Kana Mu Na ni Moya wa ‘ku Libelela’?

“Mu lukela ku pila ka mizamao ye kenile hahulu, ni ka bulapeli; inze mu libelezi ni ku akufisa lizazi la Mulimu.”—2 PITROSI 3:11, 12.

1, 2. Lu kona ku fa mutala mañi wa ku ba ni moya wa ku ‘libelela’ ka za lizazi la Jehova?

MU NAHANE lubasi lo lu libelela baeñi ba ba taha kwa mulalelo. Nako ye ba lukela ku taha ya sutelela ka bubebe. Wa musali u patehile ku feleleza ku lukisa lico. Munn’a hae ni bana ba tusa kwa ku bona teñi kuli lika kaufela z’a lukiswa hande. Kaufel’a bona ba tabile. Ee, lubasi kaufela lu libelela ka tukufalelo ku fita kwa baeñi, mi lu libelela ku to ikola lico ze tabusa ni sango se sinde.

² Ka ku ba Bakreste, lu libelela nto ya butokwa ni ku fita. Nto mañi? Kaufel’a luna lu libelela “lizazi la Mulimu”! Ku fitela li taha, lu tokwa ku ba sina mupolofita Mika, ya n’a ize: “Ni ka talima ku [Muñ’a] Bupilo, ni libelele Mulimu ya ni pilisa.” (Mika 7:7) Kana manzwi ao a talusa ku sa eza se siñwi? Batili. Za ku eza ki ze ñata.

3. Ka ku ya ka 2 Pitrosi 3:11, 12, Bakreste ba lukela ku ba ni moya mañi?

³ Muapositola Pitrosi u lu tusa ku ba ni moya o lukile ha lu nze lu libelela. U li: “Mu lukela ku pila ka mizamao ye kenile hahulu, ni ka bulapeli; inze mu libelezi ni ku akufisa lizazi la Mulimu.” (2 Pitrosi 3:11, 12) Mu lemuhe kuli ka ku bulela cwalo, Pitrosi n’a sa kakanyi kuli lu lukela ku pila cwañi. Mwa mañolo a hae a mabeli a n’a ñozwi ka ketelelo ya moya wa Mulimu, n’a talusize kuli Bakreste ba swanela ku ba batu ba ba cwañi. Hape n’a ba elelize kuli ba zwelepili ku pila ka “mizamao ye kenile hahulu, ni ka bulapeli.” Nihaike n’e se ku fitile lilimo ze bat’o ba ze 30 ku zwa f’o Jesu Kreste n’a fezi sisupo sa “ku fela kwa lifasi,” Bakreste ne ba sa lukeli ku tuhela ku tona. (Mateu 24:3) Ne ba lukela ku ‘libelela ni ku akufisa’ lizazi la Jehova.

4. Ku ‘libelela ni ku akufisa lizazi la Mulimu’ ku amañi?

⁴ Kaniti ha lu koni ku ‘akufisa’ luli lizazi la Jehova. Mane, ha lu “zibi lizazi, nihaiba nako” f’a ka tela Jesu Kreste ku to atula lila za Ndat’ahe. (Mateu 24:36; 25:13) Hatiso ye ñwi i talusa kuli linzwi fo i zwa pulelo ya ku “akufisa” li talusa “‘ku eza ka putako’ mi kacwalo li swana hahulu ni ‘ku ba ni cisehelo, ku  sebeza, ku iyakatwa nto ye ñwi.’” Kacwalo, Pitrosi n’a susueza balumeli ba bañwi ku lakaza hahulu lizazi la Jehova. Ne ba kona ku eza cwalo ka ku li hupulanga kamita. (2 Pitrosi 3:12) Ni luna lu swanela ku ba ni moya o swana ka ku ba kuli “lizazi la [Muñ’a] Bupilo, le lituna, le li sabisa” se li sutelezi.—Joele 2:31.

Mu Libelele Mu Nze Mu Na ni “Mizamao Ye Kenile Hahulu”

5. Lu kona ku bonisa cwañi kuli lu lakaza hahulu ku bona “lizazi la Mulimu”?

⁵ Haiba lu lakaza hahulu ku punyuha lizazi la Jehova, lu ka bonisa cwalo ka “mizamao [ya luna] ye kenile hahulu, ni ka bulapeli.” Pulelo ya “mizamao ye kenile hahulu” i kana ya lu hupulisa kelezo ya Pitrosi ya kuli: “Sina bana ba ba utwa, mu si ke mwa ya ka litakazo ze ne mu ya ka zona kale, ha ne mu sa tokwa zibo. Kono sina ya mi bizize h’a li Ya-Kenile, ni mina mu be ba ba kenile mwa mizamao ya mina kaufela; kakuli ku ñozwi kuli: Mu be ba ba kenile, kakuli Na ni Ya-Kenile.”—1 Pitrosi 1:14-16.

