Ki Lifi Ze Tokwahala mwa ku

Buluka Lizwalo Le Li Kenile?

“MULONGA U Laelwa ku Amuhela Mali A Eza R$20,000.” Cwanoñu fa, toho ya taba ye sienyi yeo, ne i ñozwi mwa mutende wa kwa Brazil o bizwa Correio do Povo. Taba yeo ne i talusize likande la Luiz Alvo de Araújo, ya sebeza sina muisi wa mañolo kwa bañi ba ona mwa silalanda, ili ya n’a lekisize mubu kwa mulonga wa naha. Hamulaho wa ku fa buswa b’o mwa mazoho a mulonga, Luiz a makala ku fumana kuli na lifilwe mali a kekezeho a’ eza R$20,000 (ibato ba K30,000,000)!

Ne ku si bunolo ku kutisa mali ao a kekezeho. Hamulaho a misipili ye sikai ya mbango kwa makolo a mulonga, Luiz n’a elelizwe ku leka caziba wa mulao ya n’a ka mu yemela ilikuli a feze butata b’o fapil’a kuta. Muatuli ya n’a atuzi kuli mulonga u amuhele mali ao ni ku lifa lisinyehelo za ku isa taba kwa kuta n’a talusize kuli: “Ka mo ku bonahalela mutu yo muñwi n’a ezize mafosisa, mi bakeñisa ku tatezana kwa miezezo ya lika ya mulonga, ne ku si na ya n’a ziba hande mwa ku tatululela muinelo wo. Ki lwa pili ni bona taba ye cwalo mwa bupilo bwa ka kaufela.”

Luiz, yo muñwi wa Lipaki za Jehova, u talusa kuli: “Lizwalo la ka le li lutilwe ka Bibele ne li si ka ni lumeleza ku buluka nto ye ne i si ya ka. Ne ni lukela luli ku lika ku kutisa mali ao.”

Ba bañata ba kana b’a nga mubonelo w’o ku ba o sienyi kamba mane o sa utwisisehi. Kono Linzwi la Mulimu li bonisa kuli Bakreste ba niti b’a nga ka butuna ku bukeleza lizwalo la bona inze li kenile mwa ku sebelisana kwa bona ni babusi ba silifasi. (Maroma 13:5) Lipaki za Jehova ba ikatulezi ku bukeleza ‘lizwalo le linde ni kuli mwa lika kaufela ba eze se si lukela.’—Maheberu 13:18.