Televishini Kana ki Muleli Yo Munde?

FOKUÑWI mu kana mwa ikutwa kuli ku siyela bana ba mina TV kuli ba buhe mina ha mu nze mu patehile ku eza misebezi ya ka zazi ki nto ye nde. Kono ku eza cwalo ku kona ku ama cwañi bana ba mina?

Mutende wa The New York Times u biha kuli: “Nihaiba limbututu ze nyinyani za kona ku amiwa ki likezo ze boniswa fa TV.” Mwa patisiso ya cwanoñu fa, limbututu ze na ni silimo si li siñwi ne li buhisizwe tukalulo-kalulo twa filimu ye ñwi ya fa TV. Tukalulo t’o ne li twa musali ya na bapalisa sipupe. Mutende wa Times u li: “Musali yo ha na bonahala kuli na saba sipupe seo, limbututu ni zona ne li bonahala ku saba ku bapala ni sona, ni ku sosobanisa lifateho, kamba mane ku bata ku lila. Musali yo ha na bonahala ku tabela sipupe seo, limbututu ne li bonahala kuli ni zona ne li tabela ku bapala ni sona.”

Kaniti TV ya kona ku ama limbututu. Kono ki sifi se si kona ku ezahala banana ha ba buha TV ka nako ye telele? Dr. Naoki Kataoka, muluti wa baalafi ba banana kwa sikolo sa Kawasaki Medical College mwa Kurashiki kwa Japan, u lemuhile banana ba bañata ba ba kuzize hahulu mi lifateho za bona ha li bonisi mo ba ikutwela. Banana bao kaufela bona ba buhile TV kamba mavidio ka nako ye telele. Mwanana yo muñwi wa lilimo ze peli na sa koni ku ambola ni batu mi na sa zibi manzwi a mañata. Ku zwa ka nako ya na na ni silimo si li siñwi na buhanga mavidio zazi ni zazi ku kala ha li pazula ku isa ha li yo likela. Na kalisize ku bulela hande bomahe ha ne ba mu tuhelisize ku buhanga mafilimu ni ku kala ku bapalanga ni yena ba mano elezwa cwalo ki dokota. Ki niti, bashemi ba swanela ku bapala ni ku ambolanga ni bana ba bona.

Jehova Mulimu, yena Musimululi wa lubasi, na koñomekile butokwa bwa nzila ye nde ka ku fitisisa ya ku swalisana ni bana. Kale-kale k’o na bulelezi batu ba hae kuli: “[Manzwi a Mulimu] u na ni ku a luta bana ba hao ka tokomelo, u be ni ngambolo ka ona, niha u inzi mwa ndu ya hao, niha u zamaya mwa nzila, niha u y’o lobala, niha u zuha.” (Deuteronoma 6:7) Bashemi ki bona ba ba kona ku luta hande mwana mwa “nzila y’a swanezi ku zamaya,” ka manzwi ni ka mutala wa bona, isiñi TV.—Liproverbia 22:6.