Lipuzo Ze Zwa kwa Babali

Kana kwa lumelezwa ka Mañolo kuli Mukreste a beye mazoho a hae fa Bibele ni ku konka kuli a bulele niti ye tezi mwa kuta?

Mutu ni mutu u lukela ku ikatulela mwa taba ye. (Magalata 6:5) Kono ha ku na libaka le li tomile fa Bibele le li hanisa ku konka ku bulela niti mwa kuta.

Ka nako ye telele, ku konka se ku bile kezo ye s’e atile mwa libaka ze ñata. Ka mutala, kwaikale, Magerike ne ba otololelanga lizoho kwa lihalimu kamba ku swala fa aletare ha ne ba nze ba konka. Muroma ha n’a itama ka luci, n’a swalanga licwe mwa lizoho ni ku konka kuli: “Haiba ni bulela buhata ka bomu, hailif’o yena u lamulela muleneñi w’o ni masabelo a, haike [mulimu] Jupiter a ni amuhe ze nde kaufela, sina ha ni posa licwe le.”—Cyclopedia of Biblical, Theological, and Ecclesiastical Literature, ya bo John McClintock ni James Strong, Volyumu 7, likepe 260.

Likezo ze cwalo ne li bonisa mukwa wa batu wa ku lemuha kuli ku na ni mulimu ya kona ku bona batu ili y’o ne ba ikalabela ku yena. Ku zwelela kwaikale, balapeli ba niti ba Jehova ne ba lemuhile kuli n’a ziba ze ne ba bulela ni ku eza. (Liproverbia 5:21; 15:3) Ka swanisezo, ne ba konkanga fapil’a Mulimu, kamba ku konka ku yena ka ku ba paki. Ka mutala, bo Boazi, Davida, Salumoni, ni Zedekia ne ba ezize cwalo. (Ruti 3:13; 2 Samuele 3:35; 1 Malena 2:23, 24; Jeremia 38:16) Balapeli ba Mulimu wa niti hape ne ba tuhelezi ba bañwi ku ba konkisa. Ne ku li cwalo ku Abrahama ni Jesu Kreste.—Genese 21:22-24; Mateu 26:63, 64.

Mutu ya konka fapil’a Jehova fokuñwi n’a ezanga sisupo se siñwi se si bonisa kuli wa konka. Abrame (Abrahama) n’a bulelezi mulena wa Sodoma kuli: “Ni yemisa lizoho la ka ku [Muñ’a] Bupilo, Mulimu, Muambakani-ya-Pahami, [Muñ’a] mahalimu ni lifasi.” (Genese 14:22) Lingeloi le ne li bulela ni mupolofita Daniele ne li ‘yemiselize lizoho la lona la bulyo, ni lizoho la lona la nzohoto mwahalimu, la tapanya ka Ya-Pila kamita ni mita.’ (Daniele 12:7) Mane niheba yena Mulimu u bulelwa ka swanisezo ku ba ya yemiseza lizoho la hae mwahalimu ka ku konka.—Deuteronoma 32:40; Isaya 62:8.

Ha ku na libaka le li tomile fa Mañolo le li hanisa ku konka. Kono Mukreste ha lukeli ku konka ilikuli a tiise taba kaufela ya bulela. Jesu n’a ize: “Kono mulomo wa mina u be e, e; awa, awa.” (Mateu 5:33-37) Mulutiwa Jakobo ni yena n’a bulezi taba ye swana. Ha n’a ize “mu si ke mwa konka,” n’a lemusa za ku itama ka luci ka lishea. (Jakobo 5:12) Jakobo ni Jesu ne ba si ka bulela kuli ku bulela niti mwa kuta ka ku konka ku fosahezi.

Kono ku cwañi Mukreste ha n’a ka kupiwa mwa kuta ku konka kuli bupaki bwa file ki bwa niti? A kana a ikutwa kuli wa kona ku eza cwalo. Hakusicwalo, wa kona ku lumelezwa ku bulela patalaza kuli h’a pumi.—Magalata 1:20.

Haiba mwa kuta ku tokwiwa ku yemisa lizoho mwahalimu kamba ku li beya fa Bibele mutu h’a konka, Mukreste a kana a iketela ku eza cwalo. Mwendi u hupula mitala ya mwa Mañolo ya ku eza kezo ye bonisa kuli wa konka. Ku Mukreste, sa butokwa hahulu ku fita ku bonisa sisupo se siñwi sa ku konka ki ku hupula kuli u itama ka luci fapil’a Mulimu kuli u bulela niti. Ku konka ko ku cwalo ki taba ye tuna. Mukreste h’a ikutwa kuli wa kona mi wa swanela ku alaba puzo ye nwi ya buzizwe mwa miinelo ye cwalo, fohe u lukela ku hupula kuli u mwa buitamo bwa ku bulela niti, mi kaniti Mukreste kamita u batanga ku bulela niti.