shutana-shutana, batu ba ba tabela ne ba bulezi kuli lihatiso za kopano ya Jehova ze tomile fa Bibele li utwahala ku ba ze na ni niti. Muñ’a ndu yo muñwi n’a ngile muhato o munde kabakala timana ye ñwi ya mwa Bibele. Ka nako ye s’a sweli ku ituta Bibele ni Lipaki za Jehova.

Ka ku latelela, Joel Adams n’a buhisani ni be ne ba felize Sikolo sa Gilead mwa lilimo za kwamulaho. Toho ya taba ya ngambolo ya hae ne li ya kuli “Mu Si Tuheli ku Ituta, Mu Si Tuheli ku Sebeleza Jehova.” Be ne ba buhisanwi ni bona ne ba file kelezo ya ka bunako kwa balumiwa ba banca. Harry Johnson, ka ku hupula nako ya n’a bile yo muñwi wa sitopa sa bu 26 sa Sikolo sa Gilead, a bulela kuli: “Ne lu lutilwe kuli Jehova u se a etelezi batu ba hae kamita mi u ka na a ba etelela. Buikolwiso b’o se bu bile bo bu susueza ka lilimo-limo ze felile.” Yo muñwi wa sitopa sa bu 53 sa Sikolo sa Gilead, William Nonkes, n’a elelize be ne ba kwazize bao kuli: “Sa butokwa ka ku fitisisa kikuli, mu buluke lipimo za Bibele mwa munahano, ni ku li sebelisa mwa milelo kaufela ye mu eza mwa bupilo cwale ni ku ya ku ile. Kacwalo, mu ka kona ku kumalela kwa musebezi wa mina, mi Jehova u ka mi fuyaula hahulu.”

Fa tukiso yeo, Richard Rian n’a iketezi toho ya taba ye li “Ba Ba Tiiselizwe ku Eza Tato ya Jehova.” Yo muñwi ku ba n’a buhisani ni bona ne li John Kurtz, ya n’a keni sitopa sa bu 30, ili ya n’a tandile lilimo ze 41 inze a li mulumiwa mwa naha ya Spain. Ha n’a buzizwe ka za lituto ze lutiwa kwa Sikolo sa Gilead, Muzwale Kurtz a li: “Buka ye itutiwa hahulu ki Bibele. Mi ku tuha f’o lu na ni lihatiso ze tomile fa Bibele ze lu tusa ku i utwisisa. Zeo za fumaneha ku bote. Ha ku na litaba za likunutu ze fiwanga kwa Gilead. Ni zwelapili ku koñomeka seo kakuli litaba ze lutiwanga kwa Gileadad za fumaneha ku bote.”

Yo muñwi wa Sitopa Se Si Busa sa Lipaki za Jehova, Muzwale Gerrit Lösch n’a felelelize tukiso ya kwa moya yeo ka ku ambola fa taba ye li “Fahalimu ni Mwatas’a Mafufa a Jehova.” N’a talusize ka mo silelezo ni kemelo ya Mulimu kwa batanga ba hae ba ba sepahala li swaniselizwe ka mafufa a mbande mwa Bibele. (Deuteronoma 32:11, 12; Samu 91:4) Mbande ye hulile fokuñwi i bapulanga mafufa a yona ka lihora ze ñata ili ku bukeleza bana ba yona. Ka linako ze ñwi, mbande ya musali i kana ya kwahelela bana ba yona mwa mafufa ili ku ba sileleza kwa moya o bata. Ka nzila ye swana mi ni ka ku swalisana ni mulelo wa hae, Jehova wa kona ku tusa batanga ba hae ba ba sepahala, sihulu ha ba talimana ni miliko ya kwa moya. Jehova h’a tuheleli batanga ba hae kuli ba likiwe ki ze ba fita kono u ba fa nzila ya ku kona ku itiisa ku yona. (1 Makorinte 10:13) Muzwale Lösch a feleleza ka ku bulela kuli: “Kuli lu zwelepili ku silelezwa kwa moya, lu lukela ku zwelapili ku ba mwatas’a mafufa a Jehova. Seo si talusa kuli ha lu lukeli ku yambula moya wa buipanguli. Ha lu zweleñipili ku tiyela ku Jehova ni kwa kopano ya hae ye swana sina me, isi ku ikauhanya kwa ketelelo ni kelezo ya ka lilato ye fiwa ki yena ni kopano.”

Muina-situlo a bala litelegramu ni litumeliso ze ne zwa mwa lifasi kaufela ze ne ba lumezi be ne ba ba lakaleza bunde. Mi kwa latelela ku fiwa kwa ma-diploma (ona mañolo a bupaki a sikolo). Sikolo sa Gilead ha ne si tomilwe, ne li ka mubonelo wa ku luta palonyana ya litopa mwahal’a lilimo ze ketalizoho. Kono ka lilimo ze 58 ze felile Jehova Mulimu u konisize sikolo ku zwelapili ku sebeza. Sina mwa n’a bulelezi Muzwale Barber mwa manzwi a hae a ku kwalula: “Ba ba felize Sikolo sa Gilead se ba petile ze makaza luli ku zwa 1943, fo ne si kakulezwi Sikolo sa Gilead! Buikatazo bwa bona ha bu kopanyiwa hamoho bu tisize kuli likiti-kiti za ba lipilu ze sepahala mwa lifasi ba ekezwe kwa kopano ye nde-nde ya Jehova.” Ee, sikolo sa bulumiwa seo si tusize mwa ku nyakalala kwa bolule-lule kwa ka sepo ya Mubuso.

[Mbokisi fa likepe 24]

LITABA KA ZA SITOPA

Palo ya linaha ko ba zwa baituti: 8

Palo ya linaha ko ba lumezwi: 18

Palo hamoho ya baituti: 48

Avareji ya lilimo za buhulu: 34

Avareji ya lilimo za ku ba mwa niti: 18

Avareji ya lilimo za ku ba mwa bukombwa bwa ka nako ye tezi: 13

[Siswaniso se si fa likepe 25]

Sitopa Sa bu-110 Se Si Feza Sikolo sa Gilead sa Bibele sa Watchtower

Mwa mukoloko o kwatasi, milaini i baliwa ku zwa kwapili ku kuta kwamulaho, mi mabizo a kolohanyizwe ku zwa kwa nzohoto ku ya kwa bulyo mwa mulaini o muñwi ni o muñwi.

(1) Vacek, E.; Madelin, L.; Evans, G.; Watanabe, K. (2) Trafford, P.; Turfa, J.; Wilson, P.; Williams, R.; Weber, A. (3) Johnson, T.; Hanau, K.; Mourlhou, F.; Charpentier, F.; Peckham, R.; Androsoff, P. (4) Seegers, T.; Seegers, D.; Bailey, P.; Bailey, M.; Madelin, K.; Lippold, E.; Lippold, T. (5) Evans, N.; Gold, R.; Bollmann, I.; Vacek, R.; Oundjian, J.; Wilson, N. (6) Turfa, J.; Zuidema, L.; Zuidema, R.; Bengtsson, C.; Bengtsson, J.; Galano, M.; Galano, L. (7) Peckham, T.; Mourlhou, J.; Charpentier, C.; Gold, M.; Bollmann, R.; Oundjian, F. (8) Weber, R.; Johnson, B.; Hanau, D.; Watanabe, Y.; Williams, R.; Trafford, G.; Androsoff, T.