Lipuzo Ze Zwa kwa Babali

Kana ku sa petahala kwa mwalyanjo Maria ne ku hozisize Jesu ku sa petahala ka nako yeo Maria n’a itwezi Jesu?

Ka za “ku pepwa kwa Jesu,” taba ye ñozwi ka moya wa Mulimu i li: “Maria, m’ahe, h’a n’a beelelizwe ki Josefa, a komoka h’a beilwe fa mezi a manca ki Moya o Kenile, ba si ka ina hamoho.” (Mateu 1:18) Ee, moya o kenile wa Mulimu n’o petile kalulo ye tuna fa n’a itwalezi Maria.

Kono ku cwañi ka za Maria? Kana lii la hae ne li petile kalulo ye ñwi mwa ku itwala kwa hae? Ka ku nyakisisa za n’a sepisize Mulimu ku bo Abrahama, Isaka, Jakobo, Juda, ni Mulena Davida—bokukw’a Maria—mwana ya n’a ka pepiwa n’a na ni ku ba muikulu wa bona luli. (Genese 22:18; 26:24; 28:10-14; 49:10; 2 Samuele 7:16) Ki yona fela nzila yeo ka yona mwana ya n’a ka pepiwa ki Maria y’o n’a ka swanela ku ba mucalifa wa lisepiso za Mulimu. N’a na ni ku ba mwan’a hae luli.—Luka 3:23-34.

Lingeloi la Jehova ne li tile ku mwalyanjo Maria, mi la t’o li: “U si ke wa saba, Maria: kakuli u boni sishemo ku Mulimu. Mi, bona, u ka ba fa mezi a manca, u pepe mwan’a mushimani, mi u ka mu beya libizo la Jesu.” (Luka 1:30, 31) Kuli musali a be fa mezi a manca, ku tokwahala kuli lii li nuniswe. Ku bonahala kuli Jehova Mulimu n’a ezize kuli lii la mwa mba ya Maria li nune. N’a ezize cwalo ka ku shimbululela bupilo bwa Mwan’a hae wa libanda bwa mwa liluko la moya ku taha fa lifasi.—Magalata 4:4.

Kana mwana ya pepiwa cwalo ki musali ya si ka petahala wa kona ku ba ya petahezi ili ya si na sibi mwa mubili wa hae? Milao ya sihozo i sebeza cwañi ku petahala ha ku kopana ni ku sa petahala? Mu si libali kuli moya o kenile n’o itusisizwe mwa ku shimbulula m’ata a bupilo bo bu petehile bwa Mwan’a Mulimu ni ku tahisa ku itwala. Kabakaleo, ku sa petahala kaufela ko ne ku li mwa lii la Maria ne ku felisizwe, ili ku tahisa mutu ya n’a petehile ku zwa kwa makalelo.

Ka mo ne ku bezi kaufela, lwa kona ku kolwa kuli musebezi wa moya o kenile wa Mulimu ka nako yeo n’o konisize kuli mulelo wa Mulimu u petahale. Lingeloi Gabriele ne li taluselize Maria kuli: “Moya o Kenile u ka shulumukela ku wena, mi mata a Muambakani-ya-Pahami a ka ku ukama; ki fo, Ya-Kenile ya ka pepwa ki wena u ka bizwa Mwan’a Mulimu.” (Luka 1:35) Ee, moya o kenile wa Mulimu ka swanisezo n’o bile lukwakwa, ilikuli mwana ya n’a sweli ku hula mwa mba a si ke a hoza ku sa petahala kamba nto ifi kamba ifi ye maswe.

Kaniti, Jesu n’a bile mutu ya petehile bakeñisa Ndat’ahe ya kwa lihalimu, isiñi mutu ufi kamba ufi. Jehova n’a mu “lukiselize mubili,” mi Jesu—ku zwa fa n’a kalezi ku hula mwa mba—kaniti luli n’a li “ya si na . . . se si masila, ya kauhani ni baezalibi.”—Maheberu 7:26; 10:5.

[Siswaniso se si fa likepe 19]

“U ka ba fa mezi a manca, u pepe mwan’a mushimani”