Mu Tone, Mu Zwelepili ka Bundume!

Piho Ya Mikopano Ye Ipitezi

KI MAÑI ya kona ku hana luli kuli lu pila mwa “linako ze tata”? Ka ku ba Lipaki za Jehova, ni luna lwa katazwa ki mapacaca a ku pila mwa “mazazi a maungulelo.” (2 Timotea 3:1-5) Kono lu lemuha kuli batu ba tokwa tuso. Ha ba zibi libaka lika mwa lifasi ha li li cwana. Ba tokwa ku omba-ombiwa ni ku fiwa sepo. Ki lifi zeo sihulu lu peta mwa ku tusa batu ba bañwi?

Mulimu u lu file musebezi wa ku shaela taba ye nde ka za Mubuso wa Mulimu o tomilwe. (Mateu 24:14) Batu ba tokwa ku ziba kuli Mubuso w’o wa kwa lihalimu ki ona fela o ba kona ku sepa batu. Kono taba ye lu shaela haki kamita i amuhelwa hande. Mwa libaka ze ñwi, musebezi wa luna u hanisizwe mi mizwale ba luna se ba nyandisizwe. Niteñi, ha lu tuheli. Ka ku sepa hahulu Jehova, lu ka tundamena ku tona ni ku zwelapili ka bundume, ili ku shaela taba ye nde lu sa liseli.—Likezo 5:42.

Tundamo ye tiile yeo ne i iponezwi kwa mikopano ye ipitezi ye n’e ezizwe mwa October ya 2001. La Mukibelo, ili ka la 6 October, mukopano wa ka silimo wa Watch Tower Bible and Tract Society of Pennsylvania n’o ungekilwe kwa Ndu ya Mukopano ya Lipaki za Jehova ya kwa Jersey City, kwa New Jersey, ili mwa United States. * Zazi le ne li tatami, kwa ungekwa mikopano ye miñwi mwa libaka z’e ne, ili zeo ze talu ku zona li mwa United States mi si li siñwi mwa Canada. *

Ku za n’a bulezi kwa makalelo a mukopano wa ka silimo w’o, muina-situlo, Samuel F. Herd, ili silama sa Sitopa Se Si Etelela sa Lipaki za Jehova, n’a amile kwa Samu 92:1, 4 mi a li: “Lu bata ku bonisa buitumelo.” Ee, mabaka a ku ba ni buitumelo ne a filwe ka lipiho ze ketalizoho ze futuka kwa linaha ze fitana-fitana mwa lifasi.

Lipiho Ze Futuka Kai ni Kai

Muzwale Alfred Kwakye n’a bihile za zwelopili ya bukutazi mwa Ghana, naha yeo sapili ne i bizwa Gold Coast. Musebezi wa luna mwa naha yeo n’o hanisizwe ka lilimonyana. Batu ne ba buzanga kuli: “Mu haniselizweñi? Kanti  mu ezizeñi?” Muzwale Kwakye n’a talusize kuli seo ne si tahisize kolo ya ku paka. Ka 1991 kaniso ha ne i felisizwe, mwa Ghana ne ku na ni Lipaki za Jehova b’a 34,421. Ka August ya 2001, palo hamoho ya eza 68,152—ili kekezeho ya 98 pesenti. Mane ku singanyekiwa za ku yaha Ndu ya Mikopano ya lipula ze 10,000. Kaniti, mizwale ba luna ba Sikreste mwa Ghana ba itusisa hahulu tukuluho ya bona ya ku lapela.

