Lipuzo Ze Zwa kwa Babali

Kiñi ze n’e ezahalile ka mo ku ñolezwi kwa Exoda 4:24-26, mi kana ne li bupilo bwa Mushe bo ne bu li mwa kozi?

Mushe n’a libile kwa Egepita ni musal’a hae, Zipora, ni bana ba hae bo Gerishomi ni Eliezere, ha ne ku ezahezi taba ye: “Ha ba li mwa nzila fo ne ba tibelela, [Muñ’a] Bupilo a katana Mushe [“a mu katana,” NW], a bata ku mu bulaya. Cwale Zipora a nga licwe le li buhali, a sehulula litalo la mwan’a hae, a li latela mwa mautu a Mushe [“mwa mautu a hae,” NW], a li: Luli, wena munn’a ka, ku na u munna wa mali [“Libaka kikuli u munyali wa mali ku na,” NW]. Cwale [Muñ’a] Bupilo a mu lisela. Ki nako y’a mu bulelela musali, a li: Munn’a ka ki wa mali [“Munyali wa mali,” NW]! A bulela cwalo kabakala mupato.” (Exoda 4:20, 24-26) Nihaike liñolo leo ha li buleli lika patalaza mi ha ku konahali ku ziba hande ze li talusa, niteñi Mañolo a’ fa monyehelo-nyana fa litimana zeo.

Liñolo leo mwa puo mo ne li ñozwi pili, ha li buleli kuli ki bupilo bwa mañi luli bo ne bu li mwa kozi. Nihakulicwalo, kw’a utwahala ha ne lu ka bulela kuli ne si bupilo bwa Mushe, kakuli kihona ha n’a sa z’o fungulwa ki Mulimu ku y’o lukulula Maisilaele mwa Egepita. (Exoda 3:10) Ku bonahala ku luneha kuli Mushe ha n’a li mwa nzila ya ku y’o peta musebezi w’o, a batiwe ku bulaiwa ki lingeloi la Mulimu. Kacwalo neikaba bupilo bwa yo muñwi wa bana ba hae. Mulao o n’o filwe Abrahama kwamulaho ka za mupato n’o ize: “Mutu wa munna ya si ka kena mwa mupato, mi ya si ka sehululwa nama ya hae, mutu yo u ka zwiswa kwa sicaba sa habo, kakuli u sinyize bulikani bwa ka.” (Genese 17:14) Mushe ku bonahala n’a keshebisize ku sehulula mwan’a hae, mi kacwalo mwana n’a li fakaufi ni ku bulaiwa ki lingeloi la Jehova.

Kana ne li mahutu a Mushe ao Zipora n’a latezi litalo la n’a sehuluzi ku mwan’a hae ka ku lika ku lukisa litaba? Ne li lingeloi la Jehova le ne li na ni m’ata a ku bulaya mwana ya n’a si ka sehululwa y’o. Kacwalo, kw’a utwahala Zipora ha n’a ka latela litalo kwa mahutu a lingeloi, ili ku li fa bupaki bwa kuli u latelezi za mwa bulikani.

Pulelo ya Zipora ye li “u munyali wa mali ku na” ya komokisa. I bonisañi ka za hae? Ka ku mamela kwa hae ze n’e tomilwe mwa bulikani bwa mupato, Zipora n’a bonisa kuli u mwa tumelelano ya bulikani ni Jehova. Bulikani bwa Mulao bo ne bu til’o itamiwa ni Maisilaele ne bu bonisize kuli mwa tumelelano ya bulikani, Jehova u kona k’u ngiwa ku ba munna ya nyezi mi b’a itamile bulikani ni bona ba kona ku ngiwa ku ba musali ya nyezwi. (Jeremia 31:32) Kacwalo, ka ku biza Jehova (ka lingeloi la hae) kuli “munyali wa mali,” Zipora ku bonahala n’a itumelela ka sibili buipeyo bwa hae kwa lipimo za bulikani b’o. Ne ku swana inge n’a amuhezi mayemo a musali ya nyezwi mwa bulikani bwa mupato, Jehova Mulimu ili yena munyali. Ka mo ne ku bezi kaufela, kabakala ku pakisa ku kwanisa za n’a tokwa Mulimu, bupilo bwa mwan’a hae ne bu yangwezwi.