“Mina Mu Lapele Cwana”

KANA mwa ziba manzwi a Tapelo ya Mulena? Ki tapelo ye li mutala ya n’a lutile Jesu Kreste. Ha n’a fa Ngambolo ya hae ye zibahala hahulu ya fa Lilundu, Jesu n’a ize: “Cwale mina mu lapele cwana.” (Mateu 6:9) Bakeñisa kuli ne i kalisizwe ki Jesu, hañata i biziwanga kuli ki Tapelo ya Mulena, ili yeo hape i zibahala sina tapelo ya Ndat’a Luna.—Latin, Paternoster.

Bolule-lule mwa lifasi kamukana se ba petile Tapelo ya Mulena ni ku i kuta-kutela hañata, mwendi mane ka zazi ni zazi. Mwa lilimo za cwanoñu fa, batu ba bañata se ba petile yona tapelo yeo kwa likolo ni kwa mikiti ya nyangela. Ki kabakalañi Tapelo ya Mulena ha i ngiwa ka butuna cwalo?

Cyprian, muluti wa za bulapeli wa mwa lilimo za ma-200 C.E., n’a ñozi kuli: “Ki tapelo ifi ye bonisa hahulu ku ba ni tumelo ku fita ya n’a lu file Kreste . . . ? Ki tapelo ifi ya ku lapela ku Ndate ye li ye buniti ku fita ye n’e lapezwi ki Mwana ya li Niti?”—Joani 14:6.

Mwa katekisema ka bona, ba Keleke ya Roma Katolika ba nga tapelo ya Ndat’a Luna ku ba “tapelo ya butokwa hahulu kwa Bakreste.” Hatiso ya The World Book Encyclopedia i lumela kuli tapelo yeo ki ya butokwa mwa likeleke kaufela za Krestendomu, mi i biza tapelo yeo kuli ki ye ñwi ya “lipulelo za butokwa za tumelo ya Bakreste.”

 Niteñi, lu swanela ku lemuha kuli buñata bwa ba ba petanga Tapelo ya Mulena ha ba i utwisisi ka ku tala. Mutende o bizwa Ottawa Citizen wa kwa Canada, n’o ize: “Haiba mu kile mwa ba mwa bulapeli bo buñwi bwa Sikreste ka nako ye ñwi kwamulaho ku si na kakanyo mwa kona ku peta Tapelo ya Mulena ka bubebe mu sa kakateli, kono mwendi mu kana mwa ba ni butata bwa ku i bulela ka ku iketa ni ka kutwisiso.”

Kana ki kwa butokwa hahulu luli ku utwisisa litapelo ze lu lapela ku Mulimu? Ki kabakalañi Jesu ha n’a lu file Tapelo ya Mulena? I talusañi ku mina? Ha lu nyakisiseñi zona lipuzo zeo cwale.