Ku si na taba ni kalilabule ka za bupolitiki, mizwale ba luna mwa Ireland ba patehile mwa bukombwa, mi ba kutekwa ka buikambuso bwa bona. Mwa Ireland ku na ni liputeho ze 115 ni mipotoloho ye 6, ka mwa n’a bulelezi Peter Andrews, muzamaisi wa Katengo ka Mutai. Muzwale Andrews n’a kandekile za Liam, mushimani wa lilimo ze lishumi ya pakanga kwa sikolo a sa sabi. Liam n’a abezi Buka Ya Ka ya Makande a Bibele, ye hatisizwe ki Lipaki za Jehova, ku b’a 25 ba mwa sitopa sa hae hamoho ni ku bo muluti ba hae. Liam n’a bata ku kolobezwa, kono yo muñwi a mu buza ka za haiba n’e si mwanana hahulu. Liam a li: “Se si swanela ku ba sa butokwa ki lilato la ka ku Jehova, isi buhulu. Kolobezo ya ka i ka bonisa mo ni mu latela hahulu.” Mulelo wa Liam ki ku ba mulumiwa.

Ka 1968, mwa Venezuela ne ku na ni bahasanyi ba taba ye nde b’a 5,400. Kono cwale se ba fitelela 88,000, ka mwa n’a taluselize Stefan Johansson, muzamaisi wa Katengo ka Mutai. Mi kwa sepisa kuli ku ka ba ni kekezeho kakuli ba ba fitelela 296,000 ne ba bile kwa Kupuzo mwa 2001. Mwa December ya 1999, ñundupula ne i bilauzi sileze se ne si bulaile batu ba ba akalezwa ku ba b’a 50,000, ku kopanyeleza ni Lipaki ba bañata. Ndu ya Mubuso ye ñwi ne i tezi sileze kuli mane ne si batil’o fita kwa situwa. Yo muñwi ha n’a akalelize kuli muyaho w’o u siiwe, mizwale ba alaba kuli: “Ha ku konahali! Ndu ya Mubuso ye ki ya luna, mi ha lu lati ku i siya cwale.” Ba sebeza ka t’ata, ili ku zwisa mabunda-bunda a sileze, macwe, ni matakala a mañwi. Muyaho wa lukiswa sinca, mi mizwale ba bulela kuli ki o munde hahulu ku fita mo n’o belanga pili kozi i si ka lenga kale!

Muzwale Denton Hopkinson, muzamaisi wa Katengo ka Mutai, n’a ize mwa Philippines ku bulelwa lipuo ni malimi a’ 87. Mwa silimo sa sebelezo se si felile, New World Translation of the Holy Scriptures mukatumbi ne i zwisizwe mwa lipuo ze talu ze tuna za mwa naha, zona za Cebuano, Iloko, ni Tagalog. Muzwale  Hopkinson n’a kandekile ka za mushimani wa lilimo ze 9 ya n’a balile buka ye ba hatisize Lipaki za Jehova, ye li Good News—To Make You Happy. N’a kupile lihatiso ze ñwi kwa mutai, mi ni zona zeo a li bala, kono lubasi lwa hae lwa mu lwanisa. Lilimo-limo hasamulaho, ha n’a kena sikolo sa budokota, a buza kwa mutai mi a kupa tuto ya Bibele. N’a kolobelizwe mwa 1996 mi hañihañi a kala bukombwa bwa ka nako ye tezi. Cwale yena ni musal’a hae ba sebeleza fa ofisi ya mutai.

Muzamaisi wa Katengo ka Mutai, Ronald Parkin, n’a talusize kuli, ‘Puerto Rico i lumelanga hahulu Lipaki kwa linaha li sili.’ Sooli seo si na ni bahasanyi ba ba bat’o ba b’a 25,000, mi palo yeo ha i si ka shenya ka lilimo-limo. Libaka? Ku akalezwa kuli ka silimo Puerto Rico i lumelanga United States ibat’o ba bahasanyi b’a 1,000, mi buñata bwa bona ba shimbulukanga kabakala misebezi ni ze ñwi cwalo. Muzwale Parkin n’a kandekile ka za katulo ye tuna ya kuta ili ye n’e ama Luis, Paki wa lilimo za buhulu ze 17 ya n’a kula butuku bwa mali bo bu bizwa leukemia. Bakeñisa kuli Luis n’a hanile ku pompelwa mali, taba ya hae ya iswa kwa kuta. Muatuli n’a bata ku ambola ni yena ka sibili, kacwalo a y’o mu lekula kwa sipatela. Luis a mu buza kuli: “Ki kabakalañi ha ku eziwa kuli, kambe ni ezize mulatu o mutuna, ne mu ka ni atula sina mutu ya hulile, kono ha ni bata ku ipeya ku utwa Mulimu, mu ni eza inge kuli ni sa li mwanana?” Muatuli a kolwa kuli Luis ne li mwanana ya hulile mwa munahano ili ya kona ku ikatulela za ku eza.

