Ki Kabakalañi Ha Lu Swanela ku Ituta Bibele?

BILL ne li mucaha wa mafulofulo ya itutile ili muipumaneli. Niteñi, n’a si na mwangalwa. Bupilo bwa hae ne bu si na mulelo, mi taba yeo ne i mu sisitile hahulu. Ka ku lika ku fumana mulelo mwa bupilo, a tatubisisa bulapeli bo bu fitana-fitana, kono a palelwa ku fumana za n’a bata. Ka 1991 a kopana ni Paki ya Jehova. Paki y’o a mu siyela buka ye ne i nyakisisa ze i bulela Bibele ka za mulelo wa bupilo. Kwa lukiswa tuto ya Bibele ilikuli Bill a kone ku tatubisisa taba yeo ni ze ñwi.

Bill u hupula kuli: “Lwa eza tuto ya luna ya pili, mi bakeñisa kuli ne lu amanga hahulu kwa Bibele, na ziba kuli kona ze ne ni batanga zeo. Likalabo za mwa Bibele ne li nyakalalisa hahulu. Hamulaho wa tuto yeo, na ndilaiba ku ya kwa malundu, teñi k’o na zwa mwa simbayambaya sa ka, mi na kalumuka ku huwa kabakala tabo ye tuna. Ne ni nyakalalile kuli cwale ne se ni ituta likalabo kwa lipuzo za ka.”

Ki niti, haki batu kaufela ba ba fumananga  niti ye mwa Bibele ba ba kalumukanga ku huwa ka tabo. Niteñi, ku ituta likalabo kwa lipuzo za butokwa mwa bupilo ki nto ye nyakalalisanga ba bañata. Ba ikutwanga inge munna wa mwa nguli ya Jesu ya n’a fumani bufumu bo ne bu shitekilwe mwa simu. Jesu n’a ize: “Kakuli a bu tabezi, a y’o lekisa tutu ya hae kaufela, mi a itekela simu yeo.”—Mateu 13:44.

Mwa ku Fumanela Bupilo Bo Bu Na ni Mulelo

Bill n’a alakanyize puzo ye tuna, ye li, Ki ufi mulelo wa bupilo? Banahani, baluti ba za bulapeli, ni ba sayansi ba katalizwe ki puzo yeo ka lilimo ze likiti-kiti. Batu ba ñozi libuka ze ñata-ñata kuli ba like ku i alaba. Buikatazo bwa bona bu bile bwa mbango, mi ba bañata ba fitile fa ku nahana kuli puzo yeo ha i koni ku alabiwa. Niteñi, kalabo i teñi. Niha i li ye tibile, haki ye t’ata ku i utwisisa. I talusizwe mwa Bibele. Mwa ku fumanela bupilo bo bu tabisa, ili bo bu mulelo, kikuli: Lu lukela ku ba ni silikani sakata ni Jehova, yena Mubupi wa luna ni Ndat’a luna wa kwa lihalimu. Lu kona ku peta cwañi nto yeo?

Ku na ni linzila ze peli ze bonahala kuli za lwanisana za ku utwana ka zona ni Mulimu. Ba ba eza cwalo ba mu saba mi hape ni ku mu lata. Ha lu nyakisiseñi mañolo a mabeli a’ yemela pulelo yeo. Kale-kale k’o, Mulena Salumoni ya butali n’a tatubisisize ka tokomelo batu mi za n’a shituzi a li ñola mwa buka ya Bibele ya Muekelesia. Ka ku kusufaza za n’a fumani, a ñola kuli: ‘Cwale litaba ze, mafelelezo a zona ki a: Saba Mulimu, mi u mamele milao ya hae. Kakuli ki yona swanelo kaufela ya mutu.’ (Muekelesia 12:13) Lilimo ze mianda-nda ku zwa f’o, Jesu n’a alabile cwana ha n’a buzizwe kuli ki ifi taelo ye tuna ka ku fitisisa mwa Mulao wa n’a filwe Mushe: ‘Lata Mulena Mulimu wa hao, ka pilu ya hao kaufela, ni ka moya wa hao kaufela, ni ka kutwisiso ya hao kaufela.’ (Mateu 22:37) Kana kwa mi komokisa ku nahana kuli lu swanela ku saba Mulimu mi hape ni ku mu lata? Ha lu tatubisiseñi butokwa bwa sabo ni lilato ni mo li swalisanela mwa ku tahisa silikani se sinde ni Mulimu.

Ze ku Talusa ku Saba Mulimu

Kuli lu lapele Mulimu ka mo ku swanehela, sabo ye kopanelezi ni likute i tokwahala hahulu. Bibele i li: “Makalelo a butali ki ku saba [Muñ’a] Bupilo.” (Samu 111:10) Muapositola Paulusi n’a ñozi kuli: “Lu be ni buitumelo, kuli lu sebeleze Mulimu ka mukwa o mu tabisa, inze lu na ni likute ni sabo.” (Maheberu 12:28) Ka ku swana, lingeloi le ne li fufa mwa mbyumbyulu la n’a boni muapositola Joani mwa pono ne li kalile mushaa wa lona wa evangeli ka manzwi a’ li: “Mu sabe Mulimu, mu mu lumbeke.”—Sinulo 14:6, 7.

