Mu Tule Ze Mi Paleliswa ku Eza Zwelopili!

MOTA ya mina ya lila, mi injini ya sebeza, kono ya pala ku ya kwapili. Kana ku na ni kalulo ya yona ye siyo hande? Batili, ku le liñwi la mawili a yona ku na ni licwe le lituna. Se si tokwa ku eziwa kuli mota i zamaye ki ku li zwisa fela kwateñi.

Ka ku swana, ba bañwi ba ba ituta Bibele ni Lipaki za Jehova ba na ni ze kana za ba palelwisa ku zwelapili kwa moya. Ka mutala, Jesu n’a lemusize kuli lika ze cwale ka “lipilaelo za lifasi, ni litakazo za bufumu” li kona ku “pukutisa Linzwi” la niti ni ku palelwisa mutu ku eza zwelopili.—Mateu 13:22.

Ku ba bañwi, mikwa ya ku pepwa ni yona kamba bufokoli bo buñwi bwa ba palelwisa ku eza zwelopili. Munna wa kwa Japan ya bizwa Yutaka n’a tabezi lushango lwa Bibele, kono n’a na ni butata bo butuna bwa papali ya njuka. N’a likile hañata-ñata ku tuhela mukwa o maswe w’o kono n’a palezwi. Ku ngongwelwa kwa hae ne ku tisize kuli a sinyehelwe ki mali a mañata, ku latehelwa ki mandu a malalu, ku sa kutekiwa ki lubasi lwa hae, ni kutokwa buikuteki. Kana n’a ka kona ku zwisa sitataliso yeo ni ku ba Mukreste?

Kamba m’u nge mutala wa musali ya bizwa Keiko. Ka tuso ya Bibele,  n’a konile ku tula mikwa ye maswe ye cwale ka ku lapela milimu, buhule, ni ku nuha. Kono Keiko u itumelela kuli: “Se ne si ni palelwisa hahulu ka ku fitisisa ne li ku zuba kwai. Ne ni likile hañata-ñata ku tuhela kono ne ni palezwi.”

Mwendi ni mina mu na ni nto ye ñwi ye mi palelwisa ku eza zwelopili, ili ye bonahala kuli ha i konwi ku tulwa. Ku si na taba kuli yona nto yeo ki nto mañi, mu kolwe kuli ka tuso ya Mulimu, mwa kona ku i tula.

Mu hupule kelezo yeo Jesu n’a file kwa balutiwa ba hae ha ne ba palezwi ku leleka moya o maswe ku munna wa butuku bwa kanono. Jesu ha s’a lelekile moya o maswe o ne ba palezwi ku leleka balutiwa ba hae, a ba bulela kuli: “Kabe mu na ni tumelo ye likana ni peu ya masitete kwa butuna, niha ne mu ka bulelela lilundu leo, mu li: Zwa kwanu, u tutele mwani, kabe la tuta; mi kabe mu si na se mu sa koni.” (Mateu 17:14-20; Mareka 9:17-29) Ee, butata bo bu kana bwa bonahala inge lilundutuna ku luna ki bo bunyinyani-nyinyani ku Mubupi wa luna ya m’ata ote.—Genese 18:14; Mareka 10:27.

Ku Ziba Ze Lu Palelwisa ku Eza Zwelopili

Kuli mu kone ku tula ze mi tibela, mu lukela ku ziba luli zona lika zeo. Mu kona ku eza cwañi cwalo? Fokuñwi, yo muñwi mwa puteho, inge cwalo eluda kamba mutu ye mu ituta ni yena Bibele u ka hohela mamelelo ya mina kwa nto ye ñwi. Ku fita ku toya kelezo ye cwalo ye lilato, ka ku ikokobeza mu lukela ku ‘utwa ku laelwa, mi mu talife.’ (Liproverbia 8:33) Fokuñwi, mu zibanga bufokoli bwa mina ha mu ituta Bibele. Ee, Linzwi la Mulimu ki “le li pila, mi li na ni mata.” (Maheberu 4:12) Ku bala Bibele ni lihatiso ze tomile fa Bibele kwa kona ku patulula mihupulo, maikuto ni milelo ya mina ye shitami kwa pilu. I mi tusa ku itikanyeza ka ku ya ka lipimo za Jehova ze pahami. Ya patulula ni ku zibahaza lika ze kana za mi palelwisa ku eza zwelopili ya kwa moya.—Jakobo 1:23-25.