Hamulaho wa lipiho zeo za kwa linaha ze kwahule, Harold Corkern, wa Katengo ka Mutai ka United States, a zamaisa lipuhisano ni batanga ba bane ba Jehova ili ba kale. Arthur Bonno u ezize sebelezo ya ka nako ye tezi ka lilimo ze 51 mi cwale ki yo muñwi wa Katengo ka Mutai ka Ecuador. Angelo Catanzaro u tandile lilimo ze 59 mwa sebelezo ya ka nako ye tezi, mi buñata bwa zona u li felelize mwa buokameli bwa maeto. Richard Abrahamson n’a kwazize Sikolo sa Giliadi ka 1953, mi n’a okamezi musebezi mwa Denmark ka lilimo ze 26 a si ka kutela kale kwa Betele ya mwa Brooklyn. Kwa nalulelule, bote ne ba ikozi ku teeleza ku Carey W. Barber, wa lilimo za buhulu ze 96. Muzwale Barber, ya n’a kolobelizwe ka 1921, u tandile lilimo ze 78 mwa bukombwa bwa ka nako ye tezi mi u bile silama sa Sitopa Se Si Etelela ku kala ka 1978.

Lingambolo Ze Susumeza

Mukopano wa ka silimo hape n’o bile ni lingambolo ze kena hahulu mwa munahano. Muzwale Robert W. Wallen n’a bulezi fa taba ye li “Sicaba Se Si Sumekezwi Libizo la Hae.” Luna lu sicaba se si sumekezwi libizo la Mulimu, mi lu kona ku fumanwa mwa linaha ze fitelela 230. Jehova ‘u ka lu fa ze sepisa kwapili.’ (Jeremia 29:11) Lu lukela ku zwelapili ku hasanya za Mubuso wa Mulimu, ili ku taluseza batu taba ye munati ye omba-omba ni ku toba pilu. (Isaya 61:1) Muzwale Wallen a feza, a li, “Haike zazi ni zazi lu zwelepili ku pila ka ku peta ze li talusa libizo le lu bizwa ka lona, la Lipaki za Jehova.”—Isaya 43:10.

Kalulo ya mafelelezo ya tukiso ne li lingambolo za ka ku tatamana ze n’e filwe ki lilama ze talu za Sitopa Se Si Etelela. Ne i ize “Ye Ki Yona Nako ya ku Tona, ku Tiya, ni ku Ba ni M’ata.”—1 Makorinte 16:13.

Pili, Muzwale Stephen Lett n’a bulezi fa taba ye li “Mwa Nako Ye S’e Fela Ye, Mu Tone.” Muzwale Lett n’a talusize kuli ku lobala ki mpo. Ku lu kutiseza m’ata. Kono ku lobala kwa moya haki ko kunde ni hanyinyani. (1 Matesalonika 5:6) Cwale lu kona ku zwelapili cwañi ku tona kwa moya? Muzwale Lett n’a file “mapilusi” a malalu a kwa moya, kuli: (1) Mu patehe mwa musebezi wa Mulena. (1 Makorinte 15:58) (2) Mu lemuhe butokwi bwa mina bwa kwa moya. (Mateu 5:3) (3) Mu latelele kelezo ye tomile fa Bibele ilikuli mu eze lika ka butali.—Liproverbia 13:20.

