“Mu Tahe Ku Na . . . , Mi Ni Ka Mi Imulula”

‘Ku Bulela Linzwi’ Kwa Imulula

N’A LI munna ya petehile ya n’a eza musebezi wa butokwa. Milutelo ya hae ne li ye minde hahulu-hulu kuli mane “buñata bwa komoka tuto ya hae.” (Mateu 7:28) Hape n’a li mukutazi ya sa katali. Nako ya hae, m’ata, ni za n’a na ni zona kaufela n’a itusisa zona kwa ku kutaza za Mubuso wa Mulimu. Ee, Jesu Kreste n’a zamaile mwa maneku kaufela a naha ya habo ka ku ba mukutazi ni muluti ya sa koni ku likanyezwa.—Mateu 9:35.

Musebezi wa Jesu wa ka putako ne li wa ku kutaza “evangeli ya mubuso” ku ba n’a pila ni bona ni ku twaeza balutiwa ba hae kuli ba eze musebezi o swana mwa lifasi kaufela. (Mateu 4:23; 24:14; 28:19, 20) Kana buima bwa musebezi wa ku kutaza ni putako ya ona hamoho ni butuna bwa ona musebezi w’o ne bu ka imeza balateleli ba hae be ne ba si ka petahala ili be ne ba fokola?

Kutokwa! Jesu ha s’a laezi balutiwa ba hae kuli ba lapele ku “Muñ’a lukau,” yena Jehova Mulimu, kuli a tahise babeleki ba bañwi, a ba fundula kuli ba yo luta batu. (Mateu 9:38; 10:1) Ku tuha f’o a fa sepiso ya kuli buikalabelo bwa ku ba balateleli ba hae—ku kopanyeleza cwalo ni musebezi wa ku kutaza—ne bu ka tahisa kimululo ni ku omba-omba kwa luli. Jesu n’a ize: “Mu tahe ku na . . . , mi ni ka mi imulula.”—Mateu 11:28.

Bu Tahisa Tabo

Memo yeo ki ye mufelañeke, ye lilato, ni ye sishemo luli! I bonisa kuli luli Jesu wa iyakatwa balateleli ba hae. Balutiwa ba hae ha ba peta buikalabelo bwa bona bwa ku kutaza “taba ye nde” ya Mubuso wa Mulimu, ba imululwa. Seo si ba tahiseza tabo ni buiketo bwa luli.—Joani 4:36.

Nako ye telele pili Jesu a si ka taha kale fa lifasi, Mañolo n’a koñomekile kuli mwa ku sebeleza Mulimu ku lukela ku ba ni tabo. Seo ne si bonisizwe hande walisamu ha n’a opezi kuli: “A mu ezeze [Muñ’a] Bupilo lilata la tabo, mina ba lifasi kaufela. A mu sebeleze [Muñ’a] Bupilo inze mu tabile; mu itahise fapil’a hae ka lipina.” (Samu 100:1, 2) Kacenu, batu ba mwa macaba kaufela ba tabela Jehova, mi milumbeko ya bona i swana sina mihuwo ya mpi ye tuzi. Ba ba ineezi luli ku Mulimu ba taha ku yena “ka lipina.” Mi seo sa swanela luli kakuli Jehova ki “Mulimu ya tabile,” ya bata kuli batanga ba hae ba pete buineelo bwa bona ku yena ka tabo.—1 Timotea 1:11, NW.

Likombwa Ba Ba Imuluzwi

Ku konahala cwañi kuli musebezi o t’ata mwa bukombwa bwa mwa simu ha u lu katalisi kono wa lu imulula? Ku Jesu, ku eza musebezi wa Jehova ne ku swana inge ku ca lico ze kutiseza m’ata. N’a ize: “Sico sa ka, kikuli ni eze se si latwa ki Ya ni lumile, mi ni feleleze musebezi wa hae.”—Joani 4:34.

