Ki Bufi Bulapeli Bo Mu Swanela ku Keta?

‘BULAPELI bo bu shutana-shutana ki mikwakwa fela ye libile kulo kulikuñwi. Niti ki ya kuli ku na ni Mulimu a li muñwi fela, nji cwañi?’ Tumelo yeo i fumaneha ku ba bañata ba ba ikutwa kuli nihaike ku ba mwa bulapeli bo buñwi ku butokwa, bulapeli bw’a keta mutu ku ba ku bona haki ki nto ya butokwa hahulu.

Mutu h’a sa nahanisisi hande, mubonelo w’o u kona ku ba o utwahala, ka ku ba kuli ki niti kuli ku na ni Mulimu a li muñwi fela wa niti, yena Ya M’ata Ote. (Isaya 44:6; Joani 17:3; 1 Makorinte 8:5, 6) Niteñi, ha lu koni ku itimeza ku shutana, mane ni ku lwanisana kwa litumelo mwahal’a bulapeli bo buñata bo bu ipala ku sebeleza Mulimu wa niti. Likwata zeo za bulapeli li shutana hahulu mwa likezo, litumelo, lituto, ni ze tokwahala kwa batu. Lishutano za teñi ki ze tuna hahulu kuli mane ba bulapeli bo buñwi ba fumananga t’ata ku utwisisa kamba ku amuhela lituto kamba litumelo za bulapeli bo buñwi.

Kono Jesu n’a ize: “Mulimu ki Moya, mi ba ba mu lapela, ba swanezi ku mu lapela ka Moya ni ka niti.” (Joani 4:24) Kana mwa ku lapela Mulimu ka niti kwa konahala kuli ku be ni mihupulo ye miñata ye lwanisana ka za kuli Mulimu ki mañi, milelo ya hae ki ifi, ni kuli u bata ku lapelwa ka nzila ifi? Kana kwa utwahala ku lumela kuli Mulimu Ya M’ata Ote h’a na taba kuli lu mu lapela ka nzila ifi?

Bakreste ba Niti ba Kwakale ni ba Cwale

Bakreste ba mwa linako za baapositola fokuñwi ne ba banga ni mibonelo ye shutana ya lika. Ka mutala, muapositola Paulusi ha n’a bulela ka za ba kwa Korinte n’a ize: “Ni bulelezwi bakeñisa mina, banabahesu, ki ba ndu ya Kloe, kuli likañi li teñi ku mina. Se ni bulela ki se, kikuli ku mina, mutu ni mutu, u ipulelela, u li: Na, ni wa Paulusi; na, ni wa Apolosi; na, ni wa Kefasi; na, ni wa Kreste.”—1 Makorinte 1:11, 12.

Kana Paulusi n’a nga likañi zeo ku ba nto ye nyinyani? Kana kikuli mutu ni mutu n’a itamaela mwa mukwakwa wa hae o libile kwa puluso? Kutokwa! Paulusi n’a elelize kuli: “Na mi lapela banabahesu, ka Libizo la Mulen’a luna, Jesu Kreste, kuli kaufel’a mina mu bulele taba i liñwi, mi likauhano li be siyo ku mina; kono mu kopane hande ka maikuto a li mañwi, ni ka muhupulo u li muñwi.”—1 Makorinte 1:10.

Kaniti, ku ba ni tumelo ye swana ha ku koni ku taha ka ku hapelezwa. Ku taha fela batu ha ba batisisa litaba ka tokomelo ni ku fita fa kutwisiso ye swana, ni ku i amuhela. Kacwalo,  ku ituta ka butu Linzwi la Mulimu ni ku ba ni takazo luli ya ku sebelisa ze itutiwa ki kwa butokwa kuli swalisano ya n’a bulezi Paulusi ka za yona i be teñi. Kana swalisano ye cwalo ya kona ku fumanwa? Ka mo se lu bonezi, ka nako ye telele, Mulimu u sebelisani ni batu ba hae ka sikwata. Kana ku ziba sona sikwata seo kwa konahala kacenu?

Bunde bwa ku Swalisana ni Sikwata Se Si Swanela

Walisamu Davida nako ye ñwi n’a buzize kuli: “[Muñ’a] Bupilo, ki mañi ya ka ina mwa Tabernakele ya hao? Ki mañi ya ka yaha fa lilundu la hao le li kenile?” Yeo kaniti ki puzo ye tahiseza mutu ku nahana. Davida n’a file kalabo ya kuli: “Ki ya na ni mizamao ye lukile, mi a eza ka ku sepahala, a bulela niti mo i li teñi mwa pilu ya hae.” (Samu 15:1, 2) Kutwisiso ye nepahezi ya Bibele i ka tusa mutu ku ziba bulapeli bo bu eza lika z’a tokwa Mulimu zeo. Mi ka ku swalisana ni sona sikwata seo, mutu u ka kona ku ba mwa swalisano ye yahisa ni batu ba ba swalisani mwa ku lapela Mulimu “ka Moya ni ka niti.”

Lipaki za Jehova ba bonisize kuli ku ba ni swalisano mwa litumelo ni likezo kw’a konahala nihaiba mwa lifasi la kacenu le li si na swalisano. Mwahal’a bona ku na ni be ne ba banga mwa bulapeli bo bu shutana bo buñata-ñata, ni ba lisimuluho ze shutana ze ñata. Lipaki ba bañwi kwamulaho ne ba lumela kuli za Mulimu ha li zibwi mi ba bañwi mane ne ba li h’a yo. Ba bañwi bona ne ba sa nahanisisangi fela za bulapeli. Mwahal’a bona batu ba bulapeli, lizo, ni mihupulo ye shutana zeo ku zwile batu be se ba ikola swalisano mwa bulapeli, ili swalisano ye sa fumanehi mwa lifasi kacenu.