6. Kuli lu be ba ba kenile, lu lukela ku ezañi?

⁶ Kuli lu be ba ba kenile, lu lukela ku ba ni bukeni kwa mubili, mwa munahano, ku za muzamao, ni kwa moya. Ka ku ba batu ba ba bizwa ka libizo la Jehova, kana lwa itukiseza “lizazi la Mulimu” ka ku ipuluka lu li ba ba kenile? Kacenu, ku ipuluka lu li ba ba kenile cwalo ku t’ata kakuli lipimo za muzamao mwa lifasi li ya hahulu kwatasi. (1 Makorinte 7:31; 2 Timotea 3:13) Kana lwa fumana kuli shutano ye mwahal’a lipimo za luna za muzamao ni lipimo za lifasi za shutana hahulu? Haiba ha lu boni cwalo, lu swanela ku bilaela. Esi mwendi lipimo za luna za ka butu, niha li pahami ku fita za lifasi, li sweli ku ya kwatasi? Haiba ku cwalo, lu tokwa ku eza se siñwi, ku lukisa muinelo, ilikuli lu tabise Mulimu.

7, 8. (a) Lu kona ku libala cwañi butokwa bwa ku ba ni “mizamao ye kenile hahulu”? (b) Ku kona ku eziwañi ka za ku lukisa muinelo?

⁷ Ka ku ba kuli mazazi a fa Intaneti ku na ni maswaniso a mapunu, ni kuli a kona ku buhiwa kwa mukunda, ba bañwi be ne ba sa bonangi masila a cwalo se ba fumana “litaba za buhule ze ñata-ñata,” ka mw’a taluseza mualafi yo muñwi. Ha ne lu ka alunguta likalulo ze masila ze cwalo fa Intaneti, kaniti neikaba ku sa utwa taelo ya mwa Bibele ya kuli lu si ke lwa “swala ze masila.” (Isaya 52:11) Kana luli f’o ne lu ka be lu “akufisa lizazi la Mulimu”? Kamba kana mwa munahano wa luna lu isa lizazi leo kwapili, ka ku nahana kuli niha lu silafaza munahano wa luna, lu sa na ni nako ya ku ikenisa? Haiba se lu bile ni butata bo bu cwalo, lu akufele ku kupa ku Jehova kuli a ‘biule meto a luna ku ze si na tuso, a lu tiise mwa nzila ya hae’!—Samu 119:37.

⁸ Lipaki za Jehova ba bañata-ñata, ba bahulu ni banana, ba latelela lipimo za Jehova ze pahami ku za muzamao mi ba ambuka likukuezo ze maswe za lifasi le. Ka ku ziba butokwa bwa linako za luna ni temuso ya Pitrosi ya kuli “lizazi la Mulena li ka taha sina lisholi,” ba zwelapili ku ba ni “mizamao ye kenile hahulu.” (2 Pitrosi 3:10) Likezo za bona li bonisa kuli ba “libelezi ni ku akufisa lizazi la Mulimu.” *

 Mu Libelele Inze Mu Eza “Bulapeli”

9. Bulapeli bu swanela ku lu susumeza ku ezañi?

⁹ Kuli lu akufise lizazi la Jehova, bulapeli ni bona ki bwa butokwa. “Bulapeli” bu ama ku saba Mulimu, ili nto ye lu susumeza ku eza z’e mu tabisa. Ku ipeya ku Jehova ka busepahali ki kona ko ku konisa mutu ku ba ni bulapeli b’o. Tato ya hae kikuli “batu kamukana ba piliswe, mi ba fite fa zibo ya ku ziba niti.” (1 Timotea 2:4) Mulimu “h’a lati ba bañwi ha ba ka timela, kono u lata kuli kaufela ba kene mwa ku baka.” (2 Pitrosi 3:9) Kacwalo, kana bulapeli bwa luna ha bu swaneli ku lu susumeza ku tiiseza mwa buikatazo bwa luna bwa ku tusa batu ku ituta ka za Jehova ni ku mu likanyisa?—Maefese 5:1.

