Ba Sebeleza Bakreste Ba Bañwi mwa Linaha Li Sili

KANA mwa ziba ba ba twi ki “batanga ni baitateli ba ba sebeleza mwa linaha li sili”? Lipaki za Jehova ba ba bizwa cwalo ba itatela ku itusisa nako ni buikoneli bwa bona kuli ba tuse mwa ku yaha miyaho ya ku hatiseza ni ku hasanyeza litaba za Mubuso ze mwa Bibele. Baitateli bao hape ba tusa ku yaha Mandu a Mikopano ni Mandu a Mubuso, mo ku lutelwa lituto za Bibele. Ha lu bulela fa, baitateli bao ba sweli ku yaha mwa linaha ze 34, sihulu mo ku na ni mali a manyinyani. Ki matata ni limbuyoti mañi ze ba fumana baitateli bao ha ba nze ba sebeleza Bakreste ba bañwi mwa linaha li sili? Ba ikutwa cwañi ka za ‘sebelezo’ ya bona ku Mulimu? (Sinulo 7:9, 15) Kuli lu fumane likalabo, ha lu teelezeñi ku ba bañwi ku bona be ne ba sebelelize mwa Mexico.

Baitateli ba ba zwa kwa linaha li sili ne ba tile lwa pili mwa Mexico mwa May 1992. Hamulahonyana wa f’o, ba kala ku etelela mwa ku yandulula mutai, o talima musebezi wa Lipaki za Jehova mwa Mexico. Ne ku ekelizwe teñi miyaho ye minca ye 14, ku kopanyeleza ni mandu a baitateli ba fa mutai, lihatisezo, ni liofisi.

Mwa ku peta musebezi wo, baitateli ba ba fitelela 730 be ne ba zwile kwa Canada, Great Britain, United States, ni kwa linaha ze ñwi ne ba swalisani ni baitateli ba bañata be ne ba zwa mwa Mexico kaufela. Mi hape, Lipaki ba ba fitelela 28,000 ba mwa liputeho ze bat’o ba 1,600 ze li bukaufi ni ofisi ya mutai ne ba t’o tusanga la Mukibelo ni la Sunda. Kaufela ne ba sebeza ka ku itatela ni ku itusisa buikoneli bwa bona ku si na tifo. Ne ba nga kuli ku sebeleza Jehova ka nzila yeo ki tohonolo. Ha ne ba nze ba yaha cwalo, ne ba sa libali manzwi a ñozwi ka moya wa Mulimu a kwa Samu 127:1, a li: ‘Kabesi Muñ’a Bupilo ku yaha ndu, ba ba i yaha kabe ba sebeza mbango.’

Matata E Ba Fumana

Ki afi matata e ba fumana baitateli ba ba sebeleza mwa linaha li sili? A mañwi ku ona ki a. Bo Curtis ni Sally, bosinyalana ba kwa  United States, ba tusize ku yaha mwa Germany, India, Mexico, Paraguay, Romania, Russia, Senegal, ni mwa Zambia. Bo Curtis ba li: “Butata bwa pili ne li bwa ku siya mwan’a luna wa musizana, ya n’a li paina [mukutazi wa ka nako kaufela], ni ku siya puteho ya hesu mwa Minnesota. Na ni ba ku luna ne lu inzi mwa puteho yeo ka lilimo ze 24, mi ne lu i lata hahulu.”

Bo Sally ba li: “Ku pila mwa sibaka si sili mwendi ku t’ata hahulu ku musali ku fita ku munna, kono ni itutile kuli kanti kwa konahala. Bati mane ni itutile mwa ku pilela ni tukokwani to tuñata to tu kataza!” Ba ekeza kuli: “Mwa naha ye ñwi, luna baitateli ba lishumi ne lu pila mwa ndu i liñwi ye na ni litapelo ze peli fela ye si na litatehelo. Ne ni itutile ku ba ni pilu-telele luli.”

Ku ituta puo ye nca ki butata bo buñwi bo bu tokwa buikatazo ni buikokobezo. Bo Sharon, ba ba sebelize ni ba banna mwa linaha ze fapahana-fapahana, ba li: “Ku sa ziba puo ya k’o sebeleza ki butata luli. Kwa makalelo, ku t’ata ku eza silikani ni mizwale ni likaizeli ba hao ba kwa moya inz’o sa koni ku ambola ni bona ka ku lukuluha. Seo sa zwafisa. Kono mizwale be lu fumana mwa linaha mo lu yanga ba na ni hahulu pilu-telele mi b’a lu isanga hahulu pilu. Nakonyana fela kipeto lwa kala ku ambolisana hanyinyani-hanyinyani.”

