Bukreste bwa Niti Bwa Konda

BUKOMBWA bwa Jesu Kreste ne bu tile ka m’ata mwa lifasi mwa miteñi ya makalelo a Bukreste. Lushango lwa hae ne lu matafaza, ku monyehela, ni ku susueza ka nzila ye ne komokisize batu. Buñata bwa be ne ba mu utwile ha bulela ne ba susuelizwe ki manzwi a hae.—Mateu 7:28, 29.

Jesu ka bundume n’a hanile ku ikenya mwa bulapeli ni lipuso ze ne hatelela batu za mwa miteñi ya hae kono n’a li ya atumeleha kwa batu-tu fela. (Mateu 11:25-30) N’a bulezi patalaza ka za kukuezo ye maswe ya mioya ye maswe ya fa lifasi mi n’a itusisize m’ata a n’a filwe ki Mulimu ku tula mioya ye maswe yeo. (Mateu 4:2-11, 24; Joani 14:30) Jesu n’a talusize ka ku utwahala hande kuli manyando a tahisizwe ki sibi, mi n’a bonisize ka lilato kuli Mubuso wa Mulimu ki ona o ka felisa manyando ku ya ku ile. (Mareka 2:1-12; Luka 11:2, 17-23) N’a zusize ka ku tala kapai ke ne ka palelwisize batu ka nako ye telele ku bona tulemeno twa Ndat’ahe, ka ku sinulela libizo la Mulimu bote ba ba tabela ku itama silikani ni Yena.—Joani 17:6, 26.

Ha ku komokisi he kuli, ku si na taba ni nyandiso ye situhu ye ne zwelela kwa bulapeli ni mibuso, balutiwa ba Jesu ne ba shaezi ka putako lushango lwa hae lo lu m’ata. Ka lilimo fela ze bat’o ba ze 30, liputeho ze tiile za Sikreste ne li tomilwe mwa Africa, Asia, ni Yurope. (Makolose 1:23) Niti ye bunolo ya n’a lutile Jesu ne i monyehezi lipilu za baikokobezi, ni ba lipilu ze lukile mwa Mubuso wa Roma kaufela.—Maefese 1:17, 18.

Kono balutiwa ba banca bao kaufela ba ba zwa mwa mipilelo, lizo, lipuo, ni bulapeli bo bu fapana-fapana ne ba ka swalisana cwañi mwa bulapeli bo bu swalisani luli bwa ‘tumelo i liñwi,’ sina ka mwa n’a bu bizelize Paulusi? (Maefese 4:5) Ki nto mañi ye ne ka ba konisa ku ‘bulela taba i liñwi’ kuli ba si ke ba kauhana? (1 Makorinte 1:10) Ka ku ba kuli ku na ni ku sa utwana ko kutuna mwahal’a ba ba twi ki Bakreste kacenu, lu swanela ku nyakisisa za n’a lutile Jesu ka sibili.

Se Si Swalisanisa Bakreste

Ha n’a zekiswa fapil’a Ponse Pilato, Jesu n’a bonisize se si swalisanisa Bakreste. N’a ize: “Ki sona se ni pepezwi, ni se ni tezi mwa lifasi: kuli ni t’o paka niti. [Mutu kaufela ya lata niti u teeleza kwa linzwi la ka, NW.” (Joani 18:37) Kacwalo, ku amuhela lituto za Jesu hamohocwalo ni likalulo ze ñwi kaufela za Linzwi la Mulimu, yona Bibele, ki kona ko ku  swalisanisa hahulu balutiwa ba niti ba Kreste.—1 Makorinte 4:6; 2 Timotea 3:16, 17.