10. Ki kabakalañi ha lu swanela ku isileleza kwa ‘takazo ya bufumu’?

¹⁰ Haiba lu bata pili Mubuso wa Mulimu, lu ka patehiswanga hahulu ki za bulapeli. (Mateu 6:33) Ku eza cwalo ku ama ku ba ni mubonelo o itikanelezi wa za bufumu. Jesu n’a lemusize kuli: “Mu tokomele, mi mu ipuluke kwa takazo kaufela ya bufumu; kakuli mutu nih’a ka fuma hahulu, bupilo bwa hae ha bu ini ku z’a fumile.” (Luka 12:15) Nihaike ku kana kwa ba t’ata ku nahana kuli lwa kona ku foufazwa ki ku lata hahulu mali, lu lukela ku lemuha kuli ‘lipilaelo za lifasi, ni takazo ya bufumu’ li kona ku “pukutisa Linzwi” la Mulimu. (Mateu 13:22) Ku ipilisa ku kana kwa ba t’ata. Kacwalo, mwa likalulo ze ñwi za lifasi, ba bañata ba nahana kuli, kuli ba pile hande, ba na ni ku tutela kwa naha ye fumile, mwendi mane ili ku siya mabasi a bona ka lilimo li sikai. Mane nihaiba batu ba Mulimu ba bañwi ba nahanile cwalo. Ka ku ya kwa naha ye ñwi, ba kana ba fa mabasi a bona ze tokwahala cwale. Kono ku kona ku ezahalañi kwa Bukreste bwa balatiwa ba bona be ba siile? Mwa lubasi ha ku si na hande tamaiso ya butoho, kana ba ka tiya kwa moya ni ku kona ku punyuha lizazi la Jehova?

11. Mubeleki yo muñwi ya n’a tutezi kwa naha i sili n’a bonisize cwañi kuli bulapeli ki bwa butokwa ku fita bufumu?

¹¹ Mubeleki yo muñwi ya n’a tutile ku zwa kwa Philippines n’a itutile litaba za mwa Bibele kwa Lipaki za Jehova ba mwa Japan. Ha s’a itutile za buikalabelo bwa ka Mañolo ka za butoho, n’a lemuhile kuli n’a tokwa ku tusa lubasi lwa hae ku ba balapeli ba Jehova. (1 Makorinte 11:3) Musal’a hae n’a lwanisize hahulu tumelo ya hae ye nca yeo mi n’a bata kuli a zwele fela pili ku lumelanga mali ku fita ku kutela kwahae ku yo luta lubasi lwa hae litumelo za hae ze tomile fa Bibele. Kono ka ku susumezwa ki butokwa bwa linako ni buiyakato kwa balatiwa ba hae, a kutela kwahae. Pilu-telele ya hae mwa ku sebelisana ni ba lubasi lwa hae ne i tahisize ze nde. Kwa mafelelezo, lubasi lwa hae lwa swalisana mwa bulapeli bwa niti, mi musal’a hae a kalisa ku eza bukombwa bwa ka nako kaufela.

12. Ki kabakalañi ha lu swanela ku beya za kwa moya mwa sibaka sa pili mwa bupilo?

¹² Muinelo wa luna u kona ku swanisezwa  kwa batu ba ba mwa muyaho o’ ca mulilo. Kana ku tukufalelwa ku mata-mata ku zwisa libyana mwa muyaho o’ tuha u wa neikaba ku eza ka butali? Se ne si ka ba sa butokwa ni ku fita ki ku pilisa batu—ku ipilisa luna beñi ni lubasi lwa luna, ni ba bañwi ba ba mwa muyaho w’o, nji cwañi? Muinelo wa linto o maswe wo u tuha u fela, mi bupilo bwa batu bu mwa kozi. Ka ku lemuha seo, kaniti lu swanela ku beya za kwa moya mwa sibaka sa pili ni ku tukufalelwa ku eza musebezi o’ pilisa wa ku kutaza Mubuso.—1 Timotea 4:16.

Lu Tokwa ku Sa Ba ni “Litiba”

13. Lizazi la Jehova ha li ka taha, lu swanela ku bata ku ba mwa muinelo mañi?

¹³ Ka ku koñomeka butokwa bwa ku ba ni moya wa ku libelela, Pitrosi u li: “Balatiwa, ha mu nze mu talimezi ze cwalo, mu eze ka mata kuli mu fumanwe ki [Mulimu] mu na ni kozo, mu si na litiba kamba se si nyazahala.” (2 Pitrosi 3:14) Fahalimw’a kelezo ya hae ya ku ba ni muzamao o kenile hahulu ni ku eza bulapeli, Pitrosi u koñomeka butokwa bwa ku fumanwa kwa mafelelezo ki Jehova kuli lu batu ba ba kenisizwe ki mali a butokwa a Jesu. (Sinulo 7:9, 14) Seo si talusa kuli mutu u tokwa ku ba ni tumelo mwa sitabelo sa Jesu ni ku ba mutanga wa Jehova ya ineezi, ya kolobelizwe.