Sabo ya ku saba Mulimu yeo, ili ye tokwahala hahulu kuli mutu a fumane bupilo bo bu mulelo, ha i swani ni lukui. Lu kana lwa ba ni lukui haiba lu bembiwa ki sibangoki se si situhu ili se si kona ku bulaya. Kono sabo ya ku saba Mulimu—kamba sabo ya silumeli—ki sabo ye kopanezi ni likute ku Mubupi ni tompo ye tuna ku yena. Hape ki sabo ye lukile ya ku saba ku foseza Mulimu kakuli ki yena Muatuli ya Pahami ili yena ya M’ata Ote, y’a na ni m’ata ni tukelo ya ku ota ba ba sa utwi.

Sabo ni Lilato Li Tamani

Niteñi, Jehova h’a bati kuli batu ba mu sebeleze ka libaka fela la kuli ba mu tompa hahulu. Sihulu-hulu, Jehova ki Mulimu ya lilato. Muapositola Joani n’a susumelizwe ku ñola kuli: “Mulimu u lilato.” (1 Joani 4:8) Jehova Mulimu u ezize batu ka lilato le lituna, mi u bata kuli batu ba bonise buitebuho bwa bona ka  ku mu lata ni yena. Kono lilato leo li swalisani cwañi ni sabo ya silumeli? Taba kikuli, sibeli sa mikwa yeo i tamani. Walisamu n’a ñozi kuli: “Ba ba saba [Muñ’a] Bupilo ki ba likunutu za hae.”—Samu 25:14.

Mu nahane fela za likute ni tompo yeo mwana a na ni yona ku ndat’ahe ya tiile ili ya butali. Nihakulicwalo, mwana y’o u ka tabela lilato l’a boniswa ki ndat’ahe. Mwana u ka sepa ndat’ahe ni ku itinga kwa ketelelo ya hae, inze a sepile kuli ketelelo yeo i ka mu tusa mo kuñata. Ka ku swana, haiba lu lata ni ku saba Jehova, lu ka latelela ketelelo ya hae, mi ku eza cwalo ku ka lu tusa. Mu bone za n’a bulezi Jehova ka za Maisilaele: “Mawe, kabe ba ka ba ni pilu ye cwalo kamita, kuli ba ni sabe mi ba utwe litaelo za ka kaufela, kamita; ne ba ka fiwa mbuyoti, bona ni bana ba bona ku ya ku ile.”—Deuteronoma 5:29.

Luli, sabo ya silumeli i fa tukuluho isi butanga, i fa tabo isi maswabi. Isaya n’a polofitile cwana ka za Jesu: “Ku saba [Muñ’a] Bupilo ki sona s’a ka tabela.” (Isaya 11:3) Mi walisamu n’a ñozi kuli: “U fiwa mbuyoti mutu ya saba [Muñ’a] Bupilo, ya tabela litaelo za hae hahulu.”—Samu 112:1.

Kaniti, ha lu koni ku saba Mulimu kamba ku mu lata haiba lu sa mu zibi. Kona libaka ku ituta Bibele ha ku li kwa butokwa hahulu. Tuto ye cwalo i lu tusa ku utwisisa mw’a inezi Mulimu ni ku fita fa ku itebuha bunde bwa ku latelela ketelelo ya hae. Ha lu nze lu sutelela hahulu ku Mulimu, lu bata ku eza tato ya hae mi lu lakaza ku buluka litaelo za hae, ka ku ziba kuli li ka lu tusa.—1 Joani 5:3.

Kwa tabisa ku mutu ku ziba kuli u pila bupilo bo bu lukela. Kona mo ku bezi ku Bill, ya bulezwi kwa makalelo. Cwanoñu fa n’a ize: “Mwa lilimo ze 9 ze fitile ku zwa fo ne ni itutezi Bibele lwa pili, silikani sa ka ni Jehova si hulile. Tabo ye tuna ye ne i ni unjami kwa makalelo se i fetuhile mupilelo o nyakalalisa hakalo. Nako kaufela ni bona bupilo ka sepo. Mazazi a ka a tezi misebezi ya ngana, isi ku bata minyaka ye sa tusi. Jehova u bile mutu wa luli ku na, mi ni ziba kuli u bata kuli ni pile hande.”

Mwa taba ye tatama, lu ka nyakisisa hape m’o zibo ya ku ziba Jehova i tiseza tabo ni lituso ku ba ba i sebelisa mwa bupilo bwa bona.

[Manzwi a fa likepe 5]

Ku sutelela ku Mulimu ku talusa kuli lwa mu lata ni ku mu saba

[Siswaniso se si fa likepe 6]

Ku saba Jehova ki sona sa n’a tabela Jesu