“Mu Sutelele ku Mulimu Mi U Ka Sutelela ku Mina”

Pili Ni Hamulaho Ka M’o Bibele Ne I Cincelize Munna Y’o

ROLF-MICHAEL n’a lata hahulu-hulu lipina. N’a ngongwezwi ki milyani. Ha n’a pila mwa Germany inz’a sa li mucaha, n’a itupwaelanga macwala ni ku itusisa mutakafululele milyani ya LSD, cocaine, hashish, ni milyani ye miñwi ye kola.

Ha n’a lika ku kenya milyani ye kola ka busholi mwa naha ye ñwi ya mwa Africa, Rolf-Michael n’a tamilwe mi a pika likweli ze 13 mwa tolongo. Nako yeo ya n’a tandile mwa tolongo ne i mu tahiselize ku nahana ka za mulelo wa bupilo luli.

Rolf-Michael ni musal’a hae, Ursula, ne ba ikatalize ku bata niti ni libaka le ba pilela batu. Nihaike ne ba nyefisizwe ki ze twi ki likeleke za Sikreste, ne ba lakaza hahulu ku ziba Mulimu. Kono ne ba na ni lipuzo mi ne ba si ka fumana likalabo ze nepahezi mwa likeleke ze fitana-fitana. Ku zwa f’o, likeleke zeo ne li si ka ba konisa ku cinca bupilo bwa bona.

Kwa mafelelezo bo Rolf-Michael ni Ursula ba kopana ni Lipaki za Jehova. Hamulaho wa ku kalisa ku ituta Bibele, Rolf-Michael n’a susuelizwe hahulu ki kelezo ye li: “Mu sutelele ku Mulimu mi u ka sutelela ku mina.” (Jakobo 4:8) N’a ikatulezi ku ‘tubula mutu wa kale ya boliswa ki litakazo ze puma; ni ku apala mutu yo munca ya bupwa ka siswaniso sa Mulimu mwa ku luka, ni mwa ku kena kwa niti.’—Maefese 4:22-24.

Rolf-Michael n’a ka kona cwañi ku apala mutu yo munca? N’a bonisizwe se i bulela Bibele kuli “ka zibo ya nepahezi,” (NW) mutu wa kona ku ‘apala mutu yo munca, ya nz’a shemunwa ka siswaniso sa Ya mu bupile,’ yena Jehova Mulimu.—Makolose 3:9-11.

Ha s’a fumani zibo ye nepahezi, Rolf-Michael a singanyeka za ku cinca bupilo bwa hae kuli bu lumelelane ni likuka za Linzwi la Mulimu. (Joani 17:3) Ne ku li t’ata kuli Rolf-Michael a tokolomohe milyani ye kola, kono n’a lemuhile butokwa bwa ku lapela ku Jehova kuli a mu tuse. (1 Joani 5:14, 15) Tuso ye ñwi n’a i fumani ka silikani sa hae se situna ni be ne ba bile kale Lipaki za Jehova, be ne ba ikataza ku eza tato ya Mulimu.

Rolf-Michael hape n’a tusizwe ki ku ziba kuli lifasi la fela ni kuli ba ba eza tato ya Mulimu ki bona ba ba ka ina ku ya ku ile. Zibo yeo ne i mu konisize ku iketela limbuyoti ze sa feli ze tiswa ki silikani se situna ni Mulimu ya lilato, Jehova, ku fita ku keta lilato la nako ye kuswani la ku lata lifasi. (1 Joani 2:15-17) Rolf-Michael n’a susuelizwe hahulu ki manzwi a’ kwa Liproverbia 27:11: “Mwan’aka u talife, mi u tabise pilu ya ka, mi ni ka kona ku alaba ya ni nyaza.” U bulela  ka buitebuho kuli: “Timana ye i bonisa butungi bwa lilato la Jehova, ka ku fa batu kolo ya ku tabisa pilu ya hae.”

Sina Rolf-Michael, musal’a hae, ni bana ba bona ba balalu, buñata-ñata bwa batu ba fumani tuso ka ku latelela likuka za Bibele. Batu bao ba fumaneha mwa liputeho za Lipaki za Jehova mwa lifasi kamukana. Ka bumai, mwa linaha ze ñwi Lipaki za Jehova ba tamelezwa kuli ki sikwata sa tuto ye keluhile se si shandaula mabasi. Kono taba ya Rolf-Michael i paka kuli haki cwalo.—Maheberu 4:12.

Rolf-Michael u bulela kuli liñolo la Mateu 6:33, le li lu susueza ku bata pili za Mulimu, ki lona le li etelela lubasi lwa hae mwa nzila ye nde. Yena ni lubasi lwa hae ba itebuha hahulu ku Jehova bakeñisa bupilo bwa tabo bo ba ikola mwa lubasi sina Bakreste. Ba lumelelana ni manzwi a walisamu ya n’a opezi kuli: “Se ni ka kutiseza [Muñ’a] Bupilo ki sifi, kwa lituso za hae kaufela ku na?”—Samu 116:12.

[Manzwi a fa likepe 9]

Mulimu u fa batu kolo ya ku tabisa pilu ya hae

[Mbokisi fa likepe 9]

Likuka za Bibele Z’e Beleka

Ki ze ze ñwi za likuka za Mañolo ze se susumelize ba bañata ku tuhela mikwa ye sinya ye ngongwela:

“Mina ba ba lata [muñ’a] bupilo, mu toye bumaswe.” (Samu 97:10) Hamulaho wa ku ikolwisisa kuli likezo ze bulaya li maswe mi ni ku li toya luli, ku ba bunolo ku mutu ku eza ze tabisa Mulimu.

“Ya kopana ni ba ba butali, ni yena u ka talifa; kono ya twaelana ni matanya u ka utwa butuku.” (Liproverbia 13:20) Kuli mutu a si itusisi milyani ni lika ze ñwi ze ngongwela, u lukela ku keta ka tokomelo balikani ba hae. Ku eza silikani ni Bakreste ba ba ka mu tusa ku peta keto ya hae ku ka tusa luli.

“Mu si ke mwa bilaela ka se siñwi; kono mwa linto kaufela mu zibise Mulimu se mu bata ka tapelo ni ka kupo ye na ni buitumelo. Mi kozo ya Mulimu ye fita kutwisiso kaufela, i ka buluka lipilu za mina ni mihupulo ya mina ku Jesu Kreste.” (Mafilipi 4:6, 7) Kozo ye cwalo ya mwa pilu ni munahano ha i konwi ku fumanwa ka ku itusisa lika ze ñwi kaufela. Mi ku itinga ku Mulimu ka tapelo cwalo ku tusa mutu ku tula matata a mwa bupilo ku si na ku itusisa milyani ye kola.