Bashemi—Mu Tokomele Bana ba Mina!

BANA ba tokwa ketelelo ni kalimelo ye lilato, sihulu ya bashemi ba bona. Kacwalo, Tania Zagury, muluti wa kwa Brazil, u li: “Banana kaufela ba lata lipapali. Ba tokwa ku tomelwa maciñekelo. Ki bashemi ba ba swanela ku eza cwalo. Hakusicwalo, bana ba ikezeza mo ba latela.”

Kono mwa linaha ze ñata, batu ba ba ikezeza mo ba latela ili ba ba babaza tukuluho yeo ba kona ku lu ezisa ku fumana t’ata ku latelela kelezo yeo. Kacwalo, bashemi ba kona ku fumana kai tuso? Bashemi ba ba saba Mulimu ba ziba kuli bana ba bona ki “sanda se si zwa ku [Muñ’a] Bupilo.” (Samu 127:3) Kacwalo, ba ba uta ka ku itinga fa ketelelo ya Linzwi la Mulimu, yona Bibele. Ka mutala, Liproverbia 13:24 i li: “Ya tokwisa mwan’a hae tupa, u mu toile; kono ya mu lata, u mu nata a sa li yo munyinyani.”

Bibele ha i itusisa linzwi la “tupa,” ha i talusi fela ku nata; tupa i yemela sikululo ifi kamba ifi. Kaniti, hañata ku kana kwa tokwahala fela manzwi mwa ku sikulula mwanana ya sa utwi. Liproverbia 29:17 i li: “Laela mwan’a hao, mi u ka ku fa sibaka sa ku iketa, mane a tabise pilu ya hao.”

Bana ba tokwa kalimelo ye lilato kuli ba tuhele mikwa ye maswe. Sikululo ye tiile ili ye lilato cwalo i bonisa kuli mushemi u lata mwan’a hae. (Liproverbia 22:6) Kacwalo, bashemi mu si zwafi! Ka ku latelela kelezo ya mwa Bibele ye nde ili ye sebeza, mu ka tabisa Jehova Mulimu ni ku kutekiwa ki bana ba mina.