Mu Sepe Jehova Mulimu Wa Niti

Kana mu kile mwa talima kwahalimu busihu inze ku ngwelukile ni ku bona buñata-ñata bwa linaleli? Mu li li tahile cwañi?

BUSIHU inze ku kuzize, linaleli ne li bulezi ku Mulena Davida wa Isilaele wa kwaikale, ili ku mu susumeza ku ñola kuli: “Mahalimu a bulela kanya ya Mulimu; mi sibaka sa lihalimu si bonahalisa musebezi wa mazoho a hae.” (Samu 19:1) Ee, Mubupi ki yena ya lukela “ku fiwa kanya, ni likute, ni mata,” isi pupo.—Sinulo 4:11; Maroma 1:25.

Bibele i li: “Ya yahile lika kamukana ki Mulimu.” (Maheberu 3:4) Kaniti, Mulimu wa niti ‘wa libizo la [Jehova, NW] ki Yena Muambakani-ya-Pahami, wa lifasi kaufela.’ (Samu 83:18) Haki wa buhata—inge mazimumwangala. Ka za Jehova, Ndat’ahe wa kwa lihalimu, Jesu Kreste n’a ize: “Ya ni lumile ki wa niti.”—Joani 7:28.

Jehova—Mutalelezi wa Milelo ya Hae

Libizo la Mulimu le li ipitezi, Jehova, li fumaneha h’a 7,000 mwa litaba za makalelo za Mañolo a Siheberu. Lona libizo leo ka sibili li bonisa buniti bwa kuli ki wa niti. Libizo la Mulimu li talusa luli kuli “Ya Tahisa ku Ba Teñi.” Kacwalo Jehova Mulimu u italusa ku ba Mutalelezi wa milelo ya hae. Mushe ha n’a buzize Mulimu libizo la hae, Jehova a tolongosha taluso ya lona cwana: “Ni ka ba ze ni ka ba.” (Exoda 3:14, NW) Toloko ya Rotherham i talusa ka ku nonga kuli: “Ni Ka Ba se ni tabela kaufela.” Jehova u banga, kamba u ketanga ku ba se si tokwahala kaufela kuli milelo ya hae ye lukile ni lisepiso za hae li petahale. Kacwalo, u na ni malumbatina a mañata, a cwale ka Mubupi, Ndate, Mulena, Mulisana, Jehova wa limpi, Ya Utwa milapelo, Muatuli, Muluti ya Pahami, Muliululi.—Baatuli 11:27; Samu 23:1; 65:2; 73:28; 89:26; Isaya 8:13; 30:20, NW; 40:28; 41:14.

Ki Mulimu wa niti fela ya swanela ku ba ni libizo la Jehova, kakuli batu ha ba koni ku ikolwisa kuli milelo ya bona i ka konda. (Jakobo 4:13, 14) Ki Jehova fela ya kona ku bulela kuli: “Sina pula ni litwa ha li zwa kwa lihalimu, mi li sa kuteli kwateñi li si ka kolobisa lifasi, kuli li zwiseze mucali peu, ni muci buhobe, ki mo ku inezi ni kwa linzwi la ka, le li zwa mwa mulomo wa ka; ha li na ku kutela ku Na mukungulu, li si ka sebeza se si latwa ki Na, ni ku eza ze ni li lumezi.”—Isaya 55:10, 11.

Jehova u peta milelo ya hae ka buikolwiso kuli mane nihaiba lika ze ba bona batu kuli haki za niti ku yena ki za niti. Nako ye telele ku zwa fo ba shwela bo Abrahama, Isaka, ni Jakobo, Jesu n’a ba pundile ni ku bulela kuli: “Mulimu hasi Mulimu wa ba ba shwile, kono ki wa ba ba pila. Kakuli ku Yena, batu kaufela ki ba ba pila.” (Luka 20:37, 38) Litoho za mabasi ba balalu ba ba sepahala bao  ne ba shwile, kono mulelo wa Mulimu wa ku ba zusa kwa bafu ne u ka talelezwa luli kakuli ku yena ne ba li inge ba ba pila. Ku Jehova, ku kutisa batanga ba ba sepahala ba kwaikale bao haki nto ye t’ata hahulu ku fita mo ne ku inezi ha n’a bupile mutu wa pili ku zwelela kwa liluli la lifasi.—Genese 2:7.

Muapositola Paulusi n’a file mutala o muñwi wa kuli Mulimu u tahisa za lelile kuli li petwe. Mwa Mañolo, Abrahama u bizwa “ndat’ahe macaba a mañata.” (Maroma 4:16, 17) Abrame a si ka ba kale ni mwana, Jehova a cinca libizo la hae ku ba Abrahama, ili ku talusa “Ndat’ahe Macaba (Likwanamunu).” Jehova n’a tahisize talelezo ya taluso ya libizo leo ka ku kutiseza ka makazo m’ata a lupepo ku Abrahama ni musal’a hae Sara be ne ba se ba supezi.—Maheberu 11:11, 12.

Ka ku fiwa m’ata a matuna ni tamaiso, Jesu Kreste n’a bulela ka za lika za niti ka mubonelo o ipitezi hahulu ku fita wa batu. Mulikan’a hae yo mutuna Lazaro niha n’a shwile, Jesu n’a bulelezi balutiwa ba hae kuli: “Lazaro mulikan’a luna u lobezi; kono ni sa y’o mu zusa.” (Joani 11:11) Ki kabakalañi Jesu ha n’a bulela ka za mutu ya shwile kuli u lobezi fela?

