“U Eze Musebezi wa Mubuleli wa Evangeli”
“U Eze Musebezi wa Mubuleli wa Evangeli”
“U iswale mwa linto kaufela; . . . u eze musebezi wa mubuleli wa Evangeli.”—2 TIMOTEA 4:5.
1. Jesu n’a file balateleli ba hae musebezi mañi?
LIBIZO la Jehova ni milelo ya hae li sweli ku zibahazwa mwa lifasi kaufela. Libaka kikuli batu ba Mulimu ba ba ineezi ba amuhezi musebezi w’o Jesu Kreste n’a file balateleli ba hae ha n’a ize: “Mu ye . . . mu lute macaba kaufela, mu ba kolobeze ka Libizo la Ndate, ni la Mwana, ni la Moya o Kenile; mu ba lute ku mamela ze ni mi laezi kaufela.”—Mateu 28:19, 20.
2. Muokameli Timotea n’a filwe taelo ifi, mi ki ifi nzila ye ñwi yeo baokameli ba Sikreste ba kona ku feleleza ka yona za bukombwa bwa bona?
2 Balutiwa ba Jesu ba ikale ne b’a ngile musebezi w’o ka butuna. Ka mutala, muapositola Paulusi n’a elelize Timotea muokameli ka yena wa Sikreste kuli: “U eze musebezi wa mubuleli wa Evangeli; u feleleze za bukombwa bwa hao.” (2 Timotea 4:5) Kacenu, nzila ye ñwi yeo muokameli a feleleza ka yona za bukombwa bwa hae ki ka ku ba mushaeli wa Mubuso ya tukufalezwi, ili ya yanga kamita mwa bukombwa bwa mwa simu. Ka mutala, muokameli wa Tuto ya Buka ya Puteho u na ni tohonolo ye nde ya ku etelela mwa musebezi wa ku kutaza ni ku luta ba bañwi. Paulusi n’a petile buikalabelo bwa hae bwa ka butu bwa ku zibahaza taba ye nde, mi n’a tusize mwa ku luta ba bañwi bukombwa.—Likezo 20:20; 1 Makorinte 9:16, 17.
Be Ne Ba Tukufalezwi ku Bulela Evangeli Kwamulaho
3, 4. Filipi n’a petile lifi mwa ku bulela evangeli?
3 Bakreste ba kwa makalelo ne ba zibwa ka ku ba babuleli ba evangeli ba ba tukufalezwi. Mu nahane mubuleli wa evangeli Filipi. Ne li yo muñwi wa “banna ba ba 7, ba ba sepahala, ba ba tezi Moya ni butali” be ne ba ketilwe ku abela ka zazi lico ku si na ku ketulula mwahal’a limbelwa za Sikreste za Magerike ni za Maheberu mwa Jerusalema. (Likezo 6:1-6) Sebelezo ye ipitezi yeo ha se i felile ni nyandiso ha se i hasanyize bote kwand’a baapositola, Filipi a ya kwa Samaria. Kwateñi a y’o zibahaza taba ye nde mi a matafazwa ki moya o kenile ku leleka badimona ni ku folisa lianga za mautu ni batu ba ba omelezi lilama. Masamaria ba bañata ne ba amuhezi taba ya Mubuso mi ba kolobezwa. Baapositola mwa Jerusalema ha ba utwile zeo, ba luma baapositola bo Pitrosi ni Joani kwa Samaria ilikuli balumeli be ne ba sa z’o kolobezwa bao ite ba yo fiwa moya o kenile.—Likezo 8:4-17.
4 Moya wa Mulimu ku tuha f’o wa libisa Filipi ku y’o kopana ni nduna wa Muetopia mwa nzila ye ne i liba kwa Gaza. Filipi ha s’a talusize hande-nde bupolofita bwa Isaya, munna y’o ye “neli sikombwa se situna sa Kandasi, mulena wa Etopia wa musali” a lumela ku Jesu Kreste mi a kolobezwa. (Likezo 8:26-38) Filipi h’a felize a ya kwa Ashidodi mi hape ni kwa Sesarea, mwa nzila “inz’a bulela Evangeli mwa minzi kamukana.” (Likezo 8:39, 40) Kaniti n’a file mutala o munde wa ku eza musebezi wa mubuleli wa evangeli!
