Piho ya Bashaeli Ba Mubuso

Ku Bata Batu Ba Ba Swanela mwa Matakanyani a Australia

KALULO ye tuna ye fahal’a naha ya Australia ki matakanyani. Mwa libaka ze ñwi ze kwahule zeo, ha ku si ka kutazwa taba ye nde ka lilimo ze 12. Kacwalo Lipaki za Jehova ba mwa Darwin, muleneñi o mutuna wa Northern Territory, ne ba lukisize mungendenge wa ku yo kutaza mwa sibaka seo ka mazazi a 9 ili ku yo bata batu ba ba swanela.—Mateu 10:11.

Litukiso zeo ne li kalile ku lukiswa likweli ze 12 pili nako ya mungendenge wo i si ka fita kale, mi ze ñwi za litukiso zeo n’e li ku lala mapa ya sibaka se si eza likilomita ze fitelela 800,000 mwa butelele ni mwa bupala—ili sibaka se situna ku eza kuli naha ya New Zealand i kena halalu ku sona. Kuli lu utwisise hande butuna bwa sibaka se si kwahule seo, mu nahane kuli ye ñwi ya linzila ze si ze telele hahulu ye zwa fa mulaka wa likomu ku ya ko ku na ni mandu i eza likilomita ze fitelela 30! Hape butelele bwa sibaka se si mwahal’a milaka ye miñwi bu eza likilomita ze 300 kamba ku fitelela f’o.

Palo hamoho ya Lipaki ba ne ba itatezi ku abana mwa mungende wo ne li 145. Ba bañwi ne ba zwa kwa libaka za kwahule inge cwalo Tasmania. Ba bañwi ne ba tile ka limota ze kona ku fita mwa lishabati mi ne ba longile lika za ku itusisa ha ba tibelela kokuñwi, lisipi za limota, ni mafula a mwa mota. Ba bañwi ne ba shimbile lika za bona za matibelelo mwa litilela za limota za bona. Hape ne ku lifezwi limbasi ze peli ze na ni lipula ze 22 kuli li shimbe ba ne ba si na limota ze kona ku fita mwa lishabati. Ba ne ba kwezi mwa limbasi zeo ne ba tukufalezwi ku kutaza kwa batu ba mwa litoloponyana ze mwa kalulo ya simu ye ne ketilwe.

Ba si ka tama kale musipili wa bona, mizwale ne ba lukisize ku fa lingambolo ni ku eza liponiso ze bonisa mwa ku yo fitiseza taba ye nde mwa kalulo ya simu ye sa kutalezwangi yeo. Ka mutala, ku kutaza hande ku ba mishobo ya mwa Australia ne ku tokwa ku latelela likuka ze ñwi ni ku tekelela hande lizo za bona. Ne ku buhisanwi ni taba ya ku tokomela kuli lifolofolo li silelezwe.

Ne ku bile ni ze bonwi ze ñata ze ne zwile mubano. Ka mutala, mwa kandiana cwana ka ba mushobo  o muñwi, mizwale ne ba lukisize kuli ku fiwe ngambolo ya nyangela ye tomile fa Bibele. Musali ya n’a li muñ’a munzi ki yena ya n’a ile ka sibili ku zamaya inze a zibisa batu ka za tukiso yeo. Hamulaho wa ngambolo yeo, baputehi ne ba siyezwi libuka ze 5 ni libroshuwa ze 41. Mwa kandiana ka kañwi hape, mizwale ne ba katani yo muñwi wa bana ba naha ya Australia. Mane n’a na ni Bibele ya King James Version, nihaike kuli ne li ya kale mi ne se i pazauhile hahulu. Ha n’a buzizwe ka za haiba wa ziba libizo la Mulimu, n’a alabile kuli wa li ziba mi a comola Tora ya ku Libelela ya kale mwa pokoto ya baki ya hae. A apula Tora yeo ni ku bala manzwi a ñozwi kwa Mareka 12:30, a’ li: “Lata [Jehova, NW] Mulimu wa hao ka pilu ya hao kaufela.” Mi a li, “Ni lata hahulu liñolo le.” Hamulaho wa ku buhisana ni yena mwa Bibele ka butungi, a amuhela Bibele ye nca ni lihatiso ze ñwi ze tomile fa Bibele.

Bukaufi ni siko sa Carpentaria, muñ’a munzi ya n’a na ni mulaka wa likomu o eza liekele ze 400,000 a tabela lushango lwa Mubuso. Ha n’a bonisizwe Buka Ya Ka ya Makande a Bibele ni buka ya Zibo Ye Isa kwa Bupilo bo Bu Sa Feli, * a buza ka za haiba ne ku na ni lihatiso ze ñwi mwa puo ya Kriol. Nto yeo ne i komokisa luli kakuli bayahi ba bañata niha ba ziba ku bulela puo ya Kriol, ki ba ba nyinyani ba ba kona ku i bala. Ne ku fumanehile kuli babeleki kaufela ba 50 ba ne ba beleka fa mulaka wo ne ba kona ku bala puo ya Kriol. Muñ’a munzi n’a tabile hahulu bakeñisa ku fiwa lihatiso ze tomile fa Bibele mwa puo ya Kriol, mi a pakisa ku fa Lipaki nombolo ya luwaile lwa hae kuli ite ba kone ku ambola ni yena.

Mwa mazazi a 9 a ne ba tukufalezwi ku kutaza, ne ba siyezi batu Libibele ze 120, libuka ze 770, limagazini ze 705, ni libroshuwa ze 1,965. Hape ne ba ezize misipili ya makutisezo ye 720 mi ne ba kalisize lituto za Bibele ze 215.

Kaniti tala ya kwa moya ya batu ba ba swanela ba ne ba yambile mwa kalulotuna yeo ne i felisizwe.—Mateu 5:6.

[Litaluso za kwatasi]

[Mapa ye fa likepe 30]

(Kuli mu bone mo i hatiselizwe luli, mu bone hatiso)

AUSTRALIA

NORTHERN TERRITORY

Darwin

Siko sa Carpentaria

Sydney

TASMANIA