Jesu ha n’a fitile mwa munzi wa Betania mwa n’a pila Lazaro, a ya kwa libita ni ku yo laela kuli licwe le ne li kwahezwi kwa libita li zwiswe kwateñi. Hamulaho wa ku lapela ka ku tumusa, a laela kuli: “Lazaro, zwa mo.” Mi bashalimeli kaufela inze ba ndwendukezi kwa libita, “mufu a zwa, a tatilwe kwa mahutu ni kwa mazoho ka masila, mi pata ya hae i apesizwe taulo.” Kacwalo Jesu a li: “Mu mu tatulule, mi mu mu lisele a izamaele.” (Joani 11:43, 44) Jesu n’a zusize Lazaro kwa bafu, ee, ku kutiseza kwa bupilo mutu ya n’a shwile ka mazazi a mane! Jesu n’a sa pumi ha n’a bulezi kuli mulikan’a hae n’a lobezi. Ka mubonelo wa Jehova ni Jesu, Lazaro ya n’a shwile n’a swana inge ya lobezi fela. Ee, Jesu ni Ndat’ahe wa kwa lihalimu ba eza lika za niti.

Jehova Wa Kona ku Taleleza Lisepo za Luna

Ki shutano kwa butuna ye mwahal’a milimu ya buhata ni Mulimu wa niti! Ba ba lapela maswaniso ka mafosisa ba a nga kuli a na ni m’ata a’ fita a batu. Kono maswaniso ao ni ha ka tompiwa cwañi kamba cwañi, h’a koni ku eza limakazo. Kono Jehova Mulimu u kona ku ama kwa batanga ba hae ba ba shwile kale ku ba inge ba ba sa pila kakuli wa kona ku ba pilisa hape. “[Jehova, NW], Yena, ki Mulimu wa niti” mi h’a pumangi batu ba hae.—Jeremia 10:10.

Kwa omba-omba luli ku ziba kuli mwa nako ya Jehova ye swanela, bafu ba ba hupulwa ki yena ba ka zusiwa—ili ku kutisezwa kwa bupilo! (Likezo 24:15) Ee, zuho ya bafu i ama ku kutisa mw’a inezi mutu y’o. Ku Mubupi, ili y’a butali ni m’ata ze si na mo li felela, ki nto ye bunolo ku hupula butu bwa batu ba ba shwile ni ku ba zusa kwa bafu. (Jobo 12:13; Isaya 40:26) Bakeñisa kuli Jehova u lilato hahulu, u ka itusisa muhupulo wa hae o petehile ku kutiseza bafu kwa bupilo fa lifasi le li li paradaisi ka ku ba ni butu bo ne ba na ni bona ba si ka shwa kale.—1 Joani 4:8.

 Lifasi la Satani ha li nze li atumela kwa mafelelezo a lona, ba ba sepile Mulimu wa niti bona ba libelela ze nde luli kwapili. (Liproverbia 2:21, 22; Daniele 2:44; 1 Joani 5:19) Walisamu u lu kolwisa kuli: “Ku sa na ni nakonyana ye nyinyani, mi ya maswe h’a sa na ku ba teñi; . . . kono ba ba ishuwa ba ka luwa naha, ba ka ikola kozo ye tuna.” (Samu 37:10, 11) Bukebenga ni mifilifili li ka feliswa. Ku ka ba ni katulo ye lukile, mi ha ku na ku ba ni butata bwa za mali. (Samu 37:6; 72:12, 13; Isaya 65:21-23) Ketululo kaufela ye li teñi mwahal’a macaba, mishobo, ni mikowa, i ka feliswa. (Likezo 10:34, 35) Ha ku sa na ku ba ni lindwa ni lilwaniso za ndwa. (Samu 46:9) Ka nako yeo, ‘ha ku na mutu ya ka ipulela kuli: Na kula.’ (Isaya 33:24) Mañi ni mañi u ka ikangula hande ni ku petahala. (Sinulo 21:3, 4) Paradaisi i tuha i ba teñi fa lifasi. Jehova u lelile ku eza cwalo!

Ee, lisepo kaufela ze tomile fa Bibele li tuha li talelezwa. Lu kona ku lumelelañi ku pumiwa ki lika ze ezizwe ku ba milimu ze mwa lifasi le, hailif’o inge lu kona ku sepa Jehova ka ku tala? Ki tato ya hae kuli “batu kamukana ba piliswe, mi ba fite fa zibo ya ku ziba niti.” (1 Timotea 2:3, 4) Mwa sibaka sa ku neela nako ni lika za luna ku za mbango, kamba mazimumwangala a muinelo w’o wa linto ni milimu ya ona, ha lu huleñi mwa zibo ya ku ziba Mulimu wa niti ni ku mu sepa ka lipilu za luna kaufela.—Liproverbia 3:1-6; Joani 17:3.

[Siswaniso se si fa likepe 6]

Ka mubonelo wa Jehova ni Jesu, Lazaro n’a lobezi fela

[Maswaniso a fa likepe 7]

Paradaisi i tuha i taha fa lifasi