Mo Lu Boniseza Kuli Lwa Lata Mulimu

KU FITA fa ku lata Mulimu ha ku ami fela ku ba ni zibo. Batanga ba Mulimu mwa lifasi kaufela ba kona ku paka kuli lilato la niti la ku lata Mulimu li hulanga mutu h’a nze a fita fa ku ziba hande butu bwa hae, mi mane li ekezehanga mutu h’a nze a ziba lika z’a lata Mulimu, z’a toile, z’a tabela, ni z’a bata.

Jehova u italusa mwa Linzwi la hae, yona Bibele, mi ka lilato u lu file yona. Ku yona, lu ituta za n’a ezize Mulimu mwa miinelo ye shutana-shutana. Sina liñolo le li zwa ku mutu ye lu lata ha li kona ku lu tabisa, Bibele ni yona ya lu tabisa ha lu fumana ku yona lika ze nca ka za butu bwa Jehova.

Kono, sina ka mo lu bonelanga fokuñwi mwa bukombwa bwa luna kwa batu, ku ituta ka za Mulimu fokuñwi ha ku tahisangi kuli mutu a mu late. Kwa Majuda ba bañwi be ne ba si na buitebuho, Jesu n’a ize: “Mu balisisa Mañolo kakuli mu sepile ku fumana mwateñi bupilo bo bu sa feli; . . . kono ni ziba kuli lilato la Mulimu ha li yo ku mina.” (Joani 5:39, 42) Ba bañwi b’a nganga lilimo-limo inze ba ituta ka za likezo z’e lilato za Jehova, kono niteñi ha ba mu lati hahulu. Kabakalañi? Ba palelwanga ku yeya ze ba ituta. Kono bolule-lule ba ba na ni niti be lu itutanga Bibele ni bona, ba fumananga kuli lilato la bona ku Mulimu li zwelapili ku hula. Kabakalañi? Kakuli sina mo ne lu ezelize luna, ba latelela mutala wa Asafi. Ka nzila ifi?

Mu Yeye ka Buitebuho

Asafi n’a ikatulezi ku hulisa lilato la Jehova mwa pilu ya hae. N’a ñozi kuli: “Ne ni ikupula mwa pilu . . . Ni ka hupulisa misebezi ya [Muñ’a] Bupilo, e, ni bulele ze komokisa za linako za kale. Ni ka hupula misebezi ya hao  kaufela, ni bulele likezo za hao.” (Samu 77:6, 11, 12) Lilato la ku lata Mulimu li ka hula mwa pilu ya mutu ya nahanisisanga likezo za Jehova, sina mwa n’a ezelize walisamu.

Hape, ku hupula ze nde ze lu boni mwa sebelezo ya luna ku Jehova ku tiisa bulikani bwa luna ni yena. Muapositola Paulusi n’a bulezi kuli lu “sebeza ni Mulimu,” mi batu ba ba sebeza hamoho ba kona ku ba ni bulikani bo bu ipitezi luli. (1 Makorinte 3:9) Ha lu bonisa lilato la luna ku Jehova, wa itebuha, mi seo si tabisa pilu ya hae. (Liproverbia 27:11) Mi ha lu kupa tuso ya Jehova, mi a lu etelela mwa butata bo buñwi, lwa ziba kuli u inzi ni luna, mi lilato la luna ku yena la hula.

Batu ba babeli ha ba talusezana maikuto a bona, silikani sa bona sa hula. Ka nzila ye swana, ha lu bulelela Jehova libaka ha lu ipeile ku yena, lilato la luna ku yena la hula. Lu ka fumana kuli lu ka nahana manzwi a Jesu a’ li: “Lata Mulena Mulimu wa hao ka pilu ya hao kaufela, ni ka [moyo, NW] wa hao kaufela, ni ka kutwisiso ya hao kaufela, ni ka mata a hao kaufela.” (Mareka 12:30) Ki sifi se lu kona ku eza kuli lu bone teñi kuli lwa zwelapili ku lata Jehova ka pilu, ka moyo, ka kutwisiso, ni ka m’ata a luna kaufela?

Ku Lata Jehova ka Pilu ya Luna Kaufela

Mañolo a bulela za pilu ya swanisezo, ili mutu wa mwahali—litakazo, mibonelo, ni maikuto a luna. Kacwalo ku lata Jehova ka pilu ya luna kaufela ku talusa kuli ku tabisa Mulimu ki yona nto ya butokwa ka ku fitisisa. (Samu 86:11) Ha lu ba ni butu bw’a tabela, lu bonisa kuli lu na ni lilato le li cwalo. Lu lika ku likanyisa Mulimu ka ku ‘toya bumaswe ni ku kumalela bunde.’—Maroma 12:9.

Lilato la luna ku Mulimu li ama mo lu ikutwela ka za lika kaufela. Ka mutala, lu kana lwa fumana kuli musebezi wa luna w’a tabisa luli, kamba u tokwa mamelelo ye tuna, kono kana k’o ki kona ko lu beile pilu ya luna? Kutokwa. Ka ku ba kuli lu lata Jehova ka pilu ya luna kaufela, nto ya pili ku luna ki ku ba likombwa za Mulimu. Hape, lu bata ku tabisa bashemi, bosinyalana ni luna, ni batu be lu belekela, kono lu bonisa lilato la luna la ka pilu kaufela ku Jehova ka ku bata ku tabisa yena pili. Mane, u lukela ku ba yena wa butokwa ka ku fitisisa mwa pilu ya luna.—Mateu 6:24; 10:37.