Kono balutiwa ba Jesu ne ba ka ba ni lipuzo ze buniti kamba ku sa lumelelana ka linako ze ñwi. Ki sika mañi he se ne si ka ba tusa? Jesu n’a talusize kuli: “Moya wa niti ona ha u se u tile, u ka mi isa mwa niti kaufela; kakuli ha u na ku ipulelela ili ona, kono u ka mi bulelela z’o utwile kaufela; u mi zibise ni ze sa taha.” (Joani 16:12, 13) Kacwalo, moya o kenile wa Mulimu n’o ka konisa balutiwa ba Jesu ba niti ku utwisisa niti ha i nze i zwelapili ku patululwa ki Mulimu. Moya o kenile wo hape n’o ka tahisa miselo, ye cwale ka lilato, tabo, ni kozo, mi miselo yeo ne i ka tahisa swalisano mwahal’a bona.—Likezo 15:28; Magalata 5:22, 23.

Jesu n’a si ka lumeleza lifapano kamba likauhano mwahal’a balutiwa ba hae; mi hape n’a si ka ba lumeleza ku fetula lituto za Bibele kuli li lumelelane ni mipilelo kamba lizo za bulapeli za batu be ne ba ka kopana ni bona. Kono mwa busihu bwa mafelelezo ni bona, n’a lapezi ka t’ata kuli: “Ha ni lapeleli bona fela, kono ni lapelela ni ba ba ka lumela ku na, ka linzwi la bona. Kuli kaufela ba be a li muñwi, sina Wena Ndate ha u li ku na, ni na ku Wena. Ni bona cwalo, ba be a li muñwi ku luna; kuli lifasi li lumele kuli ki Wena ya ni lumile.” (Joani 17:20, 21) Kacwalo, swalisano ye buniti, ka moya ni niti ne i ka ba sizibelo se si zibahaza balutiwa ba Kreste ku zwa kwa makalelo ku to fita ni cwale. (Joani 4:23, 24) Niteñi, likeleke kacenu ha li si ka swalisana, kono li kauhani. Ki kabakalañi ha ku li cwalo?

Ze Li Kauhanezi Likeleke

Libaka le li nongile la ku shutana-shutana kwa litumelo ni likezo mwahal’a ba ba ipala ku ba Bakreste kacenu ki la kuli ha ba si ka kumalela kwa lituto za Jesu. Muñoli yo muñwi n’a ize: “Sina kwamulaho, Bakreste ba kacenu ni bona ba hanelela ku amuhela fela litaba za Bibele ze lumelelana ni ze ba tokwa—mi ba hana litaba ze sa lumelelani ni lizo za bona za bulapeli.” Seo ki sona luli sa n’a polofitile Jesu ni bapositola ba hae kuli ne si ka ezahala.

Ka mutala, ka ketelelo ya moya o kenile, muapositola Paulusi n’a ñolezi Timotea muokameli sina yena kuli: “Ku ka taha nako, ye ku yona, batu ba ka hana tuto ye pilisa; kono kabakala ku baba mwa lizebe ba ka ikubukanyeza baluti, ka ku ya ka litakazo za bona. Ba ka kelusa lizebe za bona kwa niti, ba yaulukele kwa matangu.” Kana Bakreste kaufela ne ba ka pumiwa? Batili. Paulusi n’a ekelize kuli: “Kono wena u iswale mwa linto kaufela; u itiise mwa butata; u eze musebezi wa mubuleli wa Evangeli; u feleleze za bukombwa bwa hao.” (2 Timotea 4:3-5; Luka 21:8; Likezo 20:29, 30; 2 Pitrosi 2:1-3) Timotea ni Bakreste ba bañwi ba ba sepahala ne ba latelezi kelezo ye buyelezwi yeo.

Bakreste ba Niti Ba Sa Swalisana

Sina Timotea, Bakreste ba niti kacenu ba iswala mwa linto kaufela ka ku hana lituto za batu ni ku amuhela fela litaba za mwa Mañolo ka za lituto za bulapeli bwa bona. (Makolose 2:8; 1 Joani 4:1) Ka ku likanyisa Bakreste ba kwa makalelo, Lipaki za Jehova ba sweli ku peta bukombwa bwa bona mwa linaha ze fitelela 230, ka ku iseza batu kai ni kai manzwi a Jesu a kwa makalelo, yona taba ye nde ya Mubuso. Ha mu nyakisise linzila z’e ne za butokwa ze ba swalisani hamoho ka zona mwa ku likanyisa Jesu ni ku latelela Bukreste bwa niti ku si na taba ni ko ba pila.

