“Ki Swanelo Kuli Lu Utwe Mulimu ku Fita Batu”

‘Jehova Ki Mulamuleli Wa Ka’

BATU ba Jehova ne ba na ni ku eza keto. Kana ne ba ka utwa litaelo za mubusi ya maswe wa Egepita wa kwaikale? Kamba kana ne ba ka utwa Jehova Mulimu, ili ku siya naha ya butanga ni ku yo yaha mwa Naha ya Sepiso?

Bakeñisa kuli Faro wa Egepita n’a hanile ku lukulula batu ba Jehova ka ndutata, Mulimu n’a natile naha ka Likoto ze Lishumi. Seo luli ne si bonisize kuli Mulimu u m’ata! Balimu ba Maegepita ne ba palezwi ku tibela likoto zeo.

Faro ha n’a taluselizwe kuli a lukulule batu ba Mulimu, n’a alabile ka mahañi kuli: “[Muñ’a] Bupilo ki Yena mañi kuli ni utwe linzwi la hae mi ni lukulule Isilaele? [Muñ’a] Bupilo ha ni mu zibi, mi hape Isilaele ha ni na ku mu lukulula.” (Exoda 5:2) Bakeñisa mahañi ao, Egepita ne i natilwe ka likoto ze latelela: (1) ku fetula mezi ku ba mali, (2) limbotwe, (3) linda, (4) minañi, (5) ku shwa kwa mitapi, (6) malonda a eza mambongola kwa batu ni kwa lifolofolo, (7) ñuli ya macwe, (8) nziye, (9) lififi, ni (10) lifu la bana ba baeli ba Egepita, ku kopanyeleza ni mwan’a mushimani wa mweli wa Faro. Kwa nalule-lule, Faro s’a lukulula Maheberu. Mane n’a ba hapelelize kuli ba ye!—Exoda 12:31, 32.

Batu ba ba bat’o ba 3,000,000—ili banna, basali, ni banana ba Maisilaele mane ni silundwamanje sa batu ba mishobo i sili—ne ba tunuhile naha ka bubebe. (Exoda 12:37, 38) Hamulaho wa nakonyana fela, Faro a ba manama ka mpi ya hae ye m’ata. Maisilaele ne ba bonahala kuli ne ba taekilwe ki Faro ni limpi za hae mwahal’a Liwate Le Li Fubelu, ni lihalaupa le li sabisa. Kono Mushe n’a bulelezi sicaba kuli: “Mu si ke mwa saba; mu yeme mu tiile; mu bone mw’a ka mi piliseza [Muñ’a] Bupilo.”—Exoda 14:8-14.

Jehova n’a omisize Liwate Le Li Fubelu ka makazo ilikuli Maisilaele ba fite. Kono Maegepita ha ne ba likile ku ndongwama Maisilaele, Mulimu n’a tibuluzi mezi. ‘Makoloi a Faro ni mpi ya hae, [Jehova] a li kasheza mwa liwate.’ (Exoda 14:26-28; 15:4) Ku hana ku kuteka Jehova ne ku tisize kuli Faro wa muikuhumusi a kutule lifu.

Kwa Liwate Le Li Fubelu, Jehova n’a iponahalisize kuli “ki ndume wa ndwa.” (Exoda 15:3) Mi Mañolo a tahile ka moya a bonisa kuli “Isilaele a bona musebezi o mutuna w’a sebelize [Muñ’a] Bupilo fahalimu a Maegepita, mi sicaba sa saba [Muñ’a] Bupilo, sa lumela [Muñ’a] Bupilo.” (Exoda 14:31; Samu 136:10-15) Ne ba fitisize buitebuho bwa bona bo ne bu zwelela kwa pilu ku Mulimu, banna inge ba opela hamoho ni Mushe pina ya tulo mi kaizel’a hae Miriame, yena n’a etelezi basali mwa ku bina. *

Mulimu U Zwelapili ku Ba Mupilisi

Batanga ba Jehova kacenu b’a kona ku ituta lituto ze tiisa tumelo kwa kezehalo ye ipitezi yani ya mwa piliseza m’ata a Mulimu. Tuto ya pili ye lu ituta ki ya kuli Jehova u na ni m’ata a matuna mi wa kona ku tusa batu ba hae. Mwa pina ya bona ya tulo, Mushe ni Maisilaele ne ba opezi ka tulo kuli: “Wena [Muñ’a] Bupilo, lizoho la hao la bulyo li ile libubo ka mata a lona, Lizoho la hao la bulyo, [Muñ’a] Bupilo, li tubahanyize sila.”—Exoda 15:6.

Tuto ya bubeli ye lu ituta ki ya kuli Ya M’ata Ote u tabela hahulu ku sileleza batu ba hae. Maisilaele ne ba opezi kuli: “[Muñ’a] Bupilo ki m’ata a ka, ki muñ’a pina ya ka; ki Yena Mulamuleli wa ka; ki Yena Mulimu wa ka, ni ka mu lumba.” Mane hape tuto ye ñwi ye lu ituta ki ya kuli ha ku na mutu ya kona ku lwanisa z’a lelile Jehova Mulimu.  Mwa pina ya bona ya tulo, batu ba Mulimu be ne ba pilisizwe ne ba opezi kuli: “Ki mañi ya swana ni Wena mwahali a milimu, Wena [Muñ’a] Bupilo? Ki mañi ya zibahala ka ku ba Ya-Kenile sina wena, Ya sabisa ka libubo, ya eza ze komokisa?”—Exoda 15:2, 11.

Sina Faro wa Egepita wa kwakale, babusi ba lifasi kacenu ba nyandisa batu ba Jehova. Baeteleli ba ba ikuhumusa ba kana ba ‘bulela manzwi a ku lwanisa Muambakani-ya-Pahami, ni ku zwelapili ku nyandisa ba ba kenile ba Y’a M’ata ka ku Fitisisa.’ (Daniele 7:25; 11:36) Kono Jehova u sepisa batu ba hae kuli: “Ha ku na silwaniso se si ezezwa wena se si ka konda; mi wa lilimi kaufela le li ka ku zekisa, u ka mu beya mulatu. Se, ki sanda sa batanga ba [Muñ’a] Bupilo, ni litukelo za bona ze zwa ku Na, ku bulela [Muñ’a] Bupilo.”—Isaya 54:17.

Balwanisi ba tato ya Mulimu ba ka palelwa sina mwa n’a palelezwi Faro ni mpi ya hae. Jehova mwa n’a piliselize batu ba hae, inge cwalo ha ne ba zwa mwa Egepita, ku bonisa kuli ki kwa butokwa ku latelela sikuka se ne si bulezwi ki baapositola ba Jesu, sa kuli: “Ki swanelo kuli lu utwe Mulimu ku fita batu.”—Likezo 5:29.

[Litaluso za kwatasi]

[Mbokisi/Siswaniso se si fa likepe 9]

KANA MWA ZIBA?

• Jehova n’a fukisize moya o m’ata busihu kaufela kuli Maisilaele ba kone ku sila Liwate Le Li Fubelu fa mubu o omile.—Exoda 14:21, 22.

• Ne ku tokwahala nzila ye eza likilomita ze 1.5 kamba ku fitelela mwa butuna kuli Maisilaele ba ba eza bolule-lule ba sile Liwate le Li Fubelu mwa nako ye kuswani.

[Maswaniso a fa likepe 9]

Balimu ba Maegepita ne ba palezwi ku tibela Likoto ze Lishumi ze ne zwa ku Jehova

[Manzwi a bañi ba siswaniso]

Maswaniso a malalu kaufela: A swanisizwe ka tumelezo ya ba British Museum