Armagedoni—​Kana I Ka Ba Maungulo A’ Sabisa?

MU NAHANANGAÑI ha mu utwa linzwi la Armagedoni? Kana mu hupulanga za sinyeho ye tuna kamba ku ca mulilo kwa pupo kamukana? Linzwi la “Armagedoni” ki le liñwi la manzwi a Bibele a sikai a’ itusiswa hahulu mwa lingambolo za batu mwa libaka ze ñwi za lifasi. Linzwi leo li itusisizwe hahulu kwa ku talusa lika ze sabisa ze ba libelezi batu. Mwa mafilimu, “Armagedoni” i bonisizwe ku ba nto ye ka sabisa luli. Mihupulo ye sa utwisisehi ni ya buhata i paleliswa batu ku utwisisa se li talusa linzwi le. Nihaike kuli linzwi leo li taluswa ka mihupulo ye fitana-fitana, buñata bwa yona ha bu lumelelani ni ze i luta Bibele—sona simbule sa linzwi la Armagedoni.

Bakeñisa kuli Bibele i bonisa kuli Armagedoni i zamaelela ni ku “fela kwa lifasi,” kana ha mu lumeli kuli ki kwa butokwa ku ziba hande-ndende se li talusa linzwi le? (Mateu 24:3) Mi kana ne mu si ke mwa eza hande ku nyakisisa se li bulela Linzwi la Mulimu, sona simbule se situna sa litaba za niti, kuli mu zibe buniti bwa seo Armagedoni ili sona ni mo i ka mi amela hamoho ni lubasi lwa mina?

Ha mu ka eza cwalo mu ka lemuha kuli Armagedoni ha i na ku ba maungulo a’ sabisa kono i ka ba makalelo a mande kwa batu ba ba nyolelwa ku pila ni ku ikola mwa lifasi le linca la ku luka. Mu ka fita fa ku utwisisa hande-ndende buniti bwa taba ya butokwa ya mwa Mañolo ye ha mu ka bala taba ye tatama ye nyakisisa seo Armagedoni ili sona luli.

[Mbokisi/Siswaniso se si fa likepe 3]

U HUPULA KULI ARMAGEDONI KI NTO MAÑI?

• Pulao ye tuna ya limbomba

• Sinyeho ya lifasi-mubu

• Ku natana kwa lifasi ni naleli ye ñwi

• Ku timezwa kwa ba ba maswe ki Mulimu