14. Ku sa ba ni “litiba” ku amañi?

¹⁴ Pitrosi u lu susueza ku eza ka mo lu konela kaufela kuli lu fumanwe lu si na “litiba.” Kana lu buluka liapalo za luna za muzamao ni butu bwa Sikreste li si na litiba, li si ka silafazwa ki lifasi? Ha lu bona litiba fa liapalo za luna, lwa likanga ku li zwisa ka bubebe. Haiba ki siapalo se lu lata hahulu se si na ni litiba, lu li zwisa ka tokomelo. Kana lu ikutwanga cwalo haiba liapalo za luna za Sikreste ka swanisezo, li tala masila kabakala mafosisa ka za butu kamba muzamao wa luna?

15. (a) Ki kabakalañi Maisilaele ha ne ba na ni ku eza minganja kwa mafelelezo a liapalo za bona? (b) Ki kabakalañi batanga ba Jehova ba cwale ha ba sa swani ni ba lifasi?

¹⁵ Maisilaele ne ba na ni ku eza “minganja kwa mafelelezo a liapalo za bona” ni ku beya “muhala o mutala fa minganja ya kwa mungundo wa liapalo za bona.” Kabakalañi? Kuli ba hupule litaelo za Jehova, ba li utwe, ni ku ba “ba ba kenile” ku Mulimu wa bona. (Numere 15:38-40) Ka ku ba batanga ba Jehova ba cwale, ha lu swani ni ba lifasi kakuli lu utwa milao ni likuka za Mulimu. Ka mutala, lu ba ba kenile kwa muzamao, lu kuteka bukeni bwa mali, mi lu ambuka ku lapela maswaniso kwa mifuta kaufela. (Likezo 15:28, 29) Ba bañata ba lu kuteka kabakala tundamo ya luna ye tiile ya ku sa isalafaza.—Jakobo 1:27.

Lu Tokwa ku Sa Ba ni “Se Si Nyazahala”

16. Ku ba “ba ba sa nyazahali” ku amañi?

¹⁶ Pitrosi hape u li lu na ni ku fumanwa lu si na “se si nyazahala.” Seo si konahala cwañi? Litiba hañata l’a kona ku keniswa, kono ku ba ni ‘se si nyazahala’ ku talusa nto ye tuna ni ku fita. Ku bonisa kuli ku na ni se si fosahezi mwahali. Muapositola Paulusi n’a elelize Bakreste ba kwa Filipi kuli: “Mu eze  linto kaufela mu sa tongi mu sa kanani; kuli mu be ba ba sa nyazahali, ba ba si na bumaswe, bana ba Mulimu ba ba si na litiba mwahal’a lusika lo lu si ka luka, lo lu maswe, mo mu benya sina mamonyi mwa lifasi.” (Mafilipi 2:14, 15) Haiba lu utwa kelezo yeo, lu ka ambuka litongoko ni likañi mi lu ka sebeleza Mulimu ka pilu ye kenile. Lu ka susumezwa ki lilato la ku lata Jehova ni bomuyahwa ni luna ha lu nze lu kutaza “evangeli ye ya mubuso.” (Mateu 22:35-40; 24:14) Mi hape, lu ka zwelapili ku shaela taba ye nde, batu ba bañata niha ba sa utwisisi libaka ha lu fana nako ya luna ni ku tusa ba bañwi ku ituta ka za Mulimu ni Linzwi la hae, yona Bibele.

17. Ha lu bata ku fiwa buikalabelo mwa puteho ya Sikreste, mulelo wa luna u swanela ku ba ufi?

¹⁷ Kakuli lu lakaza ku fumanwa lu “si na se si nyazahala,” lu swanela ku tatuba milelo ya luna ku ze lu eza kaufela. Lu tuhezi muezezo wa lika wa silifasi wa ka buitati, inge cwalo ku bata bufumu kamba m’ata. Haiba lu bata ku fiwa buikalabelo mwa puteho ya Sikreste, haike milelo ya luna kamita i be ye minde mi haike kamita lu susumezwe ki lilato la ku lata Jehova ni ba bañwi. Kwa tabisa ku bona banna ba ba tiile kwa moya ba ba “lata ku kena fa buluti” ka tabo ni ka takazo ya ka buikokobezo ya ku sebeleza Jehova ni balumeli sina bona. (1 Timotea 3:1; 2 Makorinte 1:24) Luli, ba ba fitile ku ze konisa za ku ba maeluda ba ‘lisa mutapi wa Mulimu ka ku lata ku ezeza Mulimu; isi kabakala bufumu bo bu maswe, kono ka pilu ye lata; isi ka ku busa mitapi ka t’ata, kono ka ku ezeza mutapi mutala.’—1 Pitrosi 5:1-4.

