Lipuzo Ze Zwa kwa Babali

Ki kabakalañi banna ba Maisilaele ha ne ba lumelelizwe ku nyala basali be ne ba hapilwe mwa ndwa hailif’o Mulao wa Mushe ne u laela kuli ba si ke ba nyala bazwahule?—Deuteronoma 7:1-3; 21:10, 11.

Libaka seo ha ne si lumelelizwe ne li ama miinelo ye ipitezi. Jehova n’a laezi bana ba Isilaele ku sinya minzi ya macaba a 7 mwa naha ya Kanana, ni ku bulaya bayahi ba yona kaufela. (Deuteronoma 20:15-18) Kwa macaba a mañwi, mwendi ba bahulu fela be ne ba ka punyuha ki balyanjo be ne ba hapilwe. (Numere 31:17, 18; Deuteronoma 20:14) Munna wa Muisilaele n’a kona ku nyala musali ya cwalo, kono ku na ni lika ze ñwi za n’a swanela ku eza musali y’o.

Bibele i bulela ka za lika za n’a swanela ku eza musali ya cwalo, kuli: “A beulwe kwa toho, a pumwe manala a hae; a tubulwe liapalo za hae z’a hapilwe ni zona, mi a ine mwa ndu ya hao inz’a lila ndat’ahe ni m’ahe kweli i li ñwi; kihona u ka mu nyala, u be munn’a hae, yena a be musal’a hao.”—Deuteronoma 21:12, 13.

Mwalyanjo ya n’a hapilwe ya n’a batiwa ki Muisilaele kuli a mu nyale n’a lukela ku beula milili kwa toho ya hae. Ku beula milili ne ku bonisa kuli mutu u mwa maswabi kamba ziyezi. (Isaya 3:24) Ka mutala, muta toho ya lubasi Jobo n’a shwezwi ki bana ba hae ni ku latehelwa ki maluo a hae, n’a ipeuzi milili kwa toho ili ku bonisa kuli n’a li mwa maswabi. (Jobo 1:20) Musali wa muzwahule hape n’a lukela ‘ku puma manala a hae’ ilikuli niha n’a ka be a’ pentile, mazoho a hae n’a si ke a bonahala hande. (Deuteronoma 21:12) Cwale “liapalo za hae z’a hapilwe ni zona” ze n’a swanela ku tubuliswa ne li nto mañi? Kamita basali ba mwa minzi ya bahedeni ne ba apalanga liapalo ze nde ka ku fitisisa ha ne ba tuha ba hapiwa. Ne ba ezanga cwalo ka ku sepa kuli ne ba ka tabelwa ki be ne ba til’o ba hapa. Musali ya hapilwe ili ya n’a li mwa maswabi n’a swanela ku tubula liapalo ze cwalo.

Musali ya hapilwe ili ya n’a ka nyalwa ki munna wa Muisilaele n’a na ni ku lila ka kweli i liñwi balatiwa ba hae be ne ba shwile. Minzi ye n’e tuzwi ne i lukela ku sinyiwa luli kuli musali y’o n’a ka tokwa nihaiba mwanahabo yena kamba ba bañwi ba n’a ziba ba ba siyezi. Kabakala kuli masole ba Isilaele ne ba ka be ba tubile milimu ya hae ya maswaniso, ne ku si ke kwa konahala kuli a lapele maswaniso hape. Kweli ya maswabi hape ne i ka tusa musali ya n’a hapilwe ku ikenisa kwa mikwa kaufela ya bulapeli bwa hae bwa kale.

Niteñi, ne ku sa talusi kuli basali ba bazwahule kaufela ne ba li mwa muinelo o swana. Ka za seo, ne ku bulezwi kuli: “U si ke wa nyalela ku bona; u si ke wa nyalisa mwan’a hao wa musizana ku mwan’a bona wa mushimani, mi u si ke wa ngela mwan’a hao wa mushimani, mwan’a musizana wa ku bona.” (Deuteronoma 7:3) Ki kabakalañi kaniso yeo ha ne i filwe? Deutronoma 7:4 i li: “Kakuli mwan’a hao wa mushimani u ka keluswa ki bona, a ni tuhele kuli a y’o sebeleza milimu i sili.” Kacwalo kaniso yeo ne i fezwi ku sileleza bana ba Isilaele kwa bulapeli bo bu silafezi. Kono musali wa muzwahule ya mwa muinelo o bulezwi kwa Detronoma 21:10-13 n’a sa koni ku tahisa kozi ye cwalo. Banabahabo yena kaufela ne ba shwile, mi milimu ya hae ya maswaniso ne i sinyizwe. N’a si na swalisano ni ba bulapeli bwa buhata. Muisilaele na lumelezwa ku nyala muzwahule mwa miinelo ye cwalo.