Muzwale Theodore Jaracz n’a file ngambolo ye susumeza ye li “Mu Tiye mwa Muliko.” Ka ku ama kwa Sinulo 3:10, Muzwale Jaracz a buza, a li: “‘Nako ya muliko’ ki nto mañi?” Muliko w’o u zuha “mwa lizazi la Mulena,” mo lu  pila cwale. (Sinulo 1:10) Muliko w’o u ama hahulu taba ye tuna ye, ye li, Kana lu kwa lineku la Mubuso wa Mulimu o tomilwe kamba kwa lineku la muinelo wa linto wa Satani ili o maswe? Ku fitela nako ya muliko yeo i fela, lu tamehile ku tahelwa ki miliko kamba butata. Kana lu ka swalelela ku sepahala ku Jehova ni kopano ya hae? Muzwale Jaracz a bulela kuli, ‘Lu ka tokwa ku bonisa busepahali bo bu cwalo ka butu.’

Ka ku feleleza, Muzwale John E. Barr a bulela fa taba ye li “Mu Be ni M’ata ka ku Ba Ba Ba Tiile kwa Moya.” Ka ku ama kwa Luka 13:23-25, a talusa kuli lu lukela ku itiisa hahulu kuli lu “kene mwa munyako o kumbani.” Ba bañata ba palelwanga kakuli ha ba itiisangi hahulu ku ba ni m’ata. Kuli lu be Bakreste ba ba hulile, lu lukela ku ituta ku latelela likuka za Bibele mwa miinelo kaufela ya bupilo. Muzwale Barr n’a elelize kuli: “Ni sepa kuli mu ka lumela kuli ye, ki nako ya kuli (1) Jehova a be yena wa pili ili wa butokwa ka ku fitisisa; (2) lu be ni m’ata; mi (3) lu eze tato ya Jehova ka t’ata. Kacwalo lu ka kona ku kena mwa munyako o kumbani o isa kwa bupilo bo bunde-nde bo bu si na mafelelezo.”

Mukopano wa ka silimo ha n’o nz’o fela, ne ku siyezi puzo i liñwi ye ne i si ka alabiwa, ye li: Ki lifi liñolo la silimo sa sebelezo sa 2002? Puzo yeo ne i alabilwe lizazi le ne li tatami.

Mukopano O Muñwi

Ne ku na ni liyewa-yewa la Sunda kakusasana tukiso ya mukopano o muñwi ha ne i kalile. Ne i kalile ka ngambolo ye kusufalizwe ya tuto ya viki yeo ya Tora ya ku Libelela, ku tuha f’o kwa bulelwa ka bukuswani ze ñwi za ze zwile mubano za mukopano wa ka silimo w’o. Zeo ha li felile, bote ba ikola ku teeleza kwa ngambolo ye ama liñolo la silimo la 2002, le li li: “Mu tahe ku na . . . , mi ni ka mi imulula.” (Mateu 11:28) Ngambolo yeo ne i tomile fa litaba za tuto ze n’e hatisizwe hasamulaho mwa Tora ya ku Libelela ya December 15, 2001.

Ku tuha f’o, ba bañwi be ne ba bile kwa mikopano ye ipitezi ya “Baluti ba Linzwi la Mulimu” ye n’e bile mwa France ni Italy mwa August ya 2001 ba bulela ze ne ba boni. * Kwa nalulelule, lingambolo ze peli za mafelelezo za fiwa ki babuleli ba bapoti ba kwa Betele ya mwa Brooklyn, zona ze n’e zwile mubano fa tukiso ya lizazi leo.

