Kana Diabulosi U Teñi Luli?

MU NGA cwañi Diabulosi? Kana mu mu nga kuli ki mutu ya li teñi luli ya lika batu kuli ba eze lika ze maswe, kamba kuli u yemela fela bumaswe? Kana Diabulosi ki sibupiwa se si sabisa, kamba kana u swanela ku keshebiswa sina sibupiwa se si kulubelwa fela se si li siyo kamba sa mwa matangu fela? Kana linzwi la “diabulosi” li talusa m’ata a’ sinya a’ sa swalehi hande? Kana linzwi leo li itusiswanga ha ku taluswa bumaswe bwa batu, sina mo ba bulelela baluti ba bulapeli kacenu?

Ha ku komokisi kuli batu ba na ni mihupulo ye shutana-shutana ya kuli Diabulosi ki mañi. Mu bapise mo ne ku ka bela t’ata ku ziba hande mutu ya kona hahulu ku ipilaula! Ku t’ata hahulu sihulu haiba mutu y’o h’a lati ku zibwa. Bibele i talusa kuli Diabulosi ni yena u cwalo. Ka ku ama ku yena sina Satani, i bulela kuli: “Satani ni yena u ifetula sibupeho sa lingeloi la liseli.” (2 Makorinte 11:14) Nihaike kuli ki ya maswe, Diabulosi u ipumisa ku ba yo munde ilikuli a kwasheke batu ba bañwi. Mi ibile fela a kolwisa batu ku lumela kuli h’a yo, f’o mane wa peta hande mulelo wa hae.

Kacwalohe, Diabulosi ki mañi luli? N’a simuluhile kai, mi ne li lili? U yembulula cwañi batu kacenu? Kana ku na ni ze lu swanela ku eza kuli lu si ke lwa yembululwa ki yena? Bibele i na ni litaba za niti ka za simuluho ya Diabulosi mi i fa likalabo za niti kwa lipuzo zeo.

[Siswaniso se si fa likepe 3]

Ku t’ata hahulu ku ziba mutu ya sa lati ku zibwa!