Ka nzila ye swana, Bakreste ba ba kutaza ka cisehelo kacenu ba fumana tabo ha ba nze ba “bulela Linzwi.” (2 Timotea 4:2) Connie, musali wa lilimo za buhulu ze mwahal’a 40 ni 60 ya kutazanga ka lihora ze fitelela 70 ka kweli u li: “Ha se ni abani mwa bukombwa, niha ni katezi kwa mafelelezo a lizazi, ni ikutwanga hande.”

Ku cwañi haiba lushango lwa mubuso ha lu amuhelwi? Connie u zwelapili u li: “Ku si na taba ni mo lu amuhelelwa lushango, na li ku ba ni sa inyazi ku abana mwa bukombwa. Kwand’a  ku ziba kuli ni eza se si tabisa Jehova, n’i nga ku bulela niti ku ba nto ye nde kakuli ha ni nze ni eza cwalo, sepo ye nde ye mwa Bibele ya tiya mwa pilu ya ka.”

Ba bañwi ba fumana kuli ku tusa ba bañwi ku ba ni zibo ye nepahezi ka za Mulimu ku kondolosa bupilo bwa bona ka sibili. Meloney, kalibe ya kutazanga lihora ze fitelela 50 ka kweli u li: “Bukombwa bwa imulula kakuli bu zamaisa bupilo bwa ka ni ku bu fa mulelo. Ha ni abana mwa sebelezo, matata a ka butu ni a ka zazi a nyinyafala.”

Millicent, sikombwa yo muñwi ya cisehezi ya li Paki ya Jehova, u li: “Bukombwa bu ezisa lizazi ni lizazi ku ba la butokwa ha ni taluseza batu ka za mulelo wa Mulimu, ka za batu ni m’o Paradaisi i ka kutisezwa sinca fa lifasi. Bu ezisa Jehova ku ba wa luli ku na ka zazi mi bu ni fa kozo ni tabo ya mwa pilu ye sa koni ku taha ka nzila ifi kamba ifi ye ñwi.”

Bateelezi Ba Ba Imululwa

Kaniti, bakutazi ba Mubuso ba imululwa ki bukombwa bwa Sikreste, mi ba ba amuhela lushango lo lu fa bupilo ba omba-ombiwa ki lona. Ticele yo muñwi wa mwa Portugal niha n’a lutilwe ki baprisita ni masisita, n’a ikutwile kuli keleke ya habo ne i sa mu fi za n’a tokwa kwa moya. Lipuzo za hae ka za Bibele ne li sa alabiwi. Tuto ya Bibele ya kamita ye n’e zamaisizwe ki yo muñwi wa Lipaki za Jehova ne i mu konisize hanyinyani-hanyinyani ku utwisisa Mañolo. Ticele y’o n’a tabezi hahulu. N’a ize: “La bulalu ni la bulalu ne ni libelelanga tuto ya ka kakuli lipuzo za ka kaufela ne li sweli ku alabiwa ka bupaki bwa Bibele bo bu kolwisa.” Kacenu, musali y’o ki mutanga wa Jehova ya ineezi, mi ni yena u sweli ku imulula ba bañwi ka niti ya Bibele.

Kacwalo kwa bonahala hande kuli Lipaki za Jehova ha ba imezwi ki butuna bwa musebezi wa bona wa ku kutaza kamba butuna bwa sibaka se ba swanela ku kutaza teñi. Ha ba zwafiswi ki ku sa lata ku teeleza kwa batu kamba ki ku lwaniswa. Ba sebeza ka t’ata mwa ku peta musebezi wa bona wa ku kutaza Mubuso. Ba taluseza batu taba ye nde ko ba fumaneha kaufela—mwa mayemisezo a limbayambaya mwa United States (1), kwa libala la fulai la mwa Korea (2), mwa Andes (3), kamba kwa musika wa mwa London (4). Balateleli ba Jesu ba cwale ka tabo ba eza musebezi wa bona o tahisa mupuzo mwa lifasi kaufela. Mi sina mwa n’a sepiselize, u ba imuluzi mi u itusisize bona kwa ku imulula ba bañwi ba bañata.—Sinulo 22:17.