Kana Mwa Hupula?

Kana mu ikozi ku bala limagazini za cwanoñu fa za Tora ya ku Libelela? Mu bone haiba mwa kona ku alaba lipuzo ze latelela:

• Ki kabakalañi ha ku na ni hahulu lunya kacenu?

Libaka la pili ha ku na ni lunya ki tengamo ya batu ya ku bata ku eza bumaswe. (Genese 8:21) Libaka le liñwi ki la kuli batu ba bañata ha ba na zibo ye nepahezi ya tato ya Mulimu. Ku zwa fo Satani, yena musimululi wa bumaswe, u zwelapili ku icocomeza hahulu mwa litaba za batu.—1/1, makepe 4-6.

• Ki lituso mañi ze tiswa ki linzwi le li bulelwa ka nako ye swanela? (Liproverbia 12:25, NW)

Ku kona ku tusa mutu kuli a isepe, ku mu susueza, ku mu tiisa, ni kuli a ikutwe kuli ki wa butokwa. Hape ha lu nze lu bata ku babaza ba bañwi, lu tusiwa ku bona bunde ku bona.—1/1, makepe 16-17.

• Ki lika mañi ze ne beilwe mwa aleka ya bulikani?

Ne ku beilwe matapa a macwe a mabeli a Mulao ni manna. Kora ha sa ipanguzi, tupa ya Aruni ne i beilwe mwa aleka ya bulikani kuli i be bupaki kwa lusika lwa baikanyisi lo. (Maheberu 9:4) Mwendi tupa ya Aruni ni manna ne li zwisizwe mwa aleka ya bulikani pili tempele ye ne yahilwe ki Salumoni i si ka kakulwa kale.—1/15, likepe 31.

• Ki kabakalañi Majuda ba mwa miteñi ya Nehemia ha ne ba tokwiwa ku tisa likota kwa tempele?

Mulao wa Mushe ne u si ka laela kuli ku tiswe likota. Kono ki ka libaka la kuli mwa miteñi ya Nehemia ne ku tokwahala likota kamita ilikuli matabelo a kone ku cisiwa fa aletare.—2/1, likepe 11.

• Pampili ya Muratorian Fragment ki nto mañi?

Ki kalulo ya muputo o ne u ñozwi mwa Silatini. Pampili ya pili ne i ñozwi mwa Sigerike ibata iba kwa mafelelezo a lilimo za ma-100 C.E. Pampili ye i bonisa mukoloko wa kale ka ku fitisisa wa Mañolo a Sigerike a Sikreste a ngiwa kuli a nepahezi, mi i talusa libuka ni bañoli ba zona.—2/15, makepe 13-14.

• Ki Kabakalañi Muoli Vashiti ha na hanile ku taha ku mulena? (Estere 1:10-12)

Bibele ha i bonisi libaka ha na ezize cwalo. Licaziba ba bañwi ba akaleza kuli muoli na hanile ku ya bakeñisa kuli na sa lati ku ishwaulisa fapil’a baenyi ba mulena ba ne ba kozwi. Kamba mwendi muoli ya buheha yo na sa ipeyi kwatasi luli, ili ku tomela basali ba bañwi ba mwa Mubuso wa Peresia mutala o maswe.—3/1, likepe 9.

• Tiululo i lukulula cwañi?

Sitabelo sa Jesu sa kona ku lu lukulula kwa sibi sa ku hoza ni kwa lifu le li tahisizwe ki sibi. (Maroma 6:23) Sitabelo seo si fa Bakreste ba niti tukuluho ya ku sa ikutwa ku ba lifosi. Mi ha lu ba ni tumelo mwa tiululo, lwa kona ku lukululwa kwa sabo ya za kuli Mulimu u lu nga cwañi. (1 Joani 2:1)—3/15, likepe 8.

• Lu kona ku itutañi kwa taelo ye hanisa ku apea pulinyana ka muzilili wa m’a yona? (Exoda 23:19)

Ku apea ko mwendi ne li sizo sa sihedeni se ne si ezezwanga kuli pula i nele. (Livitike 20:23) Mulimu n’a lukisize kuli muzilili wa puli ya mushemi u fepe pulinyana kuli i hule. Ku apea pulinyana mwa muzilili wa m’a yona ne ku ka shwaulisa tukiso ya na ezize Mulimu mwahal’a mushemi ni mwana. Mulao wo u lu bonisa mufelañeke wa Mulimu.—4/1, likepe 31.