Lifu Li Zielize Mañi ni Mañi!

ARNOLD TOYNBEE, caziba wa litaba za kwaikale wa kwa Britain, n’a ñozi kuli: “Ku zwa fela fa pepelwa, mutu u kona ku shwa nako ifi kamba ifi.” Hape n’a ize: “Ku si na kuli cwañi, mañi ni mañi muta o muñwi u kabe a shwile.” Ki masitapilu kwa butuna o lu banga ni ona muta lifu li bitula mulatiwa wa luna kamba mulikani ya lateha!

Batu se ba zielizwe ki lifu ka lilimo ze likiti-kiti. Kaufela luna lu ikutwanga ku bata mwa masapo muta mutu yo lu lata a shwa. Lifu ha li na mwan’a moola. Ha li zibi ku keta. Muñoli wa litaba wa mwa lilimo za ma-1800 n’a ñozi kuli: “Maswabi a lu kutisezanga kwa bwanana kaufela luna ku si na taba ni zibo ye lu na ni yona. Nihaiba ba ba butali ka ku fitisisa ha kuna se ba kona ku eza.” Lu felelwanga ki m’ata, ni ku palelwa ku cinca muinelo sina banana. Nihaiba sifumu kamba m’ata ha li koni ku kutisa bupilo. Ba ba butali ni ba ba na ni zibo ba omile mati. Ba ba tiile ba tuwa sililo sina ba ba si ka tiya.

Davida ya n’a li Mulena wa Isilaele n’a utwile butuku bo bu cwalo fa shwela mwan’a hae Abisalomi. Mulena Davida ha n’a utwile kuli mwan’a hae u shwile, a tuwa sililo mi a bokolola inze a li: “Mwan’a ka Abisalomi! mwan’a ka, mwan’a ka Abisalomi! Kabe ku shwile na, isi wena! Abisalomi mwan’a ka, mwan’a ka!” (2 Samuele 18:33) Davida mulena ya m’ata ya n’a tuzi lila ze tiile n’a sa koni ku eza se siñwi kwand’a ku ikupela fela kuli kambe ne li yena ya n’a bulailwe ki ‘sila sa maungulelo, lona lifu,’ mwa sibaka sa mwan’a hae.—1 Makorinte 15:26.

Kana ku na ni mulyani wa lifu? Haiba kucwalo, ki sikamañi se si ka ezahala ku ba ba shwile? Kana muta o muñwi lu ka bonana ni balatiwa ba luna hape? Taba ye tatama i ka alaba lipuzo zeo ka ku itusisa Mañolo?