Bupilo Sakata mwa Lifasi Le Linca la Mulimu

DAVID, * ndate-lubasi wa Mukreste n’a tutezi kwa United States, inz’a na ni buikolwiso bwa kuli n’a nga muhato o lukile. Nihaike n’a sa tabeli ku siya musal’a hae ni bana, n’a kolwa kuli n’a ka ba pilisa hande kaufela bona ha na ka ba fela ni mali a mañata. Kacwalo ha n’a bizizwe ki bahabo yena ba kwa New York, a tutela teñi mi hañihañi a yo fumana musebezi.

Nihakulicwalo, likweli ha ne li nze li fela, sepo ya David ya kala ku fela. N’a si na hande ni nako ya ku eza lika za kwa moya. Muta o muñwi, n’a sa felezwi ki tumelo ya hae ku Mulimu. N’a si ka lemuha se siñwi ku fitela a tulwa ki muliko wa sibi. Ku tundamena sifumu kwa hae ne ku mu kelusize hanyinyani-hanyinyani kwa lika kaufela ze ne li za butokwa hahulu ku yena. N’a na ni ku eza licinceho.

 Sina David, silimo ni silimo batu ba bañata ba tutanga ku zwa mwa linaha za bona ze botanile, ka ku sepa kuli ba ka yo fuma. Kono buñata bwa bona ha ba liyehangi ku shwa kwa moya. Ba bañwi ba ipuzize kuli, ‘Kana Mukreste wa kona ku ndongwama sifumu ni ku kona hape ku fumela ku Mulimu?’ Bañoli ba ba tumile ni ba bahulu ba bulapeli ba bulela kuli kwa konahala. Kono David ni ba bañwi ba itutile kuli ku peta bubeli bwa lika zeo mu sa latehelwi ki si li siñwi ku kona ku mi bela t’ata.—Luka 18:24.

Mali Ha Si Ka Fosahala

Mali a pangilwe ki batu. Mi sina buñata bwa lika ze pangilwe ki batu, mali ha si ka fosahala. Mali a konisa fela mutu ku leka lika za bata. Kacwalo, muta a itusiswa hande, a kona ku tusa. Ka mutala, Bibele i paka kuli ‘mwa mukunda wa mali mutu wa silelezwa,’ sihulu kwa matata a swana sina a bubotana. (Muekelesia 7:12) Ku bonahala kuli ba bañwi b’a nga kuli mali ki ona a ‘fumanisa linto kaufela.’—Muekelesia 10:19.

Mañolo a nyaza ku ba ni buzwa mi a susueza ku beleka ka t’ata. Lu na ni ku babalela lubasi lwa luna, mi haiba ku siyala se siñwi, lwa kona ku “tusa ya tokwile.” (Maefese 4:28; 1 Timotea 5:8) Mi hape Bibele ha i lu susuezi ku itima kwa lika, kono i lu susueza ku ikola ze lu luwile. Lu bulelezwi kuli lu ‘itusise zona’ ni ku ikola mupuzo wa mifufuzo ya luna. (Muekelesia 5:18-20) Mane mwa Bibele ku na ni mitala ye miñata ya banna ni basali ba ba sepahala ili ba ne ba fumile.

Basepahali Ba Ne Ba Fumile

Abrahama, mutang’a Mulimu ya sepahala, n’a bile ni mitapi ye mituna ni makomu, silivera ni gauda ye ñata, ni batanga ba ba eza mianda. (Genese 12:5; 13:2, 6, 7) Jobo munna ya lukile ni yena n’a na ni bufumu bo buñata—bwa limunanu, batanga, gauda, ni silivera. (Jobo 1:3; 42:11, 12) Nihaiba kacenu le, banna bao ne ba ka baliwa ku ba bafumi, kono niteñi hape ne ba fumile ni ku Mulimu.

Muapositola Paulusi u biza Abrahama kuli “ndat’ahe ba ba lumela kaufela.” Abrahama n’a sa katwi za n’a luwile kamba ku itinga hahulu ku zona. (Maroma 4:11; Genese 13:9; 18:1-8) Hape Mulimu ka sibili n’a bulezi kuli Jobo ki munna “ya lukile hahulu, ya sepahala.” (Jobo 1:8) Jobo kamita n’a tabela ku tusa ba ba nyandile ni babotana. (Jobo 29:12-16) Bo Abrahama ni Jobo ne ba sepile Mulimu isi bufumu bwa bona.—Genese 14:22-24; Jobo 1:21, 22; Maroma 4:9-12.