Ya pili ne i na ni toho ye li “Ku Sepa ka Bundume Jehova mwa Linako Ze T’ata Ze.” Mubuleli n’a tolongoshize litaba ze tuna ze: (1) Ku sepa ka bundume Jehova kamita ku bile kwa butokwa kwa batu ba Mulimu. Bibele i tezi mitala ye miñata ya be ne ba bonisize bundume ni tumelo ha ne ba lwanisizwe. (Maheberu 11:1–12:3) (2) Jehova u fa mutomo o tiile wa kuli lu mu sepe ka ku tala. Misebezi ya hae ni Linzwi la hae li lu sepisa kuli wa babalela batanga ba hae ni kuli h’a na ku ba libala ni kamuta. (Maheberu 6:10) (3) Kacenu ku tokwahala hahulu bundume ni sepo. Jesu n’a bulezi cimo kuli ne lu ka “toiwa.” (Mateu 24:9) Kuli lu itiise, lu tokwa ku itinga fa Linzwi la Mulimu, ku sepa kuli moya wa hae u inzi ni luna, ni ku ba ni bundume bwa ku zwelapili ku bulela taba ye nde. (4) Mitala i bonisa kuli lu sweli lwa lwaniswa yona nako ye. Bote ne ba susumelizwe hahulu mubuleli ha n’a kandekile ze ba tiyezi mizwale ba luna mwa Armenia, France, Georgia, Kazakhstan, Russia, ni Turkmenistan. Kaniti, ye ki yona nako ya ku bonisa bundume ni ku sepa Jehova!

Mubuleli ya n’a unguzi n’a tolongoshize taba ye li “Ku Zwelapili ka ku Swalisana ni Kopano ya Jehova.” Ngambolo yeo ne i nyakisisize lisupo li sikai ze lukela. (1) Zwelopili ye sa  yemi ya sicaba sa Jehova ya zibwa kai ni kai. Ku kutaza kwa luna ni mikopano ya luna ya lu bonahaza kwa nyangela. (2) Jehova u tomile kopano ye swalisani. Ka 29 C.E., Jesu n’a tozizwe ka moya o kenile ka mulelo wa kuli “linto kamukana”—bona ba ba ketezwi lihalimu hamoho ni ba ba sepa ku pila fa lifasi-mubu—ba kenyiwe mwa lubasi lwa Mulimu lo lu pila mwa buñwi. (Maefese 1:8-10) (3) Mikopano ki poniso ye tuna ya buñwi bwa macaba a mañata. Nto yeo ne i iponezwi hande-nde kwa mikopano ye ipitezi ye ne i ezizwe mwa France ni Italy ñohola mwa August. (4) Ne ku amuhezwi katulo ye nyangumuna mwa France ni Italy. Mubuleli n’a talusize likalulo li sikai za katulo ye susumeza yeo. Litaba kaufela za katulo yeo li bonisizwe kwatasi.

Kwa mafelelezo a ngambolo ya ku kwaza, mubuleli wa mupoti a bala zibiso ye susumeza ye ne i lukisizwe ki Sitopa Se Si Etelela. Ze ñwi ze ne i bulezi kikuli: “Ye, ki nako ya ku tona kamita ni ku libelela, ili ku lemuha mo li cinceza lika mwa lifasi. . . . Lu bata ku mi zibisa kuli Sitopa Se Si Etelela sa mi nahana ka lilato hamoho ni batu kaufela ba Mulimu. Haike a mi fuyole hahulu-hulu mwa ku eza kwa mina tato ya hae ka moyo kaufela.” Batu ba Jehova kai ni kai ba na ni tundamo ya ku tona mwa linako ze t’ata ze ni ku zwelapili ka bundume ka ku zamaelela ni kopano ya Jehova ye swalisani.