Ka mutala, m’u nge kuli muituti wa Bibele s’a bile ni mukwa wa ku nahananga ze masila. A kana a’ nga kuli ku eza cwalo ha ku koni ku tisa butata, ili ku hupula kuli h’a ezi nto ifi kamba ifi ye fosahezi. H’a nze a zwelapili ku ituta, wa fumana manzwi a kwa Jakobo 1:14, 15, a li: “Mutu ni mutu u likwa ki ku hohwa ni ku putelelwa ki takazo ye li ya hae. Mi takazo ha i simuluhile, i tahisa sibi; mi sibi ha si hulile si zwala lifu.” Cwale wa bona m’o ku zwelapili ku eza cwalo ku kona ku mu palelisezwa ku eza zwelopili! U kona cwañi ku felisa sitataliso yeo?—Mareka 7:21-23.

Ku Tula Lisitataliso

Mwendi ka tuso ya Mukreste ya hulile, muituti y’o a kana a eza patisiso ye ekezehile mwa Linzwi la Mulimu, ka ku itusisa Watch Tower Publications Index. * Ka mutala, toho ya taba ye li “Thoughts” (Mihupulo), i libisa mubali kwa litaba ze sikai ze hatisizwe ili ze bulela za mwa ku tulela mihupulo ye lubeta. Litaba zeo li na ni mañolo a Bibele a tusa, a cwale ka Mafilipi 4:8, ye li: “Linto kaufela ze li za niti, kaufela ze kutekeha, kaufela ze lukile, kaufela ze kenile, kaufela ze na ni libubo le linde, kaufela ze na ni swanelo, ni ze lukela ku lumbwa, ibe zona ze mu nze mu hupula.” Ee, mihupulo ye masila i lukelwa ku yoliswa ka mihupulo ye na ni libubo le linde ili ye yahisa!

H’a nze a eza patisiso cwalo, ku si na kuliñi, muituti y’o u ka fumana likuka ze ñwi ze tomile fa Bibele ze ka mu tusa ku pima ku tunafaza butata bwa hae. Ka mutala, mañolo a Liproverbia 6:27 ni Mateu 5:28 a laela mutu ku sa nahananga litaba ze zusulusa lishuke la tobali. Walisamu n’a lapezi kuli: “U biule meto a ka ku ze si na tuso.” (Samu 119:37) Ka mo ku inezi, ku bala fela mañolo ao a mwa Bibele haki ko ku likani. Munna ya butali u li: ‘Pilu ya mutu ya na ni niti ya ikupula.’ (Liproverbia 15:28) Ka ku yeya z’a laela Mulimu ni libaka h’a laela cwalo, muituti y’o wa kona ku ba ni kutwisiso ye tungile ya bunde ni buitikanelelo bwa linzila za Jehova.

 Sa mafelelezo, mutu ya lika ku tula nto yeo ye mu palelwisa ku eza zwelopili u lukela ku kupa tuso ku Jehova a lukuluhile. Esi mane Mulimu wa ziba se lu bupilwe ka sona, wa ziba kuli ha lu si ka petahala, kuli lu liluli fela. (Samu 103:14) Ka ku tundamena ku lapelela tuso ku Mulimu, hamohocwalo ni ku eza buikatazo bo butuna bwa ku bata ku pima ku yeya fa lika ze masila, kwa mafelelezo ku ka ezisa mutu ku ba ni nto ye ñwi ye nde hahulu, ili lizwalo le li kenile, le li sa mu sisiti.—Maheberu 9:14.