Mutala o muñwi ki wa mulena Salumoni. Ka ku ba yena ya n’a ka yoliswa fa lubona lwa Mulimu mwa Jerusalema, Salumoni n’a filwe butali ki Mulimu hamohocwalo ni bufumu bo buñata ni libubo. (1 Malena 3:4-14) N’a sepahalile ibata iba mwa bupilo bwa hae  kaufela. Kono, mwa lilimo ze ne latelezi, “pilu ya hae n’e si ya [Muñ’a] Bupilo Mulimu.” (1 Malena 11:1-8) Mane muinelo o swabisa wa n’a ipumani ku ona u bonisa malaba a mañwi a atile a tiswa ki bufumu. Ha mu nyakisise a mañwi ku ona.

Malaba a Bufumu

Lubeta lo lutuna ka ku fitisisa ki lwa ku lata mali ni z’a kona ku leka. Bufumu bu tahisezanga ba bañwi takazo ye sa feli. Salumoni ha kala ku busa, n’a lemuhile mukwa wo ku ba bañwi. N’a ñozi kuli: “Ya lata silivera h’a na ku kuliswa ki silivera, ku cwalo ni ku y’a lata bufumu, h’a koliswi ki s’a fumana. Zeo kaufela ki za mbango fela.” (Muekelesia 5:10) Hasamulaho Jesu ni Paulusi ne ba lemusize Bakreste ka za lilato le li cwalo la ku lata bufumu.—Mareka 4:18, 19; 2 Timotea 3:2.

Muta lu lata hahulu mali ku fita ku a nga fela kuli a tusa kwa ku leka lika, lu kona ku wela ka bunolo mwa miliko ya mifuta-futa, ye cwale ka ku puma, ku uzwa, ni ku putelela ba bañwi. Judasi Isikariota, yo muñwi wa baapositola ba Kreste, n’a betekile mulen’a hae ka mali a silivera a’ 30 fela. (Mareka 14:11; Joani 12:6) Ba bañwi se ba tulile tikanyo kuli mane se ba lapela mali ku fita Mulimu. (1 Timotea 6:10) Kacwalo Bakreste kamita ba swanela ku lika ku sa ipuma ka milelo ye ba batela mali a mañata luli.—Maheberu 13:5.

Ku ndongwama bufumu hape ku tahisa mabeta a sa lemusehi kapili. Sa pili, bufumu bo buñata hañata bu tahisanga ku isepa. Jesu n’a amile kwa taba yeo ha n’a bulezi ka za ku pumwa ki “takazo ya bufumu.” (Mateu 13:22) Muñoli wa Bibele Jakobo ni yena n’a lemusize Bakreste ku sa libala Mulimu niha ba eza milelo ya lipisinisi. (Jakobo 4:13-16) Bakeñisa kuli mali a lu tahisezanga ku isepa, ba ba na ni ona ba mwa muliko kamita wa ku sepa mali a bona mwa sibaka sa ku sepa Mulimu.—Liproverbia 30:7-9; Likezo 8:18-24.

Sa bubeli, sina mo ne ku bezi ku David ya bulezwi kwa makalelo, ku ndongwama sifumu hañata ku feza nako ni m’ata a mutu kuli mane ku mu fokolisa hanyinyani-hanyinyani kwa moya. (Luka 12:13-21) Bafumi hape ba na ni muliko o sa feli wa ku itusisa ze ba luwile sihulu kwa minyaka kamba kwa lika za bona beñi fela.

Esi mwendi libaka Salumoni ha n’a fokozi kwa moya ki kabakala kuli n’a tuhelezi mupilelo wa hae wa bumbombo ku mu lyanganisa? (Luka 21:34) N’a ziba hande mulao wa Mulimu o no hanisa ku nyalelana ni macaba a sili. Niteñi, n’a ikubukanyelize basali ba ba bat’o eza sikiti. (Deuteronoma 7:3) Ka ku bata ku tabisa basali ba hae ba ne ba simuluha ku sili, a zwakanya bulapeli kuli a ba tabise. Sina mo ku boniselizwe kwa makalelo, pilu ya Salumoni ne i keluhile ku Jehova hanyinyani-hanyinyani.

