Ze Lu Kona ku Ituta Kwa Linyunywani

“MU TALIME linyunywani za lihalimu; kakuli ha li cali, ha li kutuli, ha li buluki mwa matuli; kono Ndat’a mina ya kwa lihalimu wa li uta. Ha ni li, mina mu li fita hahulu?” (Mateu 6:26) Jesu Kreste n’a bulezi manzwi ao mwa ngambolo ya hae ye tumile ya n’a fezi fa lilundu bukaufi ni Liwate la Galilea. N’a sa buleli kwa balateleli ba hae fela. Ne ku na ni buñata bo butuna bwa be ne ba kona ku ba balutiwa, ba ba zwa mwa likalulo kaufela za naha. Buñata bwa bona ne li babotana be ne ba tisize bakuli ku Jesu kuli a to ba folisa.—Mateu 4:23–5:2; Luka 6:17-20.

Ha s’a folisize bakuli kaufela, Jesu a bulela ka za lika za kwa moya za butokwa. Ye ñwi ya lituto za n’a lutile ki ye bulezwi fahalimu.

Linyunywani za lihalimu li bile teñi ka nako ye telele. Ze ñwi ku zona li ca likokwani, mi ze ñwi zona li ca litolwana ni bubeke. Haiba Mulimu u fa linyunywani lico ze ñata cwalo, w’a kona ku tusa batanga ba hae ku fumana sico sa ka zazi. U kona ku eza cwalo ka ku ba tusa ku fumana mubeleko ilikuli ba fumane mali a lico. Kamba wa kona ku ba tusa ku ba ni kutulo ye nde. Haili mwa linako za ziyezi, Mulimu wa kona ku ezisa batu ni balikani ba lipilu ze sishemo kuli ba ikabele sico sifi kamba sifi se ba na ni sona ni ba ba tokwile.

Ku na ni nto ye ñwi ye lu kona ku ituta ka ku tatubisisa bupilo bwa nyunywani. Mulimu n’a bupile linyunywani ni buikoneli bo butuna bwa ku ikupulela ku yaha liyaleto mwa ku utela teñi bana ba zona. Ha mu bone mifuta ye mibeli yeo ya liyaleto. Se si swanisizwe kwa nzohoto ki siyaleto sa kambimbi ka mwa Africa ka mwa macwe. Si yahiwa fahalimw’a licwe kamba fa limota la ndu. Situwa sa siyaleto sa mufuta wo ki licwe le li fahalimu kamba malibela a muyaho, sina mo ku boniselizwe fa siswaniso seo. Bulilo bwa siyaleto bu zwa fa tukoto twa lizupa to tu ngungahanyizwe ku tu eza sina mo i bupehezi komoki. Mbimbi ya munna ni ya musali kaufela li sebeza ka t’ata mwa ku kubukanya tukoto to twa lizupa, mi ku kona ku nga nako ye fitelela kweli kuli siyaleto si fele. Mi mwahali li yala mwateñi bucwañi ni mafufa. Kaufela zona li abana mwa ku fepa bana ba zona. Siswaniso se si kwatasi ki sa taha ya munna. Nyunywani ya mwa Africa yeo ya miswalo, i yahanga siyaleto sa yona ka ku itusisa bucwañi kamba limela ze ñwi ze namalala fafasi. I kona ku luka siyaleto mwa lizazi li liñwi ni ku feza liyaleto ze fitelela 30 ka nako i liñwi ya mwaha!

Lu itutañi? Haiba Mulimu u fa linyunywani buikoneli bo bu cwalo ni liyahiso ze ñata cwalo za liyaleto, w’a kona kaniti ku tusa batanga ba hae ku fumana mandu e ba tokwile. Niteñi Jesu n’a bonisize kuli ku tokwahala nto ye ñwi haiba lu bata kuli Jehova Mulimu a lu tuse ku fumana za kwa mubili. Jesu n’a sepisize kuli: “Mu bate pili mubuso wa Mulimu ni Ku Luka kwa Hae, mi linto zeo kamukana mu ka li ekelezwa kwateñi.” (Mateu 6:33) Mu kana mwa ipuza kuli, ‘Ki lifi ze amiwa mwa ku bata pili Mubuso wa Mulimu?’ Lipaki za Jehova, bona ba ba abelanga magazini ye, ba ka tabela ku mi alaba puzo yeo.