Mu Si Zwafi

Ku si na taba kuli mu tandanisa butata mañi, mu si libali kuli fokuñwi mu kana mwa kutela ku eza yona nto yeo. Ha ku ezahala cwalo, ki kwa ka taho ku ikutwa ku filikana ni ku swaba. Kono, mu hupule manzwi a kwa Magalata 6:9, a li: “Lu si ke lwa katala ku eza hande, kakuli lu ka kutula mwa nako ya teñi ha lu sa zwafi.” Batanga ba Mulimu ba basepahali inge bo Davida ni Pitrosi ne ba bile ni mapalelwi a swabisa. Kono ne ba si ka zwafa. Ka buikokobezo ne ba amuhezi kelezo, ku eza licinceho ze n’e tokwahala, mi ba zwelapili ku bonisa kuli ne ba li batanga ba Mulimu ba batuna. (Liproverbia 24:16) Ku si na taba ni mafosisa a Davida, Jehova n’a mu bizize kuli ki “munna ya kolisa pilu ya ka, ya ka eza se si latwa ki Na kaufela.” (Likezo 13:22) Pitrosi ni yena n’a tulile bufokoli bwa hae mi a ba musumo mwa puteho ya Sikreste.

Ba bañata kacenu ni bona ba konile ku tula lisitataliso. Yutaka, ya bulezwi kwa makalelo, a lumela ku ituta Bibele. U bulela kuli: “Tuso ni mbuyoti ya Jehova ha ne ni nze ni eza zwelopili, ne li ni tusize ku kona ku tula butata bwa ka bwa papali ya njuka. Ni na ni tabo ya ku bona buniti bwa manzwi a Jesu, a’ li ka tumelo, niheba ‘malundu’ a konwa ku tutiswa.” Kwa mafelelezo, Yutaka a ba mutang’a bukombwa mwa puteho.

Keiko ya n’a ngongwezwi ki ku zuba kwai bo? Kaizeli ya n’a ituta ni yena n’a akalelize kuli a bale litaba ze fitana-fitana za Awake! ze ambola ka za ku ngongwelwa ki ku zuba kwai. Mane Keiko n’a beile manzwi a kwa 2 Makorinte 7:1 mwa mota ya hae kuli a no mu hupulisanga ka zazi kuli u lukela ku ba ya kenile mwa meto a Jehova. Niteñi, n’a palezwi ku tuhela ku zuba kwai. Keiko ha iheta, u li: “Ne ni filikani hahulu. Kacwalo, na ipuza ze ne ni bata luli—kana ne ni bata ku sebeleza Jehova kamba Satani?” Ha s’a ikatulezi kuli n’a bata ku sebeleza Jehova, a lapela ka ku tiya kuli a tusiwe. U bulela kuli: “Ne ni komokile ha ne ni konile ku tuhela ku zuba kwai ni sa nyandi hahulu. Ni ikutwa fela bumaswe kuli ne ni palezwi ku tuhelela kwa makalelo.”

Ni mina mwa kona ku tula ze mi palelwisa ku eza zwelopili. Mo mu ezeza kuli mihupulo ya mina, litakazo, lipulelo, ni likezo za mina li lumelelane ni lipimo za Bibele, ki mona mo mu ka bela ni buikuteki ni buikolwiso. Mizwale ni likaizeli ba mina ba kwa moya, hamoho cwalo ni lilama za lubasi lwa mina, ba ka katuluha ni ku susuezwa ha ba eza sango ni mina. Sa butokwa ka ku fitisisa kikuli, mu ka tiisa swalisano ya mina ni Jehova Mulimu. U sepisize kuli u ka ‘zwisa ze sitatalisa mwa nzila ya sicaba sa hae,’ ha si baleha kwa tamaiso ya Satani. (Isaya 57:14) Mi mwa kona ku kolwa kuli haiba mu satalala ku zwisa ni ku tula ze mi palelwisa ku eza zwelopili ya kwa moya, Jehova u ka mi fuyaula hahulu.

[Litaluso za kwatasi]

[Siswaniso se si fa likepe 28]

Jesu n’a sepisize kuli ka tumelo, lisitataliso ze swana sina malundu za konwa ku tulwa

[Siswaniso se si fa likepe 30]

Ku bala Bibele ku tiisa buikatazo bwa luna bwa ku bata ku tula bufokoli bwa kwa moya