Mañi ni Mañi U Na ni Tukelo ya ku Ba ni Libizo

MUTU ni mutu u na ni tukelo ya ku ba ni libizo. Mwa Tahiti, nihaiba mbututu ya sa zwo pepwa–pepwa, ya yubekilwe, wa fiwanga libizo bashemi ba hae niha ba sa zibahali. Ofisi ko ku bulukelwa litaba za muuso i fanga mbututu ya yubekilwe libizo la sipepo ni libizo la bubeli.

Kono ku na ni mutu yo muñwi ili yo ka mubulelelo o muñwi u timilwe tukelo ya hae, yona ye ba na ni ibat’o ba batu kaufela. Mi kwa komokisa kuli mutu yo ki yena “Ndate, [yo] ka Yena ku shikulwa lusika ni lusika lo lu li teñi mwa lihalimu ni mwa lifasi.” (Maefese 3:14, 15) Batu ba bañata mane ba hana ku itusisa libizo la Mubupi ka mo li boniselizwe mwa Bibele. Mi ba li yolisa ka malumbatina a cwale ka “Mulimu,” “Mulena,” kamba “Ndate wa Kamita.” Kono cwale libizo la hae ki lifi? Isaya u alaba kuli: “Ki [Muñ’a] Bupilo Jehova.”—Isaya 12:2.

Kwa makalelo a lilimo za ma-1800 fo ba fitela balumiwa ba London Missionary Society mwa Tahiti, ma-Polynesia ne ba lapela milimu ye fitana-fitana. Mulimu ni mulimu ne u na ni libizo la ona, mi Oro ni Taaroa ne li yona milimu ye ne ngiwa ku ba ye mituna ka ku fitisisa. Kuli ba kone ku taluhanya Mulimu wa mwa Bibele kwa milimu ye miñwi, balumiwa bao ne ba si ka liyeha ku itusisa libizo la hae, le ne li tolokilwe kuli Iehova mwa puo ya mwa Tahiti.

Libizo leo la fita fa ku tuma hahulu mi batu ba kalisa ku itusisa hahulu lona mwa lingambolo za bona ni mwa mañolo a ne ba ñolelananga. Mulena wa Tahiti ya bizwa Pomare II, ya na busize kwa makalelo a lilimo za ma-1800, na itusisize hahulu lona mwa mañolo a na ñolanga. Bupaki bo bu bonisa cwalo bu mwa liñolo la na ñozi le li bonisizwe mwa siswaniso se si fa likepe le. Liñolo leo le ne li ñozwi ka Sikuwa li bulukezwi mwa Miziyamu ya Tahiti ni Lioli za yona. Liñolo leo li paka kuli batu ba mwa miteñi yeo ne ba itusisa libizo la Mulimu ka ku lukuluha. Mi mane libizo la Mulimu li fumaneha hahulu mwa Bibele ya pili ya puo ya mwa Tahiti ye ne felizwe ku tolokiwa ka 1835.

[Siswaniso se si fa likepe 32]

Mulena Pomare II

[Manzwi a bañi ba siswaniso fa likepe 32]

Mulena ni liñolo la hae: Collection du Musée de Tahiti et de ses Îles, Punaauia, Tahiti