5. Bana ba Filipi ba bane ba basizana ne ba bubana kañi luli?
5 Filipi n’a sa tukufalezwi za bukombwa mwa Sesarea lilimo ze bat’o ba ze 20 hasamulaho. Bo Paulusi ni Luka ha ne ba tibelezi mwa ndu ya hae, munna y’o “n’a na ni bana ba basizana ba bane, ba ba si ka nyalwa haisali, ba ba ne ba polofita.” (Likezo 21:8-10) Kaniti ne ba lutilwe hande kwa moya, ne ba tukufalezwi bukombwa, mi mane ne ba na ni tohonolo ya ku bulelanga ka bupolofita. Tukufalelo ya bashemi mwa bukombwa i kona ku susueza bana ba bashimani ni ba basizana kacenu ku ba babuleli ba evangeli ba ba tukufalezwi mwa bupilo bwa bona kaufela.
Ba Ba Tukufalezwi ku Bulela Evangeli Kacenu
6. Babuleli ba evangeli ba ikale ne ba petileñi?
6 Mwa bupolofita bwa hae bo butuna ka za miteñi ya luna ni nako ya mafelelezo, Jesu Kreste n’a ize: “Evangeli i na ni ku bulelwa pili mwa macaba kaufela.” (Mareka 13:10) Mafelelezo n’a ka taha taba ye nde ha se i kutalizwe “mwa lifasi kaufela.” (Mateu 24:14) Paulusi ni babuleli ba bañwi ba evangeli ba ikale ha ne ba shaezi taba ye nde, batu ba bañata ne ba bile balumeli, mi liputeho ne li tomilwe mwa libaka ze ñata kai ni kai mwa Mubuso wa Maroma. Maeluda be ne ba ketilwe ku sebeleza mwa liputeho zeo ne ba swalisani ni mizwale ni likaizeli za bona mwa musebezi wa ku bulela evangeli mi ne ba kutalize ni kwa libaka ze kwahule. Linzwi la Jehova ne li zwezipili ku hula ni ku sebeza ka m’ata mwa mazazi ao, sina mo li bezi kacenu kabakala bolule-lule ba Lipaki za Jehova ba ba eza musebezi wa ku bulela evangeli. (Likezo 19:20) Kana ni mina mu ba bañwi ba bashaeli ba Jehova ba ba tabile bao?
7. Bashaeli ba Mubuso ba ezañi kacenu?
7 Fo ba fumanela kolo kaufela, bashaeli ba Mubuso ba miteñi ye ba sweli ku ekeza kwa kabelo ya bona mwa musebezi wa ku bulela evangeli. Likiti-kiti se ba keni mwa simu ya bulumiwa, mi bolule ba ba myanda-nda ba keni mwa ku bulela evangeli ka nako ye ñata sina mapaina ba kamita ni ba ku tusa. Mi ki musebezi kwa bunde o ezwa ki bahasanyi ba banna, basali, ni banana ba ba shaela Mubuso ka tukufalelo! Ka maniti, batu kaufela ba Jehova ba fuyolwa hahulu ki yena ha ba nze ba mu sebeleza ka swalisano sina Bakreste ba ba bulela evangeli.—Zefania 3:9.