Ku Lata Jehova ka Moyo wa Luna Kaufela

Mwa Mañolo, linzwi la “moyo” li talusa yena mutu ka sibili ni bupilo bw’a na ni bona. Kacwalo, ku lata Jehova ka moyo wa luna kaufela ku talusa ku sebelisa bupilo bwa luna mwa ku mu lumbeka ni ku bonisa kuli lwa mu lata.

 Ki niti kuli lwa kona ku eza lika ze ñwi mwa bupilo, ze cwale ka ku ituta musebezi, ku eza pisinisi, kamba ku babalela lubasi. Kono ka nako ye swana, lu bonisa lilato la ka moyo kaufela ku Jehova ka ku eza lika ka mw’a batela ni ku eza lika ze ñwi ka butokwa bo bu swanela mwa bupilo bwa luna, mi kacwalo ili ku ‘bata pili mubuso wa Mulimu ni ku luka kwa hae.’ (Mateu 6:33) Bulapeli bwa ka moyo kaufela hape bu talusa ku ba ni cisehelo. Lu bonisa Jehova kuli lwa mu lata ka ku kutaza taba ya Mubuso ka cisehelo, ku bulela ze susueza ha lu li mwa mikopano, kamba ku tusa mizwale ni likaizeli ba luna ba Sikreste. Mwa linto kaufela, lu zwelapili ku “eza se si latwa ki Mulimu ka pilu ye nde [“ka moyo kaufela,” NW].”—Maefese 6:6.

Jesu n’a bonisize lilato la ka moyo kaufela ku Mulimu ka ku itoboha. N’a beile tato ya Mulimu mwa sibaka sa pili, ni butokwi bwa hae bwa ka butu mwa sibaka sa bubeli. Jesu n’a lu susuelize ku latelela mutala wa hae. N’a ize: “Mutu h’a lata ku ni latelela, u na ni ku itoboha, a lwale [kota ya hae ya linyando, NW] mi a ni siyale mwamulaho.” (Mateu 16:24, 25) Ku itoboha ku talusa ku ineela. Ku talusa kuli lu lata hahulu Mulimu kuli mane lwa ifana ku yena, sina Muisilaele wa mwa linako za litaba ze mwa Bibele ha n’a lata muñ’a hae hahulu kuli mane n’a ifana ku yena ni ku ba mutang’a hae kamita. (Deuteronoma 15:16, 17) Ku neela bupilo bwa luna ku Jehova ku fa bupaki bo bu tiile bwa kuli lwa mu lata.

Ku Lata Jehova ka Kutwisiso ya Luna Kaufela

Ku lata Jehova ka kutwisiso ya luna kaufela ku talusa kuli lu lika ka mo lu konela kaufela ku utwisisa butu, milelo, ni z’a bata Jehova. (Joani 17:3; Likezo 17:11) Lu bonisa lilato la luna ku Jehova ka ku itusisa buikoneli kaufela bwa munahano wa luna kwa ku tusa ba bañwi kuli ni bona ba fite fa ku lata Jehova ni ka ku bolosola buikoneli bwa luna bwa ku luta. Muapositola Pitrosi n’a susuelize kuli: “Mu itame mwa teka ya kutwisiso ya mina.” (1 Pitrosi 1:13) Hape lu ikataza ku iyakatwa ba bañwi, sihulu be lu sebeleza Mulimu ni bona. Lwa ziba miinelo ya bona mi lwa bona ha ba tokwa ku babazwa kamba ku omba-ombiwa.

Ha lu tuhelela munahano wa luna ku zamaiswa ki yena, lu bonisa Jehova kuli lu mu lata ka kutwisiso ya luna kaufela. Lu lika ku bona lika mw’a li bonela, lu itinga ku yena ha lu eza likatulo, mi lu na ni sepo ya kuli muezezo wa hae wa lika ki ona o munde ka ku fitisisa. (Liproverbia 3:5, 6; Isaya 55:9; Mafilipi 2:3-7) Kono ha lu nze lu zwelapili ku bonisa lilato la luna ku Mulimu, lu kona ku itusisa cwañi m’ata a luna?

Ku Lata Jehova ka M’ata a Luna Kaufela

Mikulwani ba bañata mwa puteho ya Sikreste ba sebelisa m’ata a bona mwa ku lumbeka Jehova. (Liproverbia 20:29; Muekelesia 12:1) Nzila ye ñwi ye ba bonisa ka yona mikulwani ba bañata ba Sikreste kuli ba lata Jehova ka m’ata a bona kaufela ki ku abana mwa sebelezo ya bupaina, bona bukombwa bwa ka nako kaufela. Bome ba bañata ba abananga mwa bukombwa b’o, bana ba bona ha ba li kwa likolo. Kwand’a ku tokomela mabasi a bona, maeluda ba ba sepahala ba ba ezanga misipili ya bulisana ba bonisa kuli ba lata Jehova ka m’ata a bona kaufela. (2 Makorinte 12:15) Jehova u fa ba ba mu sepile m’ata, kuli ba kone ku bonisa lilato la bona ka ku mu lumbeka, ka ku itusisa m’ata e ba na ni ona kaufela.—Isaya 40:29; Maheberu 6:11, 12.

Lilato ha li tokomelwa, la hula. Kacwalo, lu zwelapili ku fumana nako ya ku yeya. Lu hupula z’a lu ezelize Jehova ni mabaka ha lu swanela ku ipeya ku yena. Ka ku ba bana ba Adama ba ba si ka petahala, ha lu koni ni kamuta ku swanelwa ki “z’a lukiselize [Mulimu] ba ba mu lata,” kono lwa kona ku bonisa kuli lwa lata Jehova ka butu bwa luna kaufela. Haike lu zwelepili ku eza cwalo!—1 Makorinte 2:9.

[Siswaniso se si fa likepe 20]

Ka likezo, lu bonisa kuli lwa lata Mulimu