Lu Tokwa ku Ba mwa “Kozo”

18. Lipaki za Jehova ba zibahala ka mikwa ifi?

¹⁸ Kwa mafelelezo, Pitrosi u lu taluseza kuli lu be mwa “kozo.” Kuli lu kone ku eza cwalo, lu tokwa ku ba mwa kozo ni Jehova ni bomuyahwa ni luna. Pitrosi u koñomeka butokwa bwa ku ‘latana ka lilato le lituna’ ni ku pila ka kozo ni Bakreste ba bañwi. (1 Pitrosi 2:17; 3:10, 11; 4:8; 2 Pitrosi 1:5-7) Kuli lu zwelepili ku ba mwa kozo, lu lukela ku latana. (Joani 13:34, 35; Maefese 4:1, 2) Lilato ni kozo ya luna li bonahalanga sihulu ha lu ezanga mikopano ya mwahal’a macaba. Kwa mukopano o muñwi wa kwa Costa Rica ka 1999, mulekisi yo muñwi kwa libala la lifulai n’a nyemile kakuli Lipaki ba kwateñi ha ne ba amuhela be ne ba taha kwa mukopano, ka ku sa lemuha ne ba sila malekisezo a hae. Kono zazi la bubeli, n’a lemuhile kuli baeñi bao ne ba amuhelwa ka mafulofulo, ka lilato ni kozo, nihaike Lipaki ba kwa Costa Rica ne ba sa zibi baeñi bao. Zazi la mafelelezo, mulekisi y’o a abana mwa ku amuhela baeñi mi a kupa tuto ya Bibele.

19. Kibakalañi ku ba mwa kozo ni balumeli ba bañwi ha ku li kwa butokwa?

 ¹⁹ Buniti bo lu bata ka bona ku ba mwa kozo ni mizwale ni likaizeli ba luna ba kwa moya bu kona ku ama tukufalelo ya luna ya ku libelela lizazi la Jehova ni lifasi la hae le linca le li sepisizwe. (Samu 37:11; 2 Pitrosi 3:13) Lu nge kuli ku lu bela t’ata ku ba mwa kozo ni mulumeli yo muñwi. Kana lu nahana kuli lu ka kona ku pila ni yena ka kozo mwa Paradaisi? Haiba ha lu utwani ni muzwale yo muñwi, lu ‘kutisane pilu ni yena’ ka bubebe. (Mateu 5:23, 24) Ku eza cwalo ku butokwa kuli lu be mwa kozo ni Jehova.—Samu 35:27; 1 Joani 4:20.

20. Ku ba ni moya wa ku ‘libelela’ ku lukela ku boniswa ka linzila lifi?

²⁰ Kana luna ka butu lwa ‘libelela ni ku akufisa lizazi la Mulimu’? Takazo ya luna ye tuna ya ku bona ku feliswa kwa bumaswe i boniswa ka ku zwelapili kwa luna ku ba ni muzamao o kenile mwa lifasi le la mizamao ye maswe. Hape, takazo ya luna ye tuna ya kuli lizazi la Jehova li tahe ni kuli lu to pila mwatas’a puso ya Mubuso i boniswa ka bulapeli bwa luna. Mi tibelelo ya luna ya ku pila mwa lifasi le linca la kozo i boniswa ka ku bata kwa luna cwale ku ba ni kozo ni balapeli ba bañwi. Ha lu eza zeo, lu bonisa kuli lu na ni moya wa ku ‘libelela’ mi lwa “akufisa lizazi la Mulimu.”

[Litaluso za kwatasi]

Kana Mwa Hupula?

• Ku “akufisa lizazi la Mulimu” ku talusañi?

• Muzamao wa luna u kona ku bonisa cwañi kuli lu na ni moya wa ku ‘libelela’?

• Ki kabakalañi “bulapeli” ha bu li bwa butokwa?

• Lu lukela ku ezañi kuli lu fumanwe ki Jehova lu ‘na ni kozo, lu si na litiba kamba se si nyazahala’?

[Lipuzo za Tuto]

[Siswaniso se si fa likepe 11]

Ku ba ni moya wa ku ‘libelela’ ku boniswa ka muzamao o kenile hahulu

[Maswaniso a fa likepe 12]

Musebezi wa ku kutaza Mubuso u tahisa puluso

[Siswaniso se si fa likepe 14]

Ha lu nze lu libelela lizazi la Jehova, lu bate ku ba mwa kozo ni ba bañwi