8. Ki ufi musebezi wa ku swaya liswayo o sweli ku ezwa cwale, mi u ezwa ki bomañi?
8 Mulimu u file balateleli ba Jesu ba ba tozizwe musebezi wa ku shaela taba ye nde kai ni kai mwa lifasi. Ba ba ba tusa mwa musebezi wa ku bulela evangeli w’o ki palo ye ekezeha ya “lingu ze ñwi” za Kreste. (Joani 10:16) Ka mo ne ku polofitezwi, musebezi o punyusa w’o u swanisezwa kwa ku beya liswayo fa lipata za ba ba tonga ni ku lila kabakala bumaswe bo butuna bo bu ezahala cwale. Bahedeni ba ka tuha ba yundiswa. Ku si ka ezahala kale cwalo, ki tohonolo hakakañi ku fitisa litaba ze punyusa zeo ku ba ba yahile mwa lifasi!—Ezekiele 9:4-6, 11.
9. Ba ba sa z’o kala-kala ba kona ku tusiwa cwañi mwa bukombwa?
9 Haiba se lu kalile kale ku eza musebezi wa ku bulela evangeli, mwendi luli lwa kona ku tusa kwateñi ba ba sa z’o kala-kala mwa puteho ya luna. Fokuñwi, lu kana lwa lukisa kuli ba ye ni luna mwa bukombwa. Ba ba li maeluda ba ka bata ku eza mo ba konela kaufela ku yaha kwa moya balumeli ba bañwi. Buikatazo bo bunde bwa baokameli ba ba ikokobeza bu kona ku tusa hahulu ba bañwi ku ba babuleli ba evangeli ba ba tukufalezwi ili ba ba beya miselo.—2 Pitrosi 1:5-8.
Ku Paka fa Ndu ni Ndu
10. Kreste ni balateleli ba hae ba kwa makalelo ne ba tomile mutala ufi mwa bukombwa?
10 Jesu Kreste n’a tomezi balateleli ba hae mutala o munde hahulu mwa ku bulela evangeli. Ka za bukombwa bwa Kreste ni baapositola ba hae, Linzwi la Mulimu li li: “Jesu a ya mwa minzi ni minzinyana, a nz’a luta batu, a bulela Evangeli ya mubuso wa Mulimu, mi n’a inzi ni ba ba lishumi ka ba babeli.” (Luka 8:1) Baapositola ka sibili bo? Moya o kenile ha s’o suluzwi ka nako ya Pentekonta ya 33 C.E., ne “ba si ka lisela, ka mazazi kaufela, ku luta batu, ni ku bulela mwa Tempele ni mwa mandu kuli Jesu ki Kreste.”—Likezo 5:42.
11. Ka ku ya ka Likezo 20:20, 21, muapositola Paulusi n’a ezizeñi mwa bukombwa bwa hae?
11 Kabakala musebezi wa hae wa ku bulela evangeli ka tukufalelo, muapositola Paulusi n’a kona ku bulelela maeluda ba Sikreste ba kwa Efese kuli: “Ha ni si ka mi patela taba, niheba i liñwi, ya ze mi swanela; kono ni mi taluselize zona, ni ku mi luta zona, fande mwa mapatelo, ni ka ku pota mwa ndu ni ndu.” Paulusi ha n’a ‘luta mwa ndu ni ndu,’ kana n’a pota fa mandu a balapeli ba bañwi ba Jehova, ili ku potela balumeli ka bulisana? Batili, kakuli u zwelapili ku talusa, u li: “[Ne] ni nze ni pakela Majuda ni Magerike za ku baka ko ku isa ku Mulimu, ni za ku lumela ku Jesu Kreste Mulen’a luna.” (Likezo 20:20, 21) Ba ba ineezi kale ku Jehova ne ba si ke ba tokwa hahulu litaelo ka za “ku baka ko ku isa ku Mulimu, ni za ku lumela ku Jesu Kreste Mulen’a luna.” Paulusi n’a twaelize maeluda ba Sikreste ba kwa Efese mwa bukombwa bwa fa ndu ni ndu ha n’a nz’a luta ba ba si balumeli ka za ku baka ni tumelo. Ka ku eza cwalo, Paulusi n’a kopisa muezezo wa n’a tomile Jesu.
12, 13. Ka ku lumelelana ni Mafilipi 1:7, batu ba Jehova ba ezizeñi ka za tukelo ya bona ya ku kutaza?
