Vidio ya ku Susumeza Lipilu za Mikulwani

MIKULWANI ba bañata ne ba susuelizwe ku nyakisisa ka tokomelo muzamao wa bona ha ne ba boni vidio ya Young People Ask—How Can I Make Real Friends? * Vidio yeo i na ni kelezo ye nde ya ka mañolo, maikuto e ba bulezi mikulwani ba Sikreste, ni drama ye susueza ya ze ezahala mwa miteñi ye ili ye tomile fa taba ya mwa Bibele ya Dina. (Genese, kauhanyo 34) Lipulelo ze tatama ka za vidio yeo li zwa kwa Mexico.

Martha u li: “Vidio yeo ne i ni fitile kwa pilu luli. I bonahala inge ne i ezelizwe fela na. Ne ni nahananga kuli ku likani baluti ba ka ni be ne ni kena ni bona sikolo ha ne ba ziba kuli ni yo muñwi wa Lipaki za Jehova. Ne ni palezwi ku bonisa seo ka ku ba kutaza. Ni itumezi kwa litaba kaufela za file Jehova, sihulu ha li lu fita hahulu kwa lipilu inge vidio ye.”

Juan Carlos u li: “Vidio ye luli i ezisa mutu ku itekula. Ka ku ba mucaha, ni ezize mafosisa a mañwi mi a’ swana ni a babapali ba bañwi mwa drama. Lilimo li sikai kwamulaho, ne ni pila bupilo bo bu sa swalehi hande, kono ne ni lemuhile kuli bupilo bo bu cwalo bu kona ku tahisa ze maswe. Ha se ni buhile vidio ye, ni itamile ku sepahala ku Jehova.”

Sulem u itumelela kuli: “Ha ne ni buhile vidio ye, ne ni tabehile kwa pilu. Kwamulaho, ne se ni tuhezi ku balanga Bibele, mi ne ni sa lapelangi hahulu ku Jehova. Ha ne ni teelelizwe kwa maikuto a mikulwani ba bañwi mwa vidio, ne ni susuelizwe ku kalisa ku ituta Bibele hape ni ku lapelanga ku Jehova.”

Mikulwani kacenu ba talimana ni matata a mañata, mi balikani be ba keta hañata ba kona ku susueza hahulu mo ba pilela bupilo bwa bona. (Samu 26:4; Liproverbia 13:20) Vidio ya Young People Ask—How Can I Make Real Friends? i sweli ku tusa ba bañata ku eza likatulo ze nde mwa taba yeo.

[Litaluso za kwatasi]