Ba Tabela ku Eza Tato ya Mulimu

JESU n’a tomezi Bakreste kaufela mutala ha n’a lapezi ku Ndat’ahe kuli: “Ku si ke kwa ezwa se si latwa ki na, ku ezwe se si latwa ki Wena.” (Luka 22:42) Kupo yeo ya buikokobezo ya ku ipeya kwatas’a Jehova ki yona hape kupo ya bolule-lule ba batanga ba Mulimu kacenu. Ba bañwi ba batanga bao ki baituti ba 52 ba sitopa sa bu-120 sa Sikolo sa Bibele sa Giliadi. La 11 March, 2006, sitopa se ne si feza sikolo seo ne si nyolezwi ku yo ezeza tato ya Mulimu mwa linaha ze fapahana-fapahana, niha ne ku ka ba ni miinelo ye t’ata.

Ki nto mañi ye susuelize balumiwa bao ku eza tato ya Jehova mwa bupilo? Muzwale Chris ni musal’a hae Leslie, ba ba lumilwe ku yo belekela kwa Bolivia, ne ba talusize se ne si ba susuelize ku eza cwalo, ne ba ize: “Bakeñisa kuli lu ifanile, lu bata ku eza musebezi ufi kamba ufi mwa kopano ya Jehova.” (Mareka 8:34) Muzwale Jason ni kaizeli Chere, ba ba lumilwe ku yo belekela kwa Albania, ne ba ize: “Musebezi kaufela o lu filwe mwa kopano ya Jehova u bile ni matata a ona. Nihakulicwalo, lu lemuhile kuli Jehova ki Mulimu ye lu swanela ku sepa ka ku tala.”

Susuezo ya ku Eza Tato ya Jehova

George Smith, ya belekela fa Betele mwa Likolo la Maswaniso, n’a kwaluzi tukiso ya mukiti wa ku feza sikolo sa Giliadi ka tapelo. Stephen Lett, wa mwa Sitopa Se Si Etelela sa Lipaki za Jehova, ya n’a li muina-situlo wa tukiso, n’a amuhezi baputehi kaufela. Baenyi ba ba zwelela kwa linaha ze 23 ne ba ile kwa Sibaka sa Tuto sa Watchtower kwa Patterson, mwa New York, kuli ba yo fumaneha teñi kwa tukiso ye tabisa yeo. Muzwale Lett n’a bulelezi mizwale ni likaizeli ba ne ba feza sikolo bao kuli ba ka peta “nto ye ñwi ye tuna hahulu.” A talusa za “makwakwa” a tiile hahulu a cwale ka lituto za buhata ze ne ba ka yo felisa balumiwa ba banca ka m’ata a Mañolo. (2 Makorinte 10:4, 5) N’a felize ka ku bulela kuli: “Mu ka ba ni tabo luli ha mu ka itusiswa ki Jehova kwa ku wisa makwakwa a tiile hahulu a batu ba lipilu ze sepahala mwa musebezi wa mina!”

Harold Jackson, yo muñwi wa ba ba pila fa sibaka sa tamaiso, n’a file ngambolo ye li “Lika Li Sikai za Ku Hupula.” N’a bulezi kuli balumiwa ba banca ha ba swaneli ku libala ku ‘bata pili mubuso wa Mulimu ni ku luka kwa Hae.’ (Mateu 6:33) Ba swanela ku hupula kuli “lilato la yahisa” mi ki la butokwa kwa ku kondisa lika. (1 Makorinte 8:1) N’a ize: “Haike mu etelelwe ki lilato ha mu sebelisana ni ba bañwi.”

Hamulaho, Geoffrey Jackson, wa mwa Sitopa Se Si Etelela ili ya n’a belekile sina mulumiwa ku zwa 1979 ku to fita 2003, n’a buzize balumiwa kuli, “Buikalabelo bwa Mina Ki Bufi?” N’a koñomekile butokwa bwa ku ba ni buitikanelelo ni bwa ku eza bukombwa. Bakreste ba na ni musebezi wa ku beleka ka t’ata ha ba nze ba cala ni ku selaela lipeu za  niti. Kono ku li hulisa kwa moya ki musebezi wa Jehova bakeñisa kuli “ki Mulimu ya melisa.” (1 Makorinte 3:6-9) Muzwale Jackson n’a ize: “Jehova u mi tokwa kuli mu zwelepili ku tiya kwa moya. Kono ki nto mañi sihulu ya tokwa ku mina? U tokwa kuli mu late Jehova ni batu bo mu yo sebeleza.”