12 Bukombwa bwa fa ndu ni ndu bu kona ku ba t’ata. Ka mutala, ba bañwi b’a nyemanga ha lu ya fa lapa la bona ni taba ye mwa Bibele. Haki mulelo wa luna ku nyemisa batu. Niteñi, bukombwa bwa fa ndu ni ndu bu tomile fa Mañolo, mi lilato ku Mulimu ni batu li lu susumeza ku fa bupaki ka nzila yeo. (Mareka 12:28-31) Kuli ‘lu lwanele ni ku tiisa’ ka mulao tukelo ya luna ya ku kutaza fa ndu ni ndu, lu isize litaba mwa likuta, hamoho ni mwa Kuta ye Pahami ya United States. (Mafilipi 1:7) Ibat’o ba kamita, kuta yeo i lu atulezi hande litaba. Ki wo mutala wa likatulo ze s’e filwe:
13 “Ku hasanya ka mazoho mapampili a bulapeli ki mukwa o zwa kwahule wo balumiwa ba hasanya ka ona evangeli—o kalezi kwa simuluho ya mishini ya ku hatisa ka yona. W’o u bile mukwa o sebeza hahulu mwa bulapeli bo bu shutana-shutana ku zwa lili k’o. Nzila yeo ya ku bulela ka yona evangeli i itusiswa hahulu kacenu ki likwata ze shutana-shutana za bulapeli b’o bayemeli ba bona ba isa Evangeli kwa likiti-kiti za mandu ni ku lika ku sikulula batu ka ku ba potela ka butu. . . . Mukutalezo w’o u’ ngiwa ka butuna mwatas’a Mulao o Lukisizwe [wa Mutomo wa Milao ya United States] sina mo i ngelwa milapelo ya mwa likeleke ni ku kutaza fa katala.”—Murdock v. Pennsylvania, 1943.
Mutundameti wa ku Kutaza Ki Wañi?
14. Bukombwa bwa luna bu kona ku tisa zwelopili ifi?
14 Ku na ni mabaka a mañata a ku paka fa ndu ni ndu. Nako ni nako ye lu potela mutu, lu lika ku cala peu ya niti ya mwa Mañolo. Ha lu eza misipili ya makutisezo, lu lika ku i selaela. Mi k’u kona ku ba ni zwelopili ye nde, kakuli Paulusi n’a ñozi kuli: “Na ni calile, Apolosi u selaezi mezi; kono ya melisize, ki Mulimu.” (1 Makorinte 3:6) Kacwalo, lu zweleñipili ku ‘cala ni ku selaela,’ inze lu kolwa kuli Jehova ‘u ka melisa.’
15, 16. Ki kabakalañi ha lu kuta-kutela ku potela batu kwa mandu a bona?
15 Lu eza musebezi wa ku bulela evangeli kakuli bupilo bwa batu bu mwa kozi. Ka ku kutaza lwa kona ku ipilisa ni ku pilisa ba ba lu utwa. (1 Timotea 4:16) Ha ne lu ka ziba kuli mutu u mwa kozi, kana ne lu ka lika fela hañwi ku mu tusa? Kutokwa! Bakeñisa kuli batu b’a kona ku piliswa, lu kuta-kutela ku ba potela fa mandu a bona. Miinelo i zwelapili ku cinca. Mutu ya eza kuli kacenu h’a na nako ya ku teeleza, kamuso a ka swana a tabela ku teeleza kwa taba ye mwa Bibele. Kamba lu kana lwa fumana fa lapa mutu u sili mwa lubasi l’o, mi ku kana kwa ba ni ngambolo ya mwa Mañolo ni yena.
16 Haki miinelo fela ya beñi ba mandu ye kona ku cinca kono hape ni moya wa bona. Ka mutala, mutu ya tomohile hahulu pilu kabakala ku shwelwa ki mulatiwa a kana a tabela ku teeleza kwa taba ya Mubuso. Lu bata ku omba-omba mutu y’o, ku mu tusa ku lemuha z’a tokwa kwa moya, ni ku mu bonisa mw’a kona ku kwanisezwa za butokwi bwa hae.—Mateu 5:3, 4.