Kaniti, mitala ye i bonisa buniti bwa kelezo ya Jesu, ye li: “Ha ku konahali kuli mu sebeleze ni Mulimu, ni Mamona, (kikuli Bufumu).” (Mateu 6:24) Kacwalo he, Mukreste u kona cwañi ku talimana ni butata bwa kutokwa mali bo ba talimana ni bona batu ba bañata kacenu? Mi mane sa butokwa kikuli kana ku na ni sepo ya bupilo bo bunde kwapili?

Bupilo Sakata Kwapili

Ka ku fapahana ni baikale bo Abrahama ni Jobo ni Maisilaele, balateleli ba Jesu ba filwe musebezi wa kuli ba “lute macaba kaufela.” (Mateu 28:19, 20) Ku peta musebezi wo ku tokwa nako ni buikatazo ze tokwahala mwa ku peta misebezi ya lifasi. Kacwalo, ku kondisa ku itingile fa ku eza za n’a lu bulelezi Jesu kuli: “Mu bate pili Mubuso wa Mulimu ni Ku Luka kwa Hae, mi linto zeo kamukana mu ka li ekelezwa kwateñi.”—Mateu 6:33.

David ha s’a boni kuli lubasi lwa hae ne lu tuha lu mu libala ni kuli tumelo ya hae ne se i fokola, a eza licinceho mwa bupilo bwa hae. Sina mwa n’a sepiselize Jesu, David ha n’a kalile sinca ku ezanga tuto ya Bibele, ku lapelanga,  ni ku yanga mwa bukombwa, lika ze ñwi kaufela za zwelapili ku ba hande. Hanyinyani-hanyinyani ba kala ku utwana hape ni musal’a hae ni bana ba hae. A kutelwa ki tabo ni nyakalalo ya hae. U sa beleka ka t’ata. H’a si ka ba mufumi. Nihakulicwalo, u itutile lituto za butokwa ku za n’a ipumani ku zona.

David wa inyaza bakeñisa muhato wa n’a ngile wa ku tutela kwa United States, mi u ikonkile kuli ha sa tuha hape a lyanganiswa ki taba ya ku bata mali. Ki kale a ziba cwale kuli lika za butokwa hahulu mwa bupilo, ze cwale ka lubasi lo lu latana, balikani ba bande, ni silikani ni Mulimu, ha li konwi ku lekiwa ka mali. (Liproverbia 17:17; 24:27; Isaya 55:1, 2) Kaniti, busepahali ki bwa butokwa hahulu ku fita bufumu. (Liproverbia 19:1; 22:1) David hamohocwalo ni lubasi lwa hae ba ikatulezi ku beya lika za butokwa mwa sibaka sa pili.—Mafilipi 1:10.

Batu hañata ba palezwi ku ba ni sifumu ni ku lapela Mulimu ka nako ye swana. Nihakulicwalo, Mulimu u sepisize kuli Mubuso wa hae u ka lu kapweka lika za kwa mubili ni za kwa moya ze lu tokwa kuli lu pile ka tabo. (Samu 72:16; Isaya 65:21-23) Jesu n’a bonisize kuli bupilo sakata bu fumanwa ka ku ba ni tumelo pili. (Mateu 5:3) Kacwalo, ibe kuli lu bafumi kamba lu babotana, ka ku eza pili lika za kwa moya mwa bupilo bwa luna cwale, lu ka itukiseza ku kena mwa lifasi le linca la Mulimu le li fa ngo ni mulomo. (1 Timotea 6:17-19) Lifasi leo luli li kaba la batu ba ba fumile kwa mubili ni kwa moya.

[Litaluso za kwatasi]

[Maswaniso a fa likepe 5]

Jobo n’a sepile Mulimu, isi bufumu bwa hae

[Maswaniso a fa likepe 7]

Lika za butokwa hahulu mwa bupilo ha li konwi ku lekiwa ka mali