Lawrence Bowen, muluti wa kwa Giliadi n’a nyakisisize toho ya taba ye li “Mu Zibe Mo Mu Swanela Ku Pilela.” N’a hupulisize baituti kuli Jehova n’a etelezi ni ku sileleza Maisilaele ka makazo ha ne ba nze ba zamaya mwa lihalaupa. (Exoda 13:21, 22) Nzila ye ñwi ya lu etelela ni ku lu sileleza ka yona kacenu ki ka puteho ya Bakreste ba ba tozizwe, ba ba eza “musumo ni sehezo ye seheza niti.” (1 Timotea 3:14, 15) Balumiwa ba banca ba swanela ku kumalela niti ya Bibele, ye etelela ni ku sileleza ba ba ikokobeza.

Wallace Liverance, yo muñwi wa baluti ba kwa Giliadi, n’a susuelize balumiwa kuli ba  sike ba libala linzwi la Mulimu le li “mwamulaho” wa bona. Linzwi la Mulimu li mwamulaho wa luna bakeñisa kuli Bibele ne i felizwe ku ñolwa lilimo-limo kwamulaho k’o. Sina mulisana ya biza kwamulaho wa mutapi wa lingu, Jehova u kwamulaho wa batu ba hae, inze a ba etelela ka “mutanga ya sepahala, ya na ni kutwisiso.” (Isaya 30:21; Mateu 24:45-47) Sikolo sa Giliadi si tusize baituti bao kuli ba itebuhe hahulu sitopa sa mutanga seo. “Mutanga” yo mane u lukisize Bibele ya New World Translation of the Holy Scriptures. Mubuleli y’o n’a susuelize balumiwa kuli: “Mu nge lushango lwa butokwa lo, mi mu itusise lona kwa ku luta ba bañwi.”—Mateu 13:52.

Ku Eza Tato ya Jehova mwa Bukombwa bwa mwa Simu

Mwa ngambolo ye li: “Ku Tabela Ku Shaela Taba ye Nde,” Muluti wa kwa sikolo sa Giliadi, Muzwale Mark Noumair n’a talusize lika ze ñwi ze nde ze ne ba ikozi baituti mwa bukombwa bwa mwa simu ha ne ba sa li kwa Sikolo sa Giliadi. (Maroma 1:15) Ze ne ba kandekile baituti bao ne li bonisize luli kuli ne ba tabela hahulu ku kutaza ka nako kaufela.

Baituti ne ba tiisizwe hahulu hape ki puhisano ya n’a bile ni yona Muzwale Kenneth Flodin ni baokameli ba maeto ba balalu ba ba belekela mwa United States ka nako ye. Muzwale Richard Keller ni Muzwale Alejandro Lacayo, ba ba kile ba belekela kwa South America ni Central America, ne ba talusize mo ne ba talimanezi ni matata a mañata ni limbuyoti ze ñwi ze ne ba fumani ha ne ba li balumiwa. Moacir Felisbino n’a talusize ka butungi za n’a itutile ha n’a beleka hamoho ni balumiwa mwa Brazil, ili mwa n’a hulezi.

Muzwale David Schafer n’a bile ni puhisano ni balumiwa ba balalu ba ba yeziseli, bo Robert Jones, bo Woodworth Mills, ni bo Christopher Slay. Mizwale ba balalu bao ne ba talusize mo ne ba itutezi ku sepa Jehova mwa nako ya matata. Ne ba kolwisize mizwale ni likaizeli ba ne ba feza sikolo sa Giliadi kuli tuto ye ba filwe ki kopano ya Jehova i ka ba konisa ku yo peta hande musebezi wa bona wa bulumiwa. Muzwale Mills ka bukuswani n’a ize: “Se ne si ni tusize hahulu haki zibo ye ne ni fumani kwa Giliadi, kono ki ze ne ni itutile teñi ka za buikokobezo ni lilato.”

Guy Pierce wa mwa Sitopa Se Si Etelela, n’a file ngambolo ye tuna, ye li: “Jehova Ha Na Ku Palelwa.” Adama n’a palezwi, kono kana seo ne li sisupo sa kuli ni Jehova n’a palezwi? Kana Mulimu n’a palezwi ku bupa Adama ka ku petahala, sina batu ba bañwi mo ba taluseza? Kutokwa, bakeñisa kuli “Mulimu u ezize mutu kuli ibe ya lukile.” (Muekelesia 7:29) Mubuleli n’a bulezi kuli ku sepahala kwa Jesu mwahal’a muliko o mutuna ka ku fitisisa fa lifasi ne li bupaki bwa kuli “Adama n’a si na libaka la ku palelwa ni hanyinyani.” Muliko wa busepahali wa n’a talimani ni ona Adama mwa simu ya Edeni ne li o munyinyani ku wa n’a tiyezi Jesu. Niteñi, Adama n’a palezwi. Kono Jehova ni kamuta ha na ku palelwa. Mulelo wa hae u ka talelezwa. (Isaya 55:11) Muzwale Pierce n’a taluselize balumiwa ba banca kuli: “Mu na ni tohonolo ya ku kuteka Jehova ka moya wa mina wa ku ifana. Haike Jehova a be ni mañi ni mañi wa ku mina kai ni kai ko mu ka yo mu sebeleza sina balumiwa.”

Hasamulaho wa ku fitisa litumeliso ze zwa kwa liofisi za mitai ze fapahana-fapahana za Lipaki za Jehova, Muzwale Lett, yena muina-situlo, n’a file baituti bao mapampili a bonisa kuli ba felize sikolo ni ku ba taluseza ko ba ka yo sebeleza. Muzwale Vernon Wisegarver, ya belekezi fa Betele ka nako ye telele, n’a yemezi baputehi mwa tapelo ya ku kwala.

Baputehi ba 6,872 ne ba ikutwile kuli mukiti wo wa ku feza sikolo ne u zusuluzi cisehelo ya bona ya ku eza tato ya Mulimu. (Samu 40:8) Muzwale Andrew ni kaizeli Anna, ba ne ba feza sikolo sa Giliadi, ne ba ize: “Lu neezi bupilo bwa luna ku Jehova. Lu sepisize Jehova kuli lu ka eza nto ifi kamba ifi ya ka lu kupa ku eza. Mi ku ezahezi honacwalo, Jehova u lu lumile ku ya kwa Cameroon, mwa Africa.” Bona ni baituti ba bañwi kaufela ba nyolelwa ku kalisa musebezi o ka ba tabisa ni ku ba nyakalalisa. Kaniti, ba tabela ku eza tato ya Mulimu.

[Mbokisi fa likepe 17]

LITABA KA ZA SITOPA

Palo ya linaha ko ba zwa baituti: 6

Palo ya linaha ko ba lumezwi: 20

Palo mukatumbi ya baituti: 52

Avareji ya lilimo za ku pepwa: 35.7

Avareji ya lilimo za ku ba mwa niti: 18.3

Avareji ya lilimo za ku ba mwa bukombwa bwa ka nako kaufela: 14.5

[Siswaniso se si fa likepe 18]

Sitopa Sa bu-120 Se Si Feza kwa Sikolo sa Giliadi sa Bibele

Fa mukoloko o kwatasi, milaini i baliwa ku zwa kwapili ku kuta kwamulaho, mi mabizo a kolohanyizwe ku zwa kwa nzohoto ku ya kwa silyo mwa mulaini o muñwi ni o muñwi.

(1) )Wright, S.; Suárez, B.; Croisant, B.; Davenport, L. (2) Johnson, A.; Ali, C.; Cady, K.; Guerrero, P.; Ases, A. (3) Ortiz, L.; Lyall, K.; Uzeta, M.; Perez, R.; Backus, K.; Caterina, C. (4) Palmer, B.; Loving, D.; Macdonough, J.; Bostock, D.; Benetatos, L. (5) Jasicki, M.; Sarafianos, E.; Stelter, C.; Vaira, R.; Woon, J.; Prentice, K. (6) Davenport, H.; Croisant, H.; Perez, M.; Vaira, E.; Suárez, A.; Caterina, I.; Wright, C. (7) Cady, K.; Macdonough, J.; Ortiz, M.; Woon, J.; Ali, J.; Ases, M. (8) Sarafianos, G.; Lyall, D.; Uzeta, C.; Stelter, P.; Prentice, G.; Johnson, A.; Benetatos, C. (9) Palmer, J.; Jasicki, W.; Backus, J.; Bostock, S.; Guerrero, J. M.; Loving, S.