[Litaluso za kwatasi]

[Mbokisi/Maswaniso a fa likepe 29-32]

Katulo

Mwa August ya 2001, mikopano ye ipitezi ya “Baluti ba Linzwi la Mulimu” ne i ezizwe mwa France ni Italy. Kwa mikopano yeo, ne ku balilwe katulo ye susumeza. Litaba za katulo yeo ki ze:

“KA KU BA LIPAKI ZA JEHOVA, kaufel’a luna ba ba putehile fa mukopano wo wa ‘Baluti ba Linzwi la Mulimu’ lu filwe lituto ze tusa hahulu. Ko li zwa lituto zeo ku talusizwe hande. Lituto zeo haki batu ba ba li simuluzi. Li zwa ku Yena y’o mupolofita wa ikale Isaya n’a ize ki ‘Muluti wa luna ya Pahami.’ (Isaya 30:20, NW) Ki ye kupuliso ya Jehova ye bulezwi kwa Isaya 48:17: ‘Ki Na [Muñ’a] Bupilo Mulimu wa hao, ni ku luta se si ku swanela, ni ku zamaisa ka nzila y’o lukela ku zamaya ku yona.’ U peta cwañi nto yeo? Sihulu ki ka buka ye tolokilwe ni ku hasanywa hahulu ka ku fitisisa mwa lifasi, yona Bibele, mo lu bulelelwa hande-nde kuli: ‘Liñolo kamukana li tahile ka Moya wa Mulimu, mi li na ni tuso.’—2 Timotea 3:16.

“Kacenu, batu ba tokwa hahulu-hulu lituto ze tusa zeo. Libaka? Batu ba ba nahanisisa ba lumelañi ha ba bona miinelo mwa lifasi le, ye cinca ni ku zinga? Ba lumela fela kuli: Nihaike bolule-lule ba lutilwe kwa likolo za silifasi, ka bumai bo butuna, likuka sakata ha li yo mi ha ba zibi ku taluhanya bunde kwa bumaswe. (Isaya 5:20, 21) Ba bañata-ñata ha ba si ka yelaseli Bibele. Hailif’o zwelopili i lu konisa ku fumana sifako sa litaba ka ku itusisa likompyuta, li kai likalabo kwa lipuzo za butokwa hahulu ze cwale ka z’e li: Mulelo wa bupilo ki ufi? Lu ka utwisisa cwañi likezahalo za nako ye? Kana ku na ni sepo sakata ya kuli kwapili lika li ka ba hande? Kana kozo ni buiketo li ka ba teñi luli? Hape, mwa lifalana za libuka za nyangela, ku tezi lihatiso ze eza lule-lule ze talima ibat’o ba litaba kaufela za butu. Niteñi, batu ba kutela mafosisa a kwamulaho. Bukebenga bwa benda. Matuku a n’a twi a felisizwe a kuta, hailif’o a mañwi, inge AIDS, a’ hasana ka ku kakamalisa. Mabasi a shandauka ka mukwa o komokisa. Mubu, mezi ni ze ñwi cwalo za sinyiwa ki silafalo. Likezo ze tahisa sabo ni businyi kwa linaha ni  lilwaniso ze kona ku kelyenga batu ka buñata li beya kozo ni buiketo mwa kozi. Matata a’ si na litatululo a’ ekezeha. Ki lifi ze lu lukela ku eza mwa ku tusa batu ba bañwi mwa linako ze t’ata ze? Kana ku na ni lituto ze talusa simuluho ya maziyezi a batu ili ze bonisa mwa ku konela ku pila hande cwale mi ili zeo li fa sepiso ye sepeha ya kuli lika li ka ba hande kwapili?

“Musebezi o lu filwe mwa Mañolo ki wa kuli ‘lu ye, lu lute macaba kaufela, ku ba luta ku mamela kaufela z’a laezi Kreste.’ (Mateu 28:19, 20) Musebezi w’o n’o filwe ki Jesu Kreste hamulaho wa ku timela ni ku zuswa kwa hae, ha n’a filwe bulena kaufela mwa lihalimu ni mwa lifasi. U fitela kwahule-hule misebezi kaufela ya butu. Ku Mulimu, musebezi wa luna, o kanatela hahulu fa butokwi bwa kwa moya bwa ba ba nyolelwa ku luka, ki ona wa butokwa ka ku fitisisa. Lu na ni mabaka a ngana a’ mwa Mañolo a ku nga musebezi w’o ka butuna.