Litumelo za bona li tomile fa Linzwi la Mulimu. (Joani 17:17) Muprisita yo muñwi mwa Belgium n’a ñozi za bona kuli: “Nto ye ñwi ye lu kona ku ituta ku bona [Lipaki za Jehova] ki lilato la bona la ku lata ku teeleza kwa Linzwi la Mulimu ni bundume bwa bona bwa ku li kutaza.”

Ba sepile Mubuso wa Mulimu ku felisa matata a lifasi kaufela. (Luka 8:1) Mwa Barranquilla, kwa Colombia, Paki yo muñwi n’a kutalize ku Antonio, ya n’a li muyemeli yo  mutuna wa kopano ya bupolitiki. Paki yo n’a si ka yemela kopano ya Antonio, kamba ku yemela likopano ze ñwi li sili. Kono n’a kalisize ku ituta Bibele ni Antonio ni likaizel’a hae ku si na tifo. Kapili-pili Antonio a lemuha kuli Mubuso wa Mulimu kaniti ki yona sepo i nosi ya babotana mwa Colombia ni mwa lifasi kamukana.

Ba kuteka libizo la Mulimu. (Mateu 6:9) Lipaki za Jehova ha ne ba katani lwa pili Maria, Mukatolika ya sepahala ya pila mwa Australia, n’a ba lumelelize ku mu bonisa libizo la Mulimu mwa Bibele. N’a ikutwile cwani? U li: “Ha ne ni boni libizo la Mulimu mwa Bibele lwa pili, ne ni lilile. Ne ni susuelizwe ki ku lemuha kuli ne ni kona ku ziba ni ku itusisa libizo la Mulimu.” Maria n’a zwezipili ku ituta Bibele, mi lwa pili mwa bupilo bwa hae, n’a fitile fa ku ziba mw’a inezi Jehova mi n’a konile ku itama silikani se si sa feli ni yena.

Ba swalisani hamoho ka lilato. (Joani 13:34, 35) Bañoli ba mutende o bizwa The Ladysmith-Chemainus Chronicle, mwa Canada, ne ba ñozi kuli: “Ku si na taba ni bulapeli bwa mina kamba nihaikaba kuli ha mu balapeli, mu swanela ku babaza Lipaki za Jehova ba ba fita fa 4,500 ba ba sebelize ka t’ata viki ni licika ku yaha Ndu ya Mukopano ye eza limita ze 2,300 mwa butelele ni mwa bupala mwa tolopo ya Cassidy . . . Ku eza musebezi wo ka tabo ku si na likañi, lifapano kamba ku bata libubo ki sizibelo sa Bukreste bwa niti.”

Kacwalo ha mu nyakisise bupaki. Hailifo, baluti, balumiwa, ni ba ba yanga kwa likeleke za Krestendomu ba zwelapili ku talimana ni butata bo bu tuha bu ba wela bwa likauhano mwa likeleke za bona, Bukreste bwa niti bona bwa konda mwa lifasi-kaufela. Kaniti luli, Bakreste ba niti ba zwelapili ni musebezi wa bona o ba filwe wa ku kutaza ni ku luta Linzwi la Mulimu. (Mateu 24:14; 28:19, 20) Haiba mu mwahal’a ba ba ‘tonga ni ku lila’ kabakala lika ze maswe ze ezahala mi mu bilaezwa ki likauhano za mwa bulapeli bwa Krestendomu, lwa mi mema kuli mu swalisane ni Lipaki za Jehova mwa bulapeli bo bu swalisani bwa ku lapela Mulimu a nosi wa niti, Jehova.—Ezekiele 9:4; Isaya 2:2-4.