Mukiti O Mi Ama

JESU KRESTE ha n’a sa li fa lifasi, n’a tatekile mukiti o kutekehisa Mulimu. W’o ki ona fela mukiti wa bulapeli wa n’a laezi balateleli ba hae ku no u ezanga. N’o li Mulalelo wa Mulena.

M’u nge kuli mwa iponela kwa mukunda lika ze ezahala pili Mulalelo w’o u si ka ciwa. Jesu ni baapositola ba hae ba kopani mwa muzuzu wa kwahalimu mwa Jerusalema kuli ba eze Paseka ya Sijuda. Ba felize ku ca lico za kamita za Paseka, ili ngu ye besizwe, miloho ye baba, buhobe bo bu si ka ya mumela, ni veine ye fubelu. Muapositola y’a sa sepahali, Judasi Isikariota u lunduzwi mi a tuha a beteka Mulen’a hae. (Mateu 26:17-25; Joani 13:21, 26-30) Jesu u siyezi ni baapositola ba hae ba ba sepahala b’a 11. Mateu ki yo muñwi wa ku bona.

Ka ku ya ka taba ya n’a iponezi Mateu, Jesu n’a tatekile cwana Mulalelo wa Mulena: “Jesu a nga buhobe [bo bu si ka ya mumela], a lumba, a bu komauna, a bu fa balutiwa ba hae, a li: Mu nge, mu ce; se, ki mubili wa ka. A nga ni sinwiso [sa veine], a itumela, mi a ba fa sona, a li: Mu nwele mwateñi kaufela. Kakuli se ki mali a ka, a’ sululelwa ba bañata, bakeñisa swalelo ya libi.”—Mateu 26:26-28.

Ki kabakalañi Jesu ha n’a tatekile Mulalelo wa Mulena? Ha n’a ezize mukiti w’o, ki kabakalañi ha n’a itusisize buhobe bo bu si ka ya mumela ni veine ye fubelu? Kana balateleli ba Kreste kaufela ne ba na ni ku ca liswanisezo zeo? Mulalelo wo n’o ka eziwanga ha ku fitile nako ye kuma kai? Mi kana mukiti w’o u na ni tuso luli ku mina?