“F’o ku tokwahala kuli musebezi w’o u be ona wa butokwa ka ku fitisisa mwa bupilo bwa luna. Ka mbuyoti ni tuso ya Mulimu, musebezi w’o u ka petwa, ku si na taba ni sifako sa lihakanyiso ze yaulula, litibelo, ni kanyezo ya ba bulapeli ni babusi, ze lelezwi ku sinanisa zwelopili ya tukiso ye ya ku luta mwa lifasi kaufela. Lu kozwi mi lu lumela kuli musebezi w’o u ka zwelapili ni ku fela hande mbu. Lu kona ku kolwa cwañi cwalo? Kakuli Mulena Jesu Kreste n’a sepisize kuli n’a ka ba ni luna mwa bukombwa bw’a lu file Mulimu ku y’o li ti kwa mafelelezo a muinelo wo wa linto.

“Nako ki ye nyinyani ye siyezi kwa batu ba ba ziyelehile. Musebezi wa luna wa cwale u lukela ku petwa pili mafelelezo a si ka taha kale. Kacwalo, luna, Lipaki za Jehova, lu eza katulo ya kuli:

“Pili: Ka ku ba likombwa ba ba ineezi, lu na ni tundamo ya ku bata pili za Mubuso mwa bupilo bwa luna ni ku zwelapili ku hula kwa moya. Kabakaleo, lu lapela ka ku lumelelana ni manzwi a’ kwa Samu 143:10, a’ li: ‘U ni lute ku eza tato ya hao, kakuli u Mulimu wa ka.’ F’o lu tokwa ku ba baituti ba bande, ba ba itiisa ku bala Bibele ka zazi, ku ituta ka butu ni ku eza patisiso. Kuli ku zwelapili kwa luna ku lemuhiwe ki batu kaufela, lu ka itiisa luli mwa ku itukiseza ni ku tuseha ka ku tala ka lituto za Mulimu ze fiwa kwa mikopano ya puteho, kwa mikopano ya mupotoloho, ni kwa mikopano ya sikiliti, ya mwa naha, ni ya mwahal’a macaba.—1 Timotea 4:15; Maheberu 10:23-25.

“Sa bubeli: Kuli Mulimu a lu lute, lu ka ca fela fa tafule ya hae ni ku mamela ka tokomelo temuso ye mwa Bibele ye lemusa za lituto za badimona ze yaulula. (1 Makorinte 10:21; 1 Timotea 4:1) Lu ka tokomela hahulu ku pima lika ze sinya, ze cwale ka lituto za bulapeli za buhata, mihupulo ya mbango, tobali ye swabisa ye si ya ka taho, kozi ya maswaniso a mapunu, za ku itabisa ka zona ze nyazahala, ni zote ze ‘sa utwani ni litaba ze pilisa.’ (Maroma 1:26, 27; 1 Makorinte 3:20; 1 Timotea 6:3; 2 Timotea 1:13) Ka za ‘batu ba ba li limpo,’ ba ba li ba ba swanela ku luta ze nde, lu ka kuteka ka buniti buikatazo bwa bona ni ku swalisana hahulu ni bona mwa ku yemela likuka ze kenile ili ze lukile za muzamao ni za kwa moya ze mwa Linzwi la Mulimu.—Maefese 4:7, 8, 11, 12, NW; 1 Matesalonika 5:12, 13; Tite 1:9.

“Sa bulalu: Sina bashemi ba Sikreste, lu ka ikataza hahulu ku luta bana ba luna ka mutala, isi fela ka lipulelo. Sihulu ze lu bata ki ku ba tusa ‘ku ituta Mañolo a kenile ku zwa kwa bwanana bwa bona, kuli ba talifiswe ilikuli ba piliswe.’ (2 Timotea 3:15) Lu ka hupula hahulu kuli ku ba hulisa ka ku ba lemusa ni ka tuto ya Jehova ku ka ba fa kolo ye nde ka ku fitisisa ya ku iponela sepiso ya Mulimu ya kuli ‘za bona li konde, mi ba pile mazazi a matelele mwa lifasi.’—Maefese 6:1-4.

