Lipuzo Ze Zwa kwa Babali

Ki kabakalañi Davida, mutang’a Jehova ya sepahala ha n’a lumelelize musal’a hae Mikali ku ba ni siswaniso sa terafimi, ka mo ku boniselizwe kwa 1 Samuele 19:12, 13?

Pili, ha lu nyakisiseñi hanyinyani taba kaufela. Musal’a Davida ha n’a tilo utwa kuli Mulena Saule n’a bata ku bulaya Davida, a nga muhato kapili-pili. Bibele i li: “Mikali kih’a shetumukiseza Davida mwa lihaulo. Davida a ikela cwalo, a toba, a banduka. Mikali a nga terafimi [ili yeo ku bonahala ne i bupehile ni ku swana sina mutu], a i lobaza mwa bulobalo, a i samisa litalo la puli kwa toho, a i apesa ni kubo.” Batu ba Saule ha ne ba tile ku t’o swala Davida, Mikali a ba bulelela kuli: “Wa kula.” Nto yeo ne i tahisize kuli ku be ni tiyeho mwa ku bata-bata Davida, mi Davida a toba.—1 Samuele 19:11-16.

Lika za kwaikale ze pumbuzwi li bonisa kuli maswaniso a literafimi ne a si ka bulukelwa fela kuli a itusiswe ku za bulapeli kono ni kwa lika cwalo za ka mulao. Sina mañolo a mubu ni mañolo a siile mufu h’a kona ku paka muyoli wa sanda kacenu, maswaniso a literafimi ni ona ne a itusiswa cwalo kwaikale. Ku bonahala kuli ku ba ni terafimi fokuñwi ne ku konisa mukwenyan’a mutu ku yola sanda sa mukwenyan’a hae ya shwile. Mwendi ki lona libaka Rahele ha n’a kile a nga maswaniso a literafimi a bondat’ahe ni libaka bondat’ahe ha ne ba likile ka t’ata ku mu amuha ona. Zeo ha ne li ezahala, Jakobo munn’a Rahele, n’a sa zibi za n’a ezize musal’a hae.—Genese 31:14-34.

Maisilaele ha ne ba bile sicaba, ne ba filwe Milao ye Lishumi, mi wa bubeli ku ona n’o ba hanisize ku ikezeza maswaniso. (Exodas 20:4, 5) Hasamulaho, mupolofita Samuele n’a amile kwa mulao wo ha n’a ambola ni Mulena Saule. N’a ize: “Ku ikuhumusa ku likana ni sibi sa ku eza buloi; mi bungulunde bu swana sina sebelezo ya maswaniso ni ya literafimi.” (1 Samuele 15:23) Kabakaleo, ha ku bonahali kuli mwa Isilaele literafimi ne li itusiswa kwa ku paka muyoli wa sanda. Nihakulicwalo, ku bonahala kuli tumelo ya mioya yeo ya kwaikale ya Sijuda ne i zwezipili mwa mabasi a mañwi a Maisilaele. (Baatuli 17:5, 6; 2 Malena 23:24) Taba ya kuli Mikali n’a bulukile siswaniso sa terafimi mwahal’a libyana za hae i bonisa kuli n’a sa sebelezi Jehova ka pilu i liñwi. Mwendi Davida n’a sa zibi se siñwi ka za siswaniso seo sa terafimi kamba mwendi n’a si tuhelezi fela kakuli Mikali ne li mwan’a Mulena Saule.

Maikuto a Davida ka za ku lapela Jehova a nosi a bonisizwe mwa manzwi a’ li: ‘Muñ’a Bupilo ki yo muhulu, mi u lukela ku lumbiwa hahulu; wa sabisa ku fita milimu kaufela. Kakuli milimu kaufela ye mwa macaba ki maswaniso fela; kono Muñ’a Bupilo ki yena ya ezize mahalimu.’—1 Makolonika 16:25, 26.

[Siswaniso se si fa likepe 29]

Wa bubeli kwa Milao ye Lishumi ne u hanisize ku ikezeza maswaniso, a cwale ka terafimi ye bonisizwe fa

[Manzwi a bañi ba siswaniso]

Siswaniso si zwa mwa buka ye bizwa The Holy Land, Vol. II, 1859