Mu Ambuke Mihupulo ye Maswe!

HA N’A kenezwi ki likayamana, munna-muhulu Jobo n’a potezwi ki balikani ba hae ba balalu bo Elifazi, Bilidadi, ni Zofari. Ne ba tile ku t’o mu utwela butuku ni ku mu wisa pilu. (Jobo 2:11) Ya n’a na ni m’ata hahulu ili y’o mwendi hape ne li yo muhulu ku bona ne li Elifazi. Ki yena ya n’a kalile ku bulela mi hape n’a bulezi ze ñata. Elifazi n’a bonisize muhupulo mañi mwa lingambolo za hae ze talu?

Ha n’a hupuzi nto ye sienyi ye ne kile ya ezahala ku yena, Elifazi n’a ize: “Silumba sa fita fapil’a ka; mi bwambo bwa fa mubili wa ka bwa yema. Silumba ne si yemi si kuzize, kono ne ni sa koni ku lemuha mo ne si bupehezi, ne ni si bona fela fapil’a ka. Kwa kuzwa, mi na utwa linzwi.” (Jobo 4:15, 16) Elifazi n’a zamaiswa ki moya mañi? Manzwi a hae a ku nyaza-nyaza fela a n’a bulezi hasamulaho a bonisa kuli n’a sa zamaiswi ki lingeloi la Mulimu le li lukile. (Jobo 4:17, 18) N’a zamaiswa ki sibupiwa sa moya se si maswe. Mi se si bonisa cwalo kikuli Jehova n’a nyazize Elifazi ni balikani ba hae ba babeli ka ku bulela buhata. (Jobo 42:7) Kacwalo Elifazi n’a zamaiswa ki badimona. Manzwi a hae n’a bonisa mihupulo ya hae ye maswe.

Ki mihupulo mañi ye iponahaza mwa manzwi a Elifazi? Ki kabakalañi ha lu swanela ku ambuka mihupulo ye maswe? Mi lu kona ku nga mihato mañi kuli lu ambuke mihupulo ye cwalo?

“H’a Sepi Batanga ba Hae”

Mwa lingambolo za hae kaufela ze talu, Elifazi n’a fitisize muhupulo wa kuli Mulimu u t’ata hahulu mi ha ku na ze ba eza batanga ba hae ze kona ku mu tabisa. Elifazi n’a taluselize Jobo kuli: “A mu bone! mbali Mulimu h’a sepi batanga ba hae, mi u beya mulatu kwa mangeloi a hae.” (Jobo 4:18) Elifazi hamulaho n’a bulezi ka za Mulimu kuli: “Mbali Mulimu h’a sepi ba ba kenile ba hae. Mi lihalimu ha li si ka kena mwa meto a hae.” (Jobo 15:15) Mi n’a buzize kuli: “Ki tuso mañi ku Ya-Mata-Kaufela niha ike u mutu ya na ni niti?” (Jobo 22:3) Bilidadi ni yena n’a lumezi muhupulo wo, kakuli n’a ize: “Mbali kweli i bonahala i si na liseli, mi linaleli ha li si ka kena mwa meto a [Mulimu.]”—Jobo 25:5.

Lu lukela ku tokomela kuli lu si ke lwa kenelwa ki muhupulo o cwalo. Muhupulo o cwalo u kona ku lu nahanisa kuli Mulimu u lu tokwa ku eza ze lu sa koni. Muhupulo o cwalo u sinya silikani sa luna ni Jehova. Mi haiba lu kenelwa ki muhupulo o cwalo, lu ka ikutwa cwañi muta lu fiwa kalimelo ye tokwahala? Ku fita ku amuhela kalimelo ka buikokobezo, pilu ya luna i kana ya “nyemela [Muñ’a] Bupilo.” (Liproverbia 19:3) Ku eza cwalo ikaba kozi ye tuna kwa moya!

 “Kana Mutu U Ka Ba ni Tuso ku Mulimu?”

Muhupulo o muñwi o swana ni wa kuli Mulimu u t’ata ki wa kuli Mulimu u nga kuli batu ha ba na tuso. Mwa ngambolo ya Elifazi ya bulalu, n’a buzize puzo ye li: “Kana mutu u ka ba ni tuso ku Mulimu? Batili, mutu ya butali u itusa isali yena fela.” (Jobo 22:2) Elifazi f’o n’a talusa kuli mutu ha na tuso ku Mulimu. Ka nzila ye swana, Bilidadi n’a ize: “Mutu a ka luka cwañi fapil’a Mulimu? Mi ya pepilwe ki musali a ka ba ya kenile cwañi?” (Jobo 25:4) Ka ku ya ka muhupulo wo, mutu-tu fela ya fokola ya swana sina Jobo h’a swaneli ku ikutwa kuli ki ya lukile fapil’a Mulimu.

Batu ba bañwi kacenu ba ikupulelanga fela ze maswe. Libaka le li tisa cwalo mwendi ki mo ba huliselizwe, matata e ba ipumani ku ona mwa bupilo, kamba ketululo ya mubala kamba ya mushobo. Kono hape Satani ni badimona ba hae ba lata hahulu ku kataza batu. B’a ziba kuli muta ba nahanisa mutu kuli z’a eza ha li na tuso ku Mulimu ya M’ata Ote, u ka fita fa ku zwafa ka bunolo. Mi nako ha inze i ya, mutu ya cwalo mane wa kona ku kauhana ni Mulimu ya pila.—Maheberu 2:1; 3:12.

Busupali ni makulanu li lu palelwisanga ku eza lika ze ñwi. Ze lu eza mwa musebezi wa Mubuso li kana za bonahala bunyinyani ku ze ne lu kile lwa eza ha ne lu sa li banana ba ne ba sa mata mali. Ku butokwa ku lemuha kuli Satani ni badimona ba hae ba bata kuli lu ikutwe kuli ze lu eza ha li na tuso ku Mulimu! Lu lukela ku ambuka muhupulo o cwalo.

Mwa ku Ambukela Mihupulo ye Maswe

Ku si na taba ni manyando a n’a tahiselizwe ki Satani Diabulosi, Jobo n’a ize: “Ni ka bulela kuli ni tokwa mulatu, mane ku isa kwa lifu la ka.” (Jobo 27:5) Bakeñisa kuli n’a lata Mulimu, Jobo n’a ikatulezi ku sepahala ku Mulimu ku si na taba ni ze ne ezahezi, mi ha ku na ze n’e ka cinca muhupulo wa hae wo. Kacwalo kuli lu ambuke mihupulo ye maswe, lu lukela ku nga muhato wo: Lu lukela ku ba ni kutwisiso ye nde ya lilato la Mulimu ni ku itebuha lona ku zwelela kwa pilu. Hape lu swanela ku tungisa lilato la luna ku yena. Lu kona ku eza cwalo ka ku ituta Linzwi la Mulimu kamita ni ku yeya ka tapelo ze lu itutile.

Ka mutala, Joani 3:16 i li: “Mulimu u latile lifasi hahulu, mane u li file Mwan’a hae wa libanda.” Jehova u lata hahulu lifasi mi mw’a sebelisanezi ni batu ka lilimo-limo ku bonisize lilato leo. Ku yeya mitala ya batu ba kwaikale ku swanela ku tungisa buitebuho bwa luna ku Jehova ni ku tungisa lilato la luna ku yena, ili nto ye ka lu tusa ku ambuka mihupulo ye maswe.

Mu nahane ka m’o Jehova n’a omba-ombezi Abrahama nakonyana pili Sodoma ni Gomora li si ka sinyiwa kale. Abrahama n’a buzize Jehova h’a 8 ka za katulo ya Hae. Kono Jehova n’a si ka bonisa bunyemi kamba buhali ni bo bukana. Likalabo za hae ne li wisize Abrahama pilu ni ku mu omba-omba. (Genese 18:22-33) Hasamulaho Mulimu ha n’a yangwezi Lota ni lubasi lwa hae mwa Sodoma, Lota n’a ikupezi ku sabela mwa munzi o n’o li bukaufi ku fita ku sabela kwa malundu. Jehova n’a alabile kuli: “Ni ku utwile ni mwa taba ye; mi ha ni na ku sinya munzi w’o bulela.” (Genese 19:18-22) Kana zona litaba ze li bonisa kuli Jehova ki mubusi ya t’ata, ya si na lilato, ili ya hatelela batu? Kutokwa. Li mu bonisa kuli ki Muambakani ya lilato, ya na ni sishemo, makeke, ni kutwisiso.

Mitala ya bo Aruni, Davida, ni Manase ba Isilaele wa kwaikale i bonisa kuli taba ya kuli Mulimu u batisisanga milatu ni ya kuli batu ha ba na tuso ku yena haki litaba za niti. Aruni n’a ezize milatu ye milalu ye mituna. N’a pangile namani ya gauda, yena ni kaizel’a hae Miriame ne ba sheunuzi Mushe, mi n’a palezwi ku bubeka Mulimu kwa Meriba. Kono niteñi, Jehova n’a boni bunde ku yena mi n’a mu tuhelezi ku ba muprisita yo mutuna ku fitela a timela.—Exoda 32:3, 4; Numere 12:1, 2; 20:9-13.

 Mulena Davida n’a ezize libi ze tuna mwa puso ya hae. N’a ezize bubuki, n’a bulaisize mutu ya si na mulatu, mi n’a ezize sipalo ku si na swanelo. Nihakulicwalo, Jehova n’a lemuhile ku baka kwa Davida mi a kumalela bulikani bwa hae bwa Mubuso ka ku mu tuhelela ku ba mulena ku fitela a timela.—2 Samuele 12:9; 1 Makolonika 21:1-7.

Mulena Manase wa Juda n’a tomile lialetare za Baale, n’a fitisize bana ba hae mwa mulilo, n’a tiisize bulapeli bwa mioya, mi n’a yahile lialetare za bulapeli bwa buhata mwa malapa a tempele. Kono ha n’a bakile ha buniti, Jehova n’a mu swalezi, a mu lukulula mwa butanga, mi a mu kutiseza fa lubona lwa hae. (2 Makolonika 33:1-13) Haiba Mulimu u nga kuli ha ku na mutu ya na ni tuso ku yena, kana wa kona ku eza cwalo? Kutokwa ni hanyinyani!

Mutamelezi U Fumanwa ni Mulatu

Ha lu swaneli ku komoka kuli Satani ki yena muñ’a mikwa ye maswe ya sweli ku tameleza Jehova. Satani u buhali mi u t’ata. Se si bonisa cwalo ki mukwa wa kwaikale wa mwa bulapeli bwa buhata wa ku cisanga banana mwa mulilo sina matabelo. Maisilaele ba bakwenuheli ne ba cisanga bana ba bona ba bashimani ni basizana mwa mulilo—mi yeo ne li nto ye ne si ka nahanwa nihaiba mwa pilu ya Jehova.—Jeremia 7:31.

Ya batisisa milatu kwa batu ki Satani haki Jehova. Sinulo 12:10 i bulela kuli Satani ki “mutami wa banyani ba luna, ya n’a ba tamanga litaba . . . musihali ni busihu.” Kono ka za Jehova, walisamu n’a opezi kuli: “[Muñ’a] Bupilo, ha u ka londoloza bumaswe, Mulena, ku ka pila mañi? Kono swalelo i fumanwa ku Wena.”—Samu 130:3, 4.

Muta Mihupulo ye Maswe I Ka Fela

Libupiwa za moya za mangeloi li lukela ku ba ze ne tabile hahulu muta Satani Diabulosi ni badimona ba hae ne ba lunduzwi kwa lihalimu! (Sinulo 12:7-9) Hamulaho wa f’o, libupiwa za mioya ze maswe zeo ne li sa koni ku yemisa misebezi ya mangeloi a Jehova a kwa lihalimu.—Daniele 10:13.

Ona cwale-cwale fa ba ba yahile fa lifasi-mubu ba ka nyakalala. Ona cwale-cwale fa lingeloi li ka tuluka kwa lihalimu li sweli sinotolo sa mukoti ni liwenge le lituna mwa lizoho la lona mi li ka tama Satani ni badimona ba hae ni ku ba kunupela mwa mukoti mo ba si ke ba kona ku eza se siñwi. (Sinulo 20:1-3) Nto yeo ha i ka ezahala, kaniti luli batu ba ka ikola ku pila ka kozo!

Kono haili ka nako ya cwale, lu swanela ku tokomela kuli ha lu bi ni mihupulo ye maswe. Lu sa kala fela ku kenelwa ki mihupulo ye maswe, lu i ambuke ka ku toma minahano ya luna fa lilato la Jehova. Fohe ‘kozo ya Mulimu ye fita kutwisiso kaufela, i ka buluka lipilu za luna ni mihupulo ya luna.’—Mafilipi 4:6, 7.

[Siswaniso se si fa likepe 26]

Jobo n’a hanile mihupulo ye maswe

[Siswaniso se si fa likepe 28]

Lota n’a itutile kuli Jehova ki Muambakani ya na ni kutwisiso