Kana Ki Ku Sa Foseza Fela Ba Bañwi?

“ZO SA lati kuli li ezwe ku wena, u si li ezi ku ba bañwi.” Lishitanguti l’e kuti ne li bulezwi ki Confucius muluti ya tumile wa kwa China ya n’a li caziba wa za mihupulo ya batu. Kacenu, ili lilimo ze bat’o ba 2,500 ku zwa fo ne li bulelezwi, ba bañata ba sa lumela kuli mutu u ba ya lukile haiba ha fosezi fela ba bañwi.

Ki niti kuli lishitanguti leo la Confucius la tusa. Kono Bibele i sinula nto ye ñwi ka za batu ni mo ba swanela ku ezezana. Kwand’a ku bulela za libi za ku foseza ba bañwi, Bibele i bulela hape za libi za ku sa eza ka bomu ze swanela ku ezwa. Jakobo mulutiwa wa Sikreste n’a ñozi kuli: “Ya ziba ku eza bunde, mi a sa bu ezi, u eza sibi.” (Jakobo 4:17) Ku fita fela ku laela Bakreste kuli ba si ke ba foseza ba bañwi, Jesu Kreste n’a file kelezo ye li: “Linto kamukana ze mu lata kuli batu ba mi ezeze, mu ba ezeze zona ni mina.”—Mateu 7:12.

Mulimu kwa makalelo n’a lelile kuli batu ba eze ba bañwi mo ne ba ka tabela ku ezezwa. Ka mwa n’a bupezi batu, Mulimu n’a bonisize mutala o munde hahulu wa ku iyakatwa buiketo bwa ba bañwi: “Mulimu a eza mutu ka siswaniso sa hae; a mu eza ka siswaniso sa Mulimu. A ba eza ili munna ni musali.” (Genese 1:27) Seo si talusa kuli Mulimu ka lilato n’a file batu lizwalo, ilikuli ha li lutilwe hande, li kone ku ba tusa ku eza ba bañwi ka mo ba ka tabela ku ezezwa.

Ba bañata kacenu ba nyanda fela ba si na sepo ni tuso; ba nyandiswa ki baitati ni ba ba sa iyakatwi ba bañwi. Kacwalo se si tokwahala haki ku sa foseza kamba ku sa holofaza fela ba bañwi kono ki ku ba ezeza ze nde ni ku ba tusa. Kabakaleo, Lipaki za Jehova ba itatezi ku nga muhato wa ku tusa ba bañwi kuli ba itute za sepo ye nde hahulu ye mwa Linzwi la Mulimu. Ha ba potela ba bañwi kuli ba ba taluseze taba ye nde ya mwa Bibele, ba eza cwalo ka moya wa lilato, wa ku eza ba bañwi mo ne ba ka tabela ku ezezwa.