Swalisano ye cwalo i tahiswa ki Bibele, lona Linzwi la Mulimu. Ki niti kuli Lipaki za Jehova ba ziba kuli ha ba koni ku laela ba bañwi za ku eza. Kono ba itebuha tohonolo ya ku susueza ba bañwi ku ituta mwa Bibele ilikuli liketo ze ba eza mwa litaba za bulapeli li itinge ku ona mutomo o tiile w’o. Ka nzila yeo, ba bañata ni ku fita ba kona ku amuhela kwa limbuyoti ze tahiswa ki ku lapela Mulimu “ka Moya ni ka niti.”

Kacenu, ku na ni kozi ye tuna ya ku tahelwa ki likukuezo ni licoezo ze maswe. Ku ba ni swalisano ye swanela ku butokwa. Bibele i li “ya kopana ni ba ba butali, ni yena u ka talifa” ni kuli “litwaelano ze maswe li sinya mikwa ye minde.” (Liproverbia 13:20; 1 Makorinte 15:33) Ku swalisana ni balapeli ba niti ba Mulimu kwa sileleza. Kacwalo, Bibele i lu hupuza kuli: “A lu babalelane, kuli lu susumezane mwa lilato ni mwa misebezi ye minde. Lu si ke lwa tuhela liputeho za luna, mo ba ezeza ba bañwi; kono lu kutazane, sihulu ka ku bona kuli lizazi le lituna li sutelezi.” (Maheberu 10:24, 25) Kaniti ku na ni mbuyoti ye tuna muta balikani ba niti, mizwale ni likaizeli ba kwa moya, ba tusana mwa ku peta buikalabelo bwa bona ku Mulimu!

Ottmar u paka buniti bwa mubonelo w’o. Niha n’a huliselizwe mwa lubasi lwa Sikatolika mwa Germany, n’a tuhezi ku yanga kwa keleke. U talusa kuli: “Fo ne ni yelanga kwa keleke kaufela, ne ni kutanga kwateñi inze ni ikutwa mo ne ni ikutwela ha ni ya, ha ku na tuso ye ni fumana teñi.” Niteñi n’a si ka tuhela ku lumela ku Mulimu. Ku tuha f’o a ziba Lipaki za Jehova mi a kolwa kuli ki bona batanga ba niti ba Mulimu. A bona butokwa bwa ku swalisana ni bona. Cwale u li: “Ka ku sebelisana ni kopano ya mwa lifasi kaufela, ni na ni kozo ya mwa munahano ni pilu. Ni sweli na tusiwa ku ba ni zibo ye nepahezi ya Bibele. Yeo ki nto ya butokwa hahulu ku na.”

Memo ku Ba Ba Bata

Batu ba ba na ni mubonelo o swana ba ba sebeza sina sikwata ba kona ku peta musebezi hande ku fita batu ba ba sebeza ba sa swalisani. Ka mutala, taelo ya malaezo yeo Jesu n’a file balateleli ba hae ne li ya kuli: “Mu ye cwale, mu lute macaba kaufela, mu ba kolobeze ka Libizo la Ndate, ni la Mwana, ni la Moya o  Kenile; mu ba lute ku mamela ze ni mi laezi kaufela.” (Mateu 28:19, 20) Musebezi o cwalo ne u ka petiwa cwañi hande kambe ne ku si na ketelelo kamba tamaiso hande? Mutu n’a ka kona ku utwa cwañi taelo ya ka Mañolo yeo ha n’a ka lika ku sebeleza Mulimu a sa swalisani ni ba bañwi?

Ñohola, Lipaki za Jehova mwa lifasi kaufela ne ba abezi libuka, libukanyana, ni libroshuwa z’e 91,933,280 ze bulela litaba za mwa Bibele, ni limagazini ze 697,603,247, mi ka ku eza cwalo ne ba fitisize lushango lwa Linzwi la Mulimu kwa batu ba bañata-ñata mwa linaha ze 235. B’o ki bupaki luli bwa kuli buikatazo bwa ka sikwata, bo bu zamaiswa hande bu peta ze tuna ku fita ze kona ku petiwa ki buikatazo bwa mutu a li muñwi!

Kwand’a ku fa libuka za litaba za mwa Bibele, Lipaki za Jehova ba zamaisanga lituto za Bibele ba sa lifisi, ili ku tusa batu ku utwisisa ka butungi z’a tokwa Mulimu. Ñohola, ka viki ne ku zamaisizwe avareji ya lituto za Bibele z’e 5,726,509 kwa batu ka buñwi kamba ka likwata. Lituto za Bibele zeo li tusize bolule-lule ba batu ku ba ni mutomo o tiile ha ba eza liketo mwa litaba za bulapeli. Mwa memiwa ku ituta z’a tokwa Mulimu ka mo li boniselizwe mwa Bibele. Mi kihona mu ka eza keto.—Maefese 4:13; Mafilipi 1:9; 1 Timotea 6:20; 2 Pitrosi 3:18.

Haiba mu bata ku tabisa Mulimu, ku swalisana ni bulapeli bo buñwi ku butokwa—kono isi ku swalisana ni bulapeli bufi kamba bufi. Mu tokwa ku eza keto ya za bulapeli ka ku ya ka zibo ye nepahezi ya mwa Bibele, isiñi ka ku ya ka lituto ze si na mutomo kamba ka mabulatwi. (Liproverbia 16:25) Mu itute ze tokwahala mwa bulapeli bwa niti. Mu li bapanye ni litumelo za mina. Mi cwale mu kete ka mo ku swanehela.—Deuteronoma 30:19.

[Maswaniso a fa likepe 7]

Lipaki za Jehova ba swalisani mwa lifasi le li si na swalisano