‘N’a Lu Lutile ku Kuteka Lipimo za Bulapeli bwa Hae’

YO MUÑWI wa Lipaki za Jehova wa mwa provinsi ya Rovigo, kwa Italy, n’a taluselizwe kuli n’a kula kansa, mi muinelo wa hae ne u bilaeza. Hasamulaho wa ku swalwa hañata mwa sipatela, ili mo n’a ikupezi ku alafiwa ku si na ku pompelwa mali, a kala ku alafelwanga kwa ndu ki manasi ba mwa sibaka seo ba ba alafa kansa.

Mukuli y’o wa lilimo ze 36 n’a tabisize hahulu baalafi ba hae ka ku bonisa tumelo ye tiile ni ku lata ku swalisana. Nakonyana pili mukuli y’o a si bulaiwa kale ki butuku bwa kansa, nasi yo muñwi ya n’a mu alafa n’a ñozi mwa magazini ya manasi ka za mukuli y’o ya n’a file libizo la Angela.

“Angela ki ya manyalu mi u na ni takazo ya ku pila. Wa ziba hande kuli butuku bwa hae ki bo butuna, mi sina mwa n’a ka ezeza ufi kamba ufi wa luna, u bata kalafo kamba mulyani. . . . Luna manasi ne lu fitile fa ku mu ziba nako ha i nze i ya. Ku mu alafa ne ku si ka tatafala. Ku bulela ka ku lukuluha kwa Angela ne ku tahisize kuli lika kaufela li lu bele bunolo. Ne ku tabisa ku mu alafa, kakuli ne lu ziba kuli yeo ne li nako ya ku swalisana ni mutu y’o ya sepahala ni ku tusana ni yena. . . . Kapili-pili lwa lemuha kuli ne ku ka lu bela t’ata ku mu alafa bakeñisa bulapeli bwa hae.” Cwalo kona mwa n’a hupulela mualafi y’o kakuli n’a nga kuli Angela n’a swanela ku pompelwa mali, kono n’a hanile.—Likezo 15:28, 29.

“Ka ku ba baalafi, lwa taluseza Angela kuli ne lu sa lumelelani ni katulo ya hae, kono ka tuso ya hae, lwa utwisisa kuli bupilo ne li bwa butokwa ku yena. Hape ne lu fitile fa ku utwisisa kuli ku yena ni lubasi lwa hae, bulapeli bwa bona ne li bwa butokwa. Angela ha si ka zwafa. Ha si ka felelwa ki sepo kabakala butuku bwa kula. Wa itiisa. U na ni takazo ya ku pila, ku satalala, ni ku zwelapili ku pila. U zibahalize takazo ya hae, ni tumelo ya hae. U na ni tundamo ye lu sa bangi ni yona hañata, ni tumelo ye tiile, ye fita ya luna. . . . Angela u lu lutile butokwa bwa ku mu alafa ka ku ya ka lipimo za bulapeli bwa hae, nihaike ku eza cwalo ha ku lumelelani ni likuka za musebezi wa luna. . . . Lu lumela kuli Angela u lu lutile tuto ya butokwa hahulu, kakuli lu kopananga ni batu ba mifuta kaufela, miinelo ya mifuta kaufela, ni bulapeli bwa mifuta kaufela, mi lwa kona ku ituta se siñwi ku b’ote be lu kopana ni bona, ni ku fa tuso.”

Taba ya mwa magazini yeo cwale ya koñomeka ze ñozwi mwa Code of Professional Ethics for Italian Nurses, ze ne lumelelizwe mwa 1999, ze li: “Nasi u alafa mutu ka ku ya ka litumelo, lipimo, sizo, mubala wa litalo, hamoho cwalo ni ka ku ya ka haiba ki musali kamba ki munna.” Ka linako ze ñwi ku kana kwa ba t’ata kuli madokota ni manasi ba kuteke litumelo za mutu za bulapeli, mi kaniti, ba ba itakaleza ku eza cwalo ba itebuhiwa luli.

Lipaki za Jehova b’a nahanisisanga ba si ka eza kale likatulo ka za buikangulo bwa bona ni ka za likalafo ze ba swanela ku fiwa. Ba nyakisisanga hande ze a bulela Mañolo, mi sina mutala wa Angela ha se u bonisize, haki bañañeli. (Mafilipi 4:5) Mwa lifasi kaufela, palo ya baalafi ba ba itakaleza ku kuteka lizwalo la bakuli ba bona ba ba li Lipaki i sweli ya ekezeha.