Ku Ya Mwa Simu ku Tokwa Bundume

Nihaike kuli baitateli ba ba itombozi bao ba tusa hahulu mwa musebezi wa ku yaha, ba lemuha kuli, musebezi wa bona wa pili ki ku kutaza taba ye nde ya Mubuso wa Mulimu. Kacwalo, ni bona ba abananga hahulu mwa musebezi wa ku kutaza hamoho ni liputeho ze ba li ku zona. Bo Åke ni Ing-Mari bosinyalana ba ba tusize ku yaha mwa  Guadeloupe, Malawi, Mexico, ni Nigeria, ba itumelela kuli ku bulela puo ya kwa naha i sili mutu ha kutaza ku tokwa bundume.

Bo Ing-Mari ba li: “Kwa makalelo ne lu sa ezangi ze ñata, kakuli ne lu yanga ni Mizwale ba kona k’o, mi ka ku ikutwa maswabi, ne lu ba tuhelelanga ku bulela ba nosi. Kono zazi le liñwi kakusasana, lwa nahana ku ya mwa simu lu nosi. Lwa funduka inze lu kuña maswe ni ku tula-tula lipilu. Lwa katana kalibe cwana ya n’a teelelize kwa manzwi e ne ni itukiselize. Kiha se ni bala liñolo ni ku mu fa hatiso. Kalibe y’o s’a li: ‘Ni bata ku mi buza. Wahabona u ituta Bibele ni Lipaki za Jehova. Ni ka eza cwañi kuli ni itute Bibele ni na?’ Kina ya oma mati mwahanu. Kono se ni wa pilu mi na kala ku ituta ni yena Bibele.”

Bo Ing-Mari ba ekeza kuli: “Mu nahane fela tabo ni buitebuho bwa ka ku Jehova kwa ku fuyaula takazo ya luna ya ku bata ku kutaza.” Kalibe y’o n’a ezize zwelopili mi n’a kolobelizwe fa mukopano wa sikiliti mwa Mexico City. Bo Åke ni Ing-Mari ba bulela ka bukuswani za musebezi wa bona wa ku kutaza, ba li: “Lu tabela hahulu musebezi wa luna wa ku yaha mwa linaha ze ñata, kono ha ku na se si likana ni tabo ya ku tusa mutu ku ziba niti.”

Moya wa Buitomboli

Nihaike baitateli ba ba siyanga lubasi ni balikani b’a itombolanga kuli ba sebeleze mizwale ba bona mwa linaha li sili, ba fumananga limbuyoti ze tuna. Ki lifi limbuyoti zeo?

Bo Howard, ba ba sebelize ni ba ku bona bo Pamela, mwa Angola, Colombia, Ecuador, El Salvador, Guyana, Mexico, ni Puerto Rico ba li: “Ki tohonolo ku zibana ni mizwale ni likaizeli ba mwa linaha li sili ni ku iponela luli lilato le li mwa kopano ya luna ya mwa lifasi kaufela. Lu balanga fela za teñi, kono mutu ha pila ni ku sebeza ni ba ba simuluha ku sili, u ka itebuha hahulu buñwi bwa luna.”

Bo Gary, ba ba tusize ku za buyahi mwa Colombia, Costa Rica, Ecuador, Mexico, ni Zambia, ni bona ba ikutwa kuli musebezi wo u ba tusize hahulu. Ba li: “Ze ni itutile ka lilimo-limo kwa mizwale ba ba hulile kwa moya ba fa mitai ya mwa linaha mo ni sebelelize li ni tusize ku tiyela matata mwa musebezi wa ka. Ku tiisize tumelo ya ka kakuli ni iponezi buñwi bwa kopano ya Jehova ya mwa lifasi kaufela—ili buñwi bwa ku pilisana hande ni batu ba bañwi ku si na taba ni puo, mubala, kamba mupilelo wa bona.”

Cwale musebezi wa ku yaha mwa Mexico u felile, mi mutai o ekelizwe n’o kakuzwi unomwaha. Ka ku susumezwa ki lilato la ku lata Mulimu, batanga ni baitateli ba ba sebeleza mwa linaha li sili ba tusize hahulu mwa ku yandulula bulapeli bwa niti mwa Mexico ni kwa libaka ze ñwi. Buitateli ni buitomboli bwa bona bwa ku sebeleza mizwale ba bona ba Sikreste ba mwa linaha li sili bu itebuhiwa hahulu ki Lipaki za Jehova mwa lifasi kaufela.

[Siswaniso se si fa likepe 25]

Ecuador

[Siswaniso se si fa likepe 25]

Colombia

[Siswaniso se si fa likepe 25]

Angola

[Siswaniso se si fa likepe 26]

Simu ya lipalisa fa mutai

[Siswaniso se si fa likepe 26]

Musebezi wa kalisa fa sibaka se sinca fa mutai wa Mexico

[Siswaniso se si fa likepe 26]

Kwatasi: Ba bañwi ba mwa Likolo la Bayahi fapil’a muyaho o munca

[Siswaniso se si fa likepe 27]

Baitateli ba bayahi ni bona ba ikola ku swalisana ni liputeho ze ba li ku zona mwa musebezi wa ku kutaza