“Sa bune: Ha lu ba ni lipilaelo kamba matata a’ matuna, sa pili se lu ka eza ki ku ‘zibisa Mulimu  se lu bata,’ ka ku kolwa kuli ‘kozo ya Mulimu ye fita kutwisiso kaufela ya butu’ i ka lu sileleza. (Mafilipi 4:6, 7) Kakuli lu itwesize coko ya Kreste, lu ka imuluha. Ka ku ziba kuli Mulimu wa lu tokomela, ha lu na ku liyeha ku fitisa lipilaelo za luna ku yena.—Mateu 11:28-30; 1 Pitrosi 5:6, 7.

“Sa buketalizoho: Ka ku bonisa buitebuho bwa luna ku Jehova kabakala ku ba baluti ba Linzwi la hae, lu ka zwelapili ku satalala ku ‘aba Linzwi la hae la niti ka mukwa o lukile’ ni ku ‘feleleza za bukombwa bwa luna.’ (2 Timotea 2:15; 4:5) Bakeñisa kuli lwa ziba hande-nde ze tokwahala, lu lakaza ka pilu kaufela ku bata ba ba lukela ni ku selaela peu ye calilwe. Hape, lu ka lwemuna mulutelo wa luna ka ku zamaisa hande lituto za Bibele za mwa mandu ze ñata. Ku eza cwalo ku ka tahisa kuli lu latelele hahulu tato ya Mulimu ya kuli ‘batu kamukana ba piliswe, mi ba fite fa zibo ya ku ziba niti.’—1 Timotea 2:3, 4.

“Sa busilela: Mwa lilimo za mwanda o felile ni ku ze se lu keni ku zona ze, Lipaki za Jehova mwa linaha ze ñata ba hanyelizwe ni ku nyandiswa ka linzila ze shutana-shutana. Kono Jehova u bile ni luna. (Maroma 8:31) Linzwi la hae le li sa bushi li lu sepisa kuli ‘ha ku na silwaniso se si ezezwa luna’ kuli si tibele, ku fukuza, kamba ku yemisa musebezi wa luna wa ku kutaza ni ku luta za Mubuso se si ka konda. (Isaya 54:17) Ibe mwa nako ye nde kamba ye maswe, ha lu koni ku tuhela ku bulela niti. Lu itamile kuli lu ka peta ka putako musebezi o lu filwe wa ku kutaza ni ku luta. (2 Timotea 4:1, 2) Mulelo wa luna ki ku taluseza hahulu ba macaba kaufela taba ye nde ya Mubuso wa Mulimu. Kacwalo, ba ka zwelapili ku ba ni kolo ya ku ituta ka za tukiso ya ku fumana bupilo bo bu sa feli mwa lifasi le linca la ku luka. Sina mukumbi o swalisani wa baluti ba Linzwi la Mulimu, tundamo ya luna ki ya ku zwelapili ku latelela mutala wa Muluti yo Mutuna, Jesu Kreste, ni ku bonisa tulemeno twa hae twa silumeli. Zeo kaufela lu ka li eza kuli ku tompiwe mi ku lumbekwe Muluti wa luna ya Pahami ili Mufi wa Bupilo, Jehova Mulimu.

“Bote ba ba putehile fa mukopano wo ba ba lumelelana ni katulo ye, shangwe ha mu bulele kuli EE!”

Puzo ya maungulo ya katulo yeo ha ne i buzizwe b’a 160,000 be ne ba putehile kwa mikopano ye milalu mwa France ni b’a 289,000 mwa libaka ze 9 mwa Italy, batu ba mwa lipuo ze ñata be ne ba li teñi ba kalumuka ku huwa kuli “Ee.”