17. Ki lifi libaka le lituna le lu kutaleza?
17 Libaka le lituna le lu pakela fa ndu ni ndu kamba ku kutaza ka mikwa ye miñwi mwa bukombwa bwa Sikreste ki takazo ya ku abana mwa ku tumisa libizo la Jehova. (Exoda 9:16; Samu 83:18) Kwa nyakalalisa hakalo musebezi wa luna wa ku bulela evangeli ha u tusa ba ba lata niti ni ku luka ku ba balumbeki ba Jehova! Walisamu n’a opezi kuli: “Batangana hamoho ni likalibe; ni macembele, ni banana; a ba lumbeke Libizo la [Muñ’a] Bupilo; kakuli libizo la hae ki lona li nosi le li lumbiwa; kanya ya hae i pahami fahalimw’a lifasi ni a lihalimu.”—Samu 148:12, 13.
Ku Bulela Evangeli Kw’a Lu Tusa Ka Butu
18. Lu tuseha cwañi ka ku eza musebezi wa ku bulela evangeli?
18 Ku eza musebezi wa mubuleli wa evangeli kw’a lu tusa ka butu ka linzila ze shutana-shutana. Ku ya fa ndu ni ndu ka taba ye nde ku lu tusa ku hulisa buikokobezo, sihulu ha lu sa amuhelwi hande. Kuli lu be babuleli ba evangeli ba ba cuukile, lu tokwa ku ba sina Paulusi, ya n’a ‘ikezize linto kaufela kwa batu kaufela kuli a pilise ba bañwi.’ (1 Makorinte 9:19-23) Yeloseli mwa bukombwa i lu tusa ku ba ni maseme. Ka ku tiyela ku Jehova ni ku tokomela ze lu bulela, lwa kona ku mamela kelezo ya Paulusi ye li: “Mubulelelo wa mina ibe o na ni musa kamita, o lungilwe lizwai, kuli mu zibe mo mu lukela ku alabela mutu kaufela.”—Makolose 4:6.
19. Babuleli ba evangeli ba tusiwa cwañi ki moya o kenile?
19 Musebezi wa ku bulela evangeli hape u lu susumeza ku tiyela fa moya o kenile wa Mulimu. (Zakaria 4:6) Mi muselo wa ona—ili ‘lilato, tabo, kozo, pilu-telele, musa, bunde, busepahali [kamba, tumelo], ku ishuwa, ni buiswalo’—li ka kala ku bonahala mwa bukombwa bwa luna. (Magalata 5:22, 23) Moya o kenile u ama mo lu ezeza batu, kakuli ku ipeya kwatas’a ketelelo ya ona ku lu tusa ku bonisa lilato, ku ba ba ba tabile ili b’a kozo, ku ba ni pilu-telele ni musa, ku bonisa bunde ni tumelo, ni ku bonisa buishuwo ni buiswalo ha lu nze lu zibahaza taba ye nde.
20, 21. Ki lifi limbuyoti ni lituso ze ñwi ze zwa mwa ku pateha ku bulela evangeli?
20 Mbuyoti ye ñwi ku luna babuleli ba evangeli ki ya kuli lu ba hahulu ni mañeke. Batu ha ba bulela matata a bona—ili makulanu, kutokwa mubeleko, butata fa lapa—ha lu ipi ku ba baelezi, kono lu bala ni bona mañolo a’ susueza ili a’ omba-omba. Lu iyakatwa batu ba ba foufalizwe kwa moya kono ili ba ba bonahala kuli b’a tabela za ku luka. (2 Makorinte 4:4) Mi ki mbuyoti hakakañi ku tusa kwa moya ba ba kana ba tabela “bupilo bo bu sa feli”!—Likezo 13:48.
21 Ku ezanga kamita musebezi wa ku bulela evangeli ku lu tusa ku isa hahulu pilu ku za kwa moya. (Luka 11:34) Kaniti nto yeo ya tusa, kakuli hakusicwalo lu ka swana lwa komiwa ki miliko ya ku lata bufumu ye yambile lifasi le. Muapositola Joani n’a elelize Bakreste kuli: “Mu si ke mwa lata lifasi, nihaiba ze mwateñi mwa lifasi; mutu h’a lata lifasi, lilato la Ndate ha li yo ku yena. Kakuli ze mwa lifasi kaufela, takazo ya nama, ni takazo ya meto, ni buikuhumuso bwa bupilo, ha li zwi ku Ndate, kono li zwa mwa lifasi. Mi lifasi la fela, ni takazo ya lona; kono ya eza tato ya Mulimu u ina ku ya ku ile.” (1 Joani 2:15-17) Ku pateha sina babuleli ba evangeli ba ba tukufalezwi musebezi wa Mulena ku lu tusa ku pima ku lata lifasi.—1 Makorinte 15:58.
Mu Ikubukanyeze Bufumu kwa Lihalimu
22, 23. (a) Ki bufi bufumu bo ba ikubukanyeza babuleli ba evangeli ba Sikreste? (b) Taba ye tatama i ka lu tusa cwañi?
22 Ku kutaza za Mubuso ka tukufalelo ku tahisa lituso ze inelela. Jesu n’a bonisize cwalo ha n’a ize: “Mu si ke mwa ikubukanyeza bufumu mwa lifasi, fo ku na ni maswele ni mafumi a’ ca fateñi, ni fo ku na ni masholi ba ba punya mwateñi, ba ba uzwa. Kono mu ikubukanyeze bufumu kwa lihalimu, fo ku si na maswele a’ ca fateñi, ni fo ku si na masholi ba ba punya kwateñi, ba ba uzwa. Kakuli fo bu inzi bufumu bwa hao, ki fo i inzi ni pilu ya hao.”—Mateu 6:19-21.
23 Haike lu zweleñipili ku ikubukanyeza bufumu kwa lihalimu, inze lu ziba kuli ha ku na tohonolo ye lu kona ku ba ni yona ye fita ya ku yemela Jehova Muambakani-ya-Pahami sina Lipaki za hae. (Isaya 43:10-12) Ha lu nze lu peta musebezi o lu filwe sina likombwa za Mulimu, mwendi lu ka ikutwa sina musali wa Sikreste ya matela mwa lilimo za ma-90 ya n’a bulezi cwana ka za ku sebeleza Mulimu nako ye telele, kuli: “Ku zwa fo ni kalezi ni itumela ku Jehova h’a tiyezi bufokoli bwa ka lilimo ze kaufela, mi ni lapela ka pilu kaufela kuli a zwelepili ku ba Ndate ya ni lata, ku ya ku ile.” Haiba ni luna lwa itebuha hahulu cwalo silikani sa luna ni Mulimu, kaniti lu bata ku eza musebezi wa ku bulela evangeli ka ku tala. Taba ye tatama i ka lu tusa ku bona mo lu kona ku feleleleza za bukombwa bwa luna.
Ne Mu Ka Alaba Cwañi?
• Ki kabakalañi ha lu swanela ku eza musebezi wa mubuleli wa evangeli?
• Mu kona ku bulelañi ka za musebezi wa babuleli ba evangeli ba kwamulaho ni ba kacenu?
• Ki kabakalañi ha lu paka fa ndu ni ndu?
• Mina ka sibili mu tuseha cwañi ka ku eza musebezi wa mubuleli wa evangeli?
[Lipuzo za Tuto]
[Maswaniso a fa likepe 10]
Kacenu, ku na ni ba ba nyakalala ku ba babuleli ba evangeli ka ku swana sina Filipi ni bana ba hae
[Siswaniso se si fa likepe 14]
Mina ka butu mu tuseha cwañi ha mu nze mu taluseza ba bañwi taba ye nde?