“Ba Ba Shetumukela mwa Liwate ka Lisepe”

KU TALIMANA ni likamba la Gloucester, ili mwa Massachusetts kwa U.S.A., ku tomilwe siswaniso sa kopa se si bonisa mufuluhi ya fundumani ku caindisa sisepe sa hae mwa liñungwa. Siswaniso seo si hupulisa batu ka za bayambi ba ba likiti-kiti ba kwa Gloucester ba ne ba shwezi mwa liwate. Kwatas’a siswaniso seo ni fa litapa le li cakuzwi kwatuko a sona, ku ñozwi manzwi a’ kwa Samu 107:23, 24, a’ li: “Ba ba shetumukela mwa liwate ka lisepe, ba ba eza litekiso mwa mezi a matuna; bao ki bona ba ba bona misebezi ya Mulena, ni ze komokisa z’a ezize mwa buliba.”—King James Version.

Ku yambela mwa buliba bwa liwate la Atlantic ki musebezi o lubeta hahulu. Bayambi ba ba eza 5,368 ba kwa Gloucester, ko se ku na ni batu ba ba fitelela 30,000, se ba shwezi mwa liwate ha ne ba yamba. Fa litapa la kupuzo ya bona ku ñozwi kuli: “Ba bañwi ne ba bitilwe ki mañungwa a’ m’ata ni mandinda a matuna a mwa liwate a n’a tisizwe ki liñungwatuna le ne li zwelela kwa mutulo-upa wa Gloucester. Ba bañwi ne ba shwezi mwa mukolo o munyinyani o ne u biukile kwa sisepe se ne si ba kutisanga kwa mayambelo. Lisepe ze ñwi ne li kopani ni mañungwa mi ka bumai za tiba. Ba bañwi ne ba limbilwe ki lisepe.”

Siswaniso seo si bonisa musebezituna ni mabeta e se ba ipumani ku ona bayambi ka lilimo-limo. Mu nahane m’o batu ne ba cipitezi miyoko bakeñisa ku shwelwa ki banna ba bona, bondat’a bona, bahabo bona, ni bana ba bona. Niteñi, Jehova Mulimu h’a libali limbelwa, lindiala, kamba batu ba ne ba shwezi mwa liwate. Muapositola Joani n’a polofitile ka za nako ya kwapili ha n’a ize: “Liwate la kutisa bafu ba ba ku lona; ni lifu, ni libita za kutisa bafu ba ba ku zona.” (Sinulo 20:13) Muta ba ka zuswa, ba ne ba shetumukezi “mwa liwate ka lisepe” ba ka bona luli “misebezi ya Mulena” ye komokisa.