Kana Mu Tokwa ku Ba mwa Keleke Ye Ñwi?

‘HA NI tokwi ku ba mwa keleke ye ñwi kamba ku yanga kwa keleke kamita kuli ni lumele ku Mulimu!’ Cwalo ki mona mo ba ikutwela batu ba bañata ka za ku ba lilama za keleke kamba bulapeli bufi kamba bufi. Mane ba bañwi ba bulela kuli ba ikutwanga ku ba hahulu bukaufi ni Mulimu ha ba li fande inze ba buha pupo, ku fita ha ba li kwa sebelezo ya bulapeli kwa keleke. Kacenu batu ba bañata ba lumela kuli ku lumela ku Mulimu ha ku tokwi ku swalisana ni bulapeli kamba keleke ye ñwi.

Kono ba bañwi bona ba ikutwela mu sili. Ba pihelela kuli, kuli mutu a tabelwe ki Mulimu, u lukela ku ba silama sa keleke ni ku n’o fumanehanga kwa lisebelezo, mi mane ku eza cwalo ki kwa butokwa. Kacwalo puzo ka za haiba ku swalisana ni bulapeli kwa tokwahala luli ha i ami fela ba ba itutanga za bulapeli kuli ba zibe lipalo kamba litaba fela ze ñwi. Ka mo ku inezi kaufela, ka ku ba kuli taba yeo i ama bulikani bwa luna ni Mulimu, kana ne ku si ke kwa ba ko ku utwahala ku ziba mubonelo wa Mulimu ka za taba yeo? Kacwalo he, lu kona ku itutañi mwa Linzwi la hae, yona Bibele ka za taba yeo?

Mulimu Mwa N’a Sebelisanezi ni Batu Kwamulaho

Lilimo ze bat’o ba ze 4,400 kwamulaho, munda o bulaya wa ambeka lifasi kaufela. Kezahalo ye cwalo ha i libalehi ka bunolo, mi batu mwa lifasi kaufela ba na ni makande a yona a ze n’e ezahezi kwa makalelo. Nihaike ze mwa makande ao z’a shutana, likalulo ze ñata za ona za swana, mi zeo li kopanyeleza taba ya kuli ki batu b’a sikai fela be ne ba punyuhile ni lifolofolo ze ñwi.

Kana be ne ba punyuhile Munda ne li batu fela be ne ba bile ni litohonolo? Taba ya mwa Bibele i bonisa kuli ne ku si ka ba cwalo. Nto ye lemuseha ki ya kuli Mulimu n’a si ka zibisa mutu ni mutu ka za Munda o n’o taha. Kono n’a bulelezi Nuwe, mi yena a lemusa batu be  ne ba pila mwa linako zeo ka za Munda o n’o taha.—Genese 6:13-16; 2 Pitrosi 2:5.

Ku punyuha ne ku itingile fa ku ba mwa sikwata se ne si swalisani seo, ni ku ba ya tabela ku amuhela ketelelo yeo Mulimu n’a file Nuwe. Nihaiba lifolofolo ze n’e keni mwa aleka ni ku punyuha Munda, ne li punyuhile kakuli ne li swalisani ni sona sikwata seo. Nuwe n’a filwe litaelo hande kuli a eze litukiso za ku pulusa ka zona libupiwa ze pila.—Genese 6:17–7:8.

Hamulaho wa lilimo ze mianda-nda, baikulu ba Nuwe ka Sema mwan’a hae ba ya kwa Egepita mwa butanga. Niteñi, mulelo wa Mulimu ne li wa ku ba lukulula ni ku ba tisa mwa naha ya n’a sepisize Abrahama kukw’a bona. Ni f’o hape, taba yeo ne i si ka bulelelwa mañi ni mañi, kono pili ne i bulelezwi be ne ba ketilwe ku ba baeteleli ba bona, ili Mushe ni Aruni muhulwan’a hae. (Exoda 3:7-10; 4:27-31) Batu be ne ba li batanga bao ha se ba lukuluzwi sina sikwata ku zwa mwa Egepita, ne ba filwe Mulao wa Mulimu kwa Lilundu la Sinai mi ba ba sicaba sa Isilaele.—Exoda 19:1-6.

Maisilaele ka buñwi ne ba konile fela ku lukuluha kakuli ne ba swalisani ni sikwata se ne si tomilwe ki Mulimu mi ne ba latelezi ketelelo ya be ne ba ketilwe ku etelela sikwata seo. Mane ne ku ezizwe litukiso za kuli Maegepita ka buñwi ba swalisane ni sona sikwata seo, se ne si tabelwa luli ki Mulimu. Maisilaele ha ne ba zwile mwa Egepita, Maegepita bao ne ba ile ni bona, mi kacwalo ili ku ba ni sepo ya ku fuyaulwa ki Mulimu.—Exoda 12:37, 38.

Mi mwa linako za baapositola, Jesu n’a kalile musebezi wa hae wa ku kutaza, ili ku kubukanya batu kuli ba be balutiwa ba hae. N’a sebelisani ni bona sina sikwata, nihaike n’a fanga tuso ya ka butu ka mo ne ku tokwahalela. Jesu n’a bulelezi baapositola b’a 11 ba ba sepahala kuli: “Mina mu tiiselize ni na mwa miliko ya ka; mihe ni ka mi fa mubuso, sina ndate h’a ni file ona.” (Luka 22:28, 29) Hasamulaho, moya wa Mulimu o kenile ne u sululezwi balutiwa ha ne ba kubukani, ba li sikwata.—Likezo 2:1-4.

Mitala ye i bonisa hande kuli kwamulaho, Mulimu kamita u sebelisani ni batu ba hae ka ku ba sikwata. Batu b’a sikai bao Mulimu n’a sebelisani ni bona ka buñwi, sina Nuwe, Mushe, Jesu, ni ba bañwi, n’a itusisize bona kwa ku fitisa litaba kwa sikwata se ne si swalisani. Ha ku na libaka la ku lumela kuli Mulimu kacenu u sebelisana ni batanga ba hae ka nzila i sili. Kaniti taba yeo i zusa puzo ye ñwi: Kana ku swalisana ni bulapeli bufi kamba bufi ku likani? Lu ka nyakisisa puzo ya butokwa yeo mwa taba ye tatama.

[Siswaniso se si fa likepe 4]

Ka nako ye telele, Mulimu u sebelisani ni